Mitto barra Eliso yinanniti Yihowa Farciˈraasincho mitte manchora Qullaawa Maxaafa xiinxallissanni heedheenna manchote minira wosinu dayi. Dayino wosini, qeesichahonna minaamasiiti. Kuri minaanninna minaama lame lamalara albaanni tole qaaqqinsa dhiwame reyinota Elisora kulise.

 Eliso qaaqqinsa reyora lowo geeshsha dadillitinota coyidhuta, qeesichunna minaamasi hururame wiˈli. Hakkiinni qeesichu hifatamanni togo yii: “Maganu kuni qarri iillankera mayira wore lai? Noonkeha tole qaaqqo hiissiˈrara adhi? Ani lowoha dancha coye loosanni Maganoho 28 diro soqqamoommo. Ikkina, Maganu ma asseennasiiti qaaqqoˈya shiihu?”

 Eliso, kuri minaanninna minaamara Maganu qaaqqonsa adhinokkita kultunsa. Qoleno insa ledo, wodotenna kaote hexxo daafira, hattono Maganu bushu coyi heeˈrara fajjinohu mayiraatiro hasaabbu. Qeesichunna minaamasi Elisora, kuri xaˈmuwara dawaro afiˈrate huuccatto assiˈranni keeshshinotanna tini huuccattonsara dawaro ikkitinota kulinose.

 Layinki lamalara, qeesichunna minaamasi, hatte mancho ledo Qullaawa Maxaafa xiinxallara minisera dayino. Eliso hatte yannara, Qullaawu Maxaafi Addinta Mayyee Rosiisanno? yaanno maxaafira noota “Reyinohura Baxatto Mannira Nooti Huluullissannokki Hexxo” yitanno fooliishsho xiinxallissanni no. Kuri minaanninna minaama hatte yannara hagiirrunni xiinxallino.

 Gedensoonni insa Joorjiyaho Tebilisi yinanniwa assinoonniha Yihowa Farciˈraasineha baxxino gambooshshe haˈrino; hakkiicho laino baxillinna mittimma baasa maalaˈlissinonsa; insa beetekiristaanensara kuri akatta heedhanno gede sharraminoha ikkirono diqiniinonsa.