Ilamoommohu Kanaadaho, Montiriyali yinannihu Kiwubeeki giddo jawiidi katamiraati. Ane, meya rodooˈyanna lame labballo roduuwaˈya anniˈyanna amaˈya baxillunni lossinonke; mininke noohu Rosimoonti yinannihu baxisanno qooxeessiraati. Heeshshonke keerunna salaame woˈmitinote.

 Anjeˈyanni Qullaawa Maxaafa afate halcho nooe. Tonaa lamu dirihu heeˈre, Haaru Gondoori giddo Yesuusi xagge nabbawe lowo geeshsha hagiidhoommoti qulli yitannoe. Yesuusi manna baxannonna mararanno gari dhagge ikkinoe daafira, isi gede ikka hasiˈrummo. Diriˈya lexxanni haˈrita kayinni, busha jaalla ledo hosa hanafoommo daafira, tini hasattoˈya baˈanni hadhu.

 Anniˈya sakisofoone yinanniha muuziiqu uduunnicho godoˈlannoho; isi muuziiqu uduunnesi calla ikkikkinni muuziiqu baxilleno iqqinoe. Muuziiqa lowo geeshsha baxeemmo daafira, mulenni gitaare gana rosummo. Hatte taaenkura, jaallaˈya ledo rooki yinanni muuziiqi gaamo kalaqiˈnummo; qoleno duucha bayicho muuziiqa godoˈla hananfummo. Muuziiqa qixxeessitannoti mite egennantino dirijjitta ane ledo egennantuhu gedensaanni, ledonsa looseemmo gede koyissue. Hakkiinni mitte jawa muuziiqu dirijjite ledo loosate sheemaate eummo. Ane muuziiqa lowo manni baxa hanafi; qoleno Kiwubeeki giddo ganyine raadoonetenni fannanni.

 Halcheemmori baalu nooeha lawinoe. Ani aja beettooti, maccaho, qoleno lowo woxi nooe; looseemmohuno baxeemmo loosooti. Barra barra ispoorte looseemmo, qaalu xaˈmo xaˈminannie, boonannoe manni furma ganinke yaannoe, hattono televizhiinete leelleemmo. Hashsha kayinni gamba yiino mannira muuziiqa godoˈleemmo, hattono addi addi jila haˈreemmo. Boonannoe manni albaanni waajjeemmokki gede, wedellichu heeˈrenni ago ageemmo; gedensoonni jallaagishshanno xaggano adha hanafummo. Qoleno wolootu daafira hedeemmokkiha ikkummo; hattono maaeela coye assa hanafummo.

 Laˈˈannoe mannira hagiirraamo laweemmo daafira, mitootu ane gede ikka halchitanno. Giddiidiˈya kayinni hagiirraamo diˈˈikkino; hakko iso calliˈya noommo woyite, baasa dadilleemmo. Lowo geeshsha yaadeemmoha ikkummo. Qoleno lowo geeshsha qiniinoe saatera, muuziiqa attantannoeri lamu mannooti Eedisi amadeenna reyitu. Hakkawote lowo geeshsha masoommo! Muuziiqa baxeemmoha ikkirono, konne looso loosanni heeˈreemmo heeshsho kayinni giwissannote.

 Loosiˈya qiniinoha ikkirono, alamete aana bushu coyi woˈminota afoommo. Mannu kuˈu koˈonne miicannohu mayiraati? Maganu mayira sammi yiinoro hakkawaro dhagge ikkannoe. Isinni xaˈmoˈyara dawaro qolannoe gede duucha hige Magano huucciˈreemmo. Addi addi bayicho haˈreemmowiinni higummoti, Qullaawa Maxaafa haaro ikke nabbawa hanafummo. Nabbaweemmori giddo rooriidi leellannoekkiha ikkirono, alamete goofimarchi gambise dayino yee hedummo.

 Qullaawa Maxaafa nabbawanni heeˈre, Yesuusi mitte hige halalla mare 40 barra xoominota huwatummo. (Maatewoosi 4:1, 2) Hakkiinni, ‘Anino xoomoommoro Maganu xawannoe’ yee hedummo; hakko daafira, xoomate barra amadummo. Xoomammora lame lamala gatte heedheenna, lamu Yihowa Farciˈraasine dagge saanqa gangantu; hakkiinni wonanni agare noohu gede, minira eˈe yuummo. Insa giddo mittu Zhaaki yinanniho; iso ille qase lae, “Heeˈnoommohu goofimarchu barra ikkinota mayinni anfeemmo?” yee xaˈmummo. Isi anera dawaro qolara Qullaawa Maxaafasi fane 2 Ximootewoosi 3:1-5 nabbawie. Hakkiinni wole batinye xaˈmo aana aanaho xaˈmummo; insa qoltinoeti ammansiissanno dawaro dhagge ikkitinoe; dawaro qoltinoehuno Qullaawu Maxaafinni callaati. Mitu barri geeshsha hasaambummo gedensaanni, xooma hasiissannoekkita huwatummo.

 Yihowa Farciˈraasine ledo Qullaawa Maxaafa ganye xiinxalla hanafummo. Gedensoonni, seeda umoˈya haxe hooˈlummo, hattono Gambooshshu Addaraashe haˈre woˈmanka gambooshshe beeqqa hanafummo. Gambooshshunniwa faasiinqe haaˈnoonnie daafira, halaalu noowa dayommota roore buuxummo.

 Qullaawu Maxaafinni roseemmo rosi garinni heeˈrate kayinni, heeshshoˈya giddo lowore biddi assiˈra hasiissinoe. Umihunni, jallaagishshanno xagga adha aguranna maaeela heeshsho agura hasiissinoe. Qoleno umiˈyara calla heda agure wolootu daafira heda rosa hasiissinoe. Lame qaaqquulleˈya ama nookkiha lossiˈranni noommo daafira, insara baxille leellishanna ayyaanaamittete hasiisannonsare assa rosa hasiissinoe. Konni daafira, muuziiqu loosoˈya facci asse agure, faabiriku giddo shiimu damoozira loosa hanafummo.

 Konne baala coye agura shota diˈˈikkitino. Jallaagishshanno xagga agurate sharramanni noommo yannara, araado ikkitinoe daafira hattee agureenna dhiwanni qarrisie; qoleno wirro togoo xagga adha hanafoommo woyiti no. (Roomu Sokka 7:19, 21-24) Roore qarra ikkitinoeti kayinni maaeela heeshshoˈya agurate. Qoleno haarote amadoommo loosi lowo geeshsha daafursannoho; adheemmo damoozi kayinni digariho. Alba muuziiqunni lame saate giddo calla afiˈreemmo woxe afiˈrate xa sase agana looseemmo.

 Huuccatto heeshshoˈya biddi assiˈrate sharrammeemmo woyite hexxo mudheemmokki gede kaaˈlitinoe. Qoleno Qullaawa Maxaafa ganye nabbawa lowo geeshsha kaaˈlitannota huwatoommo. Mite qummeeshshuwa woletenni roore kaaˈlitinoe. Hakkuri giddo mitte 2 Qorontoosi 7:1te; kuni qummeeshshi Kiristaanu ‘manninatenna ayyaana batteessannori baaluwiinni umonsa keereensiˈranno’ gede amaalanno. Wolu qummeeshshi kayinni Filiphisiyusi Sokka 4:13te; kuni qummeeshshi (NW), “Wolqa aannoehu isi kaaˈlonni woˈmunku coyira ikkitanno jawaante nooe” yaanno. Kuni qummeeshshi busha rosichonna gadeˈya qeeˈla dandeemmota huwachishinoe. Maganu Yihowa huuccattoˈya macciishshe, Qullaawu Maxaafi giddo noo halaale huwateemmo gedenna harunseemmo gede kaaˈlinoe. Tini heeshshoˈya isira sayise oyeemmo gede kakkayissinoe. (1 Pheexiroosi 4:1, 2) Hakkiinni, 1997nni cuuame Yihowa Farciˈraasincho ikkummo.

 Albi heeshshoˈya agura hoogoommoro, xa lubbotenni diheeˈreemmo. Xa kayinni addu hagiirre afiˈre heeˈranni noommo! Yihowa, Elvii yinannita worba galte uyinoe. Ise ledo woˈma yanna soqqamaasine ikkine mannaho Qullaawa Maxaafa rosiinseemmo. Kuni loosi giddiidi hagiirre afiˈre kassi yee heeˈreemmo gede assannoe. Yihowa iso afeemmo gede assinoe daafira lowo geeshsha galaxxeemmosi.—Yohaannisi 6:44.