Ongilii Bulgaariyaho heedhannote Yihowa Farciˈraasinchooti. Tini rodoo, Zilaatika yinannita aja beetto Qullaawa Maxaafa xiinxallissanno; Zilaatika minaanni kayinni dixiinxallanno. Ongilii togo yitino: “Maatete daafira xiinxallinanna, minaannuwinkeranna oosonkera banxeemmonsata kula lowo geeshsha hasiisanno coye ikkinota kulummase. Hakkiinni Zilaatika dadillaabbinoti mite anewa higge laˈu. Ise minaanniserano ikko honsu diri qaaqqosera baxxannonsata horonta kulte egentinokkita kultue!”

 Zilaatika tenne kultanni, “Minaanniˈyaranna qaaqqoˈyara aye coyeno ikkiro asseemma; kayi baxeemmaˈne yee diafeemma” yitino. Qolteno togo yitino: “Amaˈya ane baxeemmahe yite horo diegentinoe; ahaaheˈya iseno baxeemmahe yite horo diegentinose.” Ongilii, Yihowa Beettosi Yesuusa baxannota coyiˈre kulinota Qullaawu Maxaafinni kultuse. (Maatewoosi 3:17) Qoleno tenne hajo daafira Yihowa huuccidhanno gedenna minaannasenna qaaqqose baxeemmaˈne yaate woˈnaaltanno gede jawaachishshuse.

 Ongilii togo yitino: “Lamu barri gedensaanni, Zilaatika Yihowa kaaˈlasera huuccidhinota hagiidhitanni kultue. Minaannise minira dayita, minaama minaannase ayirrisanna baxa hasiissannoseta Qullaawu Maxaafinni rosoomma yite kultusi. Hakkiinni shiima geeshsha taxxi yite kaˈe, lowo geeshsha baxxannosita kultusi! Qaaqqoseno minira dagguta, hanqaffe kaˈe baxxannoseta kultuse! Zilaatika togo yitinoe: ‘Xa harshammi yoomma. Kageeshshi diro wodaniˈya hedo fushshe coyiˈra didandoomma; xa kayi Yihowa kaaˈlonni, maateˈyara baxeemmansata kuloommansa.’

 Ongilii ledde togo yitino: “Mitte lamala gedensaanni, Zilaatika minaanninni xaadumma. Hakkiinni isi togo yiie: ‘Batinyu manni Zilaatika ate ledo Qullaawa Maxaafa xiinxallitannota hooli yiinoe; ikkirono Qullaawu Maxaafi xiinxallose maatenkera lowore kaaˈlitinota afoommo. Xa maatenke albinni roore hagiirraamenna baxillu noota ikkitino.’”