Yihowa Ayeti?
Qullaawu Maxaafi mayyaanno?
Yihowa Qullaawu Maxaafi giddo kulloonniho halaalaancho Maganooti; baalankare kalaqinohu isooti. (Yohaannisi Ajuuja 4:11) Masaalaano Abirihaaminna Muse iso magansidhino; Yesuusino iso magansiˈrino. (Kalaqama 24:27; Fulo 15:1, 2; Yohaannisi 20:17) Isi mitte dagaha calla ikkikkinni “baatto baalate” Maganooti.—Faarso 47:2.
Qullaawu Maxaafi giddo kulloonni garinni, Yihowa yinannihu Maganu suˈmi isira calla malinoho baxxino suˈmaati. (Fulo 3:15; Faarso 83:18) Kuni suˈmi “ikka” yitanno tiro afiˈrinohu Ibiraawootu Afii qaalinni haaˈnoonniho; batinyu egennaammi yitanno garinni Maganu suˈmi “Ikkanno Gede Assanno” yitanno tiro afiˈrino. Tini tiro Yihowa Kalaqaanchonna hedinore wonshanno Magano ikkasi dancha gede assite xawissanno. (Isayaasi 55:10, 11) Qullaawu Maxaafi konni Yihowa yinanni Magani ayimma, roorenkanni qara akatasi ikkinoha baxillesi anfeemmo gedeno kaaˈlannonke.—Fulo 34:5-7; Luqaasi 6:35; 1 Yohaannisi 4:8.
Yihowa yinanniha Maganu suˈma Ibiraawootu afiinni יהוה (YHWH) yinannite shoole fidalenni borreessinanni. Tenne fidalla Tetiragiraamateni yinanni. Hundihu Ibiraawootu Afiinni Maganu suˈma woshshinanni gara dianfoonni. Ikkollana Sidaamu Afiinni Maganu suˈma “Yihowa” yee woshsha lowo diro rosantinote.
Hundihu Ibiraawootu Afiinni Maganu suˈma woshshinanni gara anfoonnikkihu mayiraati?
Hundiha Ibiraawootu Afoo coyishiishaano worrikkinni coyishiishamaanotenni calla borreessinanni. Hundiha Ibiraawootu Afoo coyiˈranno manni hasiissanno coyishiishaano insa uminsa eessanni nabbawanno. Ikkollana Ibiraawootu Afiita Qullaawa Borro (“Akkala Gondooro”) borreessine gundihu gedensaanni, mitu Ayihudete manni Maganu suˈma gana dihasiissanno yaa hanafi. Insa Qullaawa Borro huuronsa naggi assite nabbabbanno woyite, Maganu suˈmi noo base iillituro Maganu suˈmi bayicho suusu suˈma lawishshaho “Mooticha” woy “Magano” yaannoha eessite nabbabbe saˈanno. Dirra saˈanni hadhuta kuni gara ikkinokki rosichi halaˈlanni haˈrino daafira, Maganu suˈma woshshinanni gari sunu sununni ikkanni hawamino. a
Mitootu Maganu suˈma woshshinannihu “Yaahiwe” yineeti yitanno; wolootu kayinni wolu garinni woshshinanni yitanno. Gama wido Giriikete Afiinni tirroonniha Leewaawootu maxaafa amaddinote Reyote Baari Xaaxora Maganu suˈma Yaao yine Giriikete Afii fidallanni borreessinoonni. Hunditi Giriikete borreessaano Maganu suˈma Yaae, Yaabenna Yaaooa yineno woshsha dandiinanni yitanno; ikkollana xaa yannara hundi waro Ibiraawootu Afiinni Maganu suˈma woshshinanni gara bade afinohu dino. b
Lowo mannira Qullaawu Maxaafi giddo kulloonnihu Maganu suˈmi daafira noonsata soˈrote hedo
Soˈrote hedo: Qullaawa Maxaafa tirturi “Yihowa” yinanni suˈma nookkiha leddino.
Halaale: Tetiragiraamateni yinannite Ibiraawootu fidallanni borreessinoonnihu Maganu suˈmi, Qullaawu Maxaafi giddo mite 7,000 ikkitanno basera no. c Qullaawa Maxaafa tirinohu batinyu manni tironsa giddonni Maganu suˈma fushshe hoole hakko bayicho “Mooticha” yinannite gedeeta suusu (maaragete) suˈmuwa eessino.
Soˈrote hedo: Woˈmanka Dandaanno Magano baxxino suˈminni woshsha dihasiissanno.
Halaale: Maganu umisi, qullaawu ayyaaninni Qullaawa Maxaafa borreessituri suˈmasi lowo kume ikkitanno basera borreessitanno gede assino; qoleno iso magansidhannori suˈmasi woshshitara hajajino. (Isayaasi 42:8; Iyueeli 2:32; Milkiyaasi 3:16; Roomu Sokka 10:13) Isinni Maganu, mannu suˈmasi hawanno gede assate woˈnaaltinore kaphu masaalaano rufino.—Ermiyaasi 23:27.
Soˈrote hedo: Ayihudete manni harunsanno budi garinni, Maganu suˈma Qullaawu Maxaafi giddonni hoola hasiissanno.
Halaale: Hige mite Ayihudete borreessaano Maganu suˈma gana gibbinoti egennantinote. Ikkollana, insa Maganu suˈma Qullaawu Maxaafinsa giddonni fushshite dihooltino. Ikkihano ikkiro, Maganu hajajosi ledo sumuu yaannokkiha mannu bude harunsinammora dihasiˈranno.—Maatewoosi 15:1-3.
Soˈrote hedo: Ibiraawootu Afiinni Maganu suˈma woshshinanni gara anfoonnikki daafira, Qullaawu Maxaafi giddo konne suˈma horoonsiˈra dihasiissanno.
Halaale: Hatto yaa, Maganu addi addi afoo coyiˈranno manni suˈmasi mittu garinni woshshara hasiˈranno yaate gedeeti. Ikkollana Qullaawu Maxaafi, Magano magansiˈrannohu hundi waro heeˈrinohu babbaxxino afoo coyiˈranno manni tuuti suˈmuwa addi addi garinni woshshinota eeranno.
Hanni Israeelete gashshaanchiha Iyyaasu suˈma lawishsha assine laˈno. Umi xibbi diro heeˈrinohu Ibiraawootu Afoo coyiˈranno Kiristaani isi suˈma Yehoshuwa yee woshshanno; Giriikete Afoo coyidhannori kayinni Yesoosi yite woshshitanno. Iyyaasuha Ibiraawootu Afii suˈma Qullaawu Maxaafi giddo Giriikete Afiinni woshshinanni garinni borreessinoonni; tini Kiristaanu mitto suˈma qaalinsanni rosamino garinni woshshansa gara ikkitinota leellishshanno.—Soqqamaasinete Looso 7:45; Ibiraawoota 4:8.
Maganu suˈma tirateno tenne hayyo harunsa dandiinanni. Roore hasiisanno coyi, Maganu suˈma woshshinanni gara bade afa ikkitukkinni suˈmisi Qullaawu Maxaafi giddo bayichosi heeˈranno gede assate.
a Niwu Kaatoliki Insayikilopiidiya Layinki Ittimera Xiraaze 14, qoola 883-884 togo yaanno: “Qafadote diri goofihunni shiima yanna gedensaanni, Yaahiwe yinanni suˈma mannu baxxino garinni ayirrisa hanafino; hakko daafira konne suˈma ADOONAYI woy ELOHIIMI yinanni suˈminni riqiwa hananfoonni.”
b Ledde afate, Maganu Qaale Xiinxalli yitanno birosherera “Maganu Suˈma Ibiraawootu Afiite Qullaawa Borro Giddo” yaanno birxicho lai.
c Teyolojikaali Leksikeni Ovi Oldi Testaameenti yaanno maxaafa Xiraaze 2, qoola 523-524 lai.
Kurino Lai
KAA'LANNOHA QULLAAWU MAXAAFI ROSO
Maganoho Suˈmu Noosi?
Maganoho batinyu suusu suˈmi noosi; lawishshaho Woˈmanka Dandaannoha, Kalaqaanchonna Mooticha yinannisi. Ikkollana Maganunnihu baxxino suˈmi Qullaawu Maxaafi giddo mito 7,000 ikkanno bayicho no.
AGAROOSHSHU SHAE
Maganu Ayeti?
Maganu ledo jaalooma kalaqiˈrate, balaxxe iso egenna hasiissannohe. Ikkina isi daafira rosa dandaattohu hiittoonniiti?
QULLAAWU MAXAAFI XAˈMONNA DAWARO
Maganoho Meu Suˈmi Noosi?
Mitu mannira ‘Allahi,’ ‘Alfanna Omeega,’ ‘Elshadayi,’ woy ‘Yaahiwe Yirie’ Maganu suˈma lawansara dandaanno. Maganu suˈma bande afa hasiissannonkehu mayiraati?
QULLAAWU MAXAAFI ROSO
Qullaawu Maxaafi Xiinxallonke Woˈnaalte Lai
Rosiisannohe manna worreennahe Qullaawa Maxaafa mulla xiinxalli.