I le Tusi Paia, o le upu Eleni ua faaliliuina ai le “faamagalo” e uiga atu i le “faagalo” e pei o se tagata e na te lē tauanauina le totogiina mai o se aitalafu. Na faaaogā e Iesu lenei faatusatusaga ina ua ia aʻoaʻo ona soo e tatalo: “Ia faamagalo a matou agasala, e pei foʻi ona matou faamagalo atu i ē agasala mai iā i matou.” (Luka 11:4) Na ia faia foʻi faapea i lana talafaatusa i le pologa lē alofa, ina ua ia faatusa le faamagalo atu i le faalēaogāina o se aitalafu.​—Mataio 18:23-​35.

 E tatou te faamagalo i isi pe a tatou lē teulotoina le ita, ma e tatou te lē mananaʻo e tauimasui atu ona o mea na tatou tigā ma mafatia ai. Ua taʻua i le Tusi Paia o le alofa e lē manatu faapito, o le faavae lea o le faamagalo atu ma le faamaoni talu ai e lē faitauina e le alofa mea leaga e fai atu iā te ia.​—1 Korinito 13:​4, 5.

Mea e lē uiga atu i ai le faamagalo

•   Lagolagoina o le mea sesē. O le mea moni, e taʻusalaina e le Tusi Paia i latou e finau mai e leai se afāina o mea leaga.​—Isaia 5:​20.

•   Faafoliga atu e leʻi tupu se mea sesē. Na faamagalo e le Atua agasala matuiā a le tupu o Tavita, ae e leʻi faapea ai na taofia ai Tavita mai i āuga o ana gaoioiga. Na faamauina foʻi e le Atua agasala a Tavita ina ia manatua i aso nei.​—2 Samuelu 12:​9-​13.

•   Faataga isi e faaaogā oe. O se faaaʻoaʻoga, seʻi faapea ua aitalafu e se tasi lau tupe ae ua ia faaaogāsesē ma ua lē mafai ona toe totogiina mai. Ua ia matuā salamō ma faatoese mai. E mafai ona tatou filifili e faamagalo o ia e ala i le lē teulotoina o le ita, lē toe faamanatu pea iā te ia o lana aitalafu, pe oo lava ina solofua le aitalafu. Peitaʻi, atonu foʻi e te filifili e lē toe faia sana aitalafu.​—Salamo 37:21; Faataoto 14:15; 22:3; Kalatia 6:7.

•   Faamagalo e aunoa ma se māfuaaga talafeagai. E lē faamagalo e le Atua tagata na latou faia ma le loto i ai agasala matuiā ma mumusu e faailoa a latou agasala, sui o latou ala, ma faatoese i tagata na latou faatigā i ai. (Faataoto 28:13; Galuega 26:20; Eperu 10:26) O na tagata lē salamō ua avea ma fili o le Atua, ma e lē finagalo o ia e tatou te faamagalo atu i ē e na te lē o faamagaloina.​—Salamo 139:21, 22.

   Ae a pe afai o oe lea na aafia i faiga leaga a se tasi o lē e musu e faatoese mai ma taʻutino lana mea na fai? O loo fautua mai le Tusi Paia: “Inā tuu ia le ita ma lafoaʻi le lotoa.” (Salamo 37:8) E lē avea le mea sesē e fai ma faamolemolega o le faaauau pea ona e ita. Ia maufaatuatuaina o le a faamasino e le Atua lenā tagata. (Eperu 10:30, 31) E faamāfanafanaina i tatou i le iloa o le a iai le taimi ua atofaina e le Atua o le a tatou lē toe lagona ai le tigā ona o mea o loo tatou mafatia ai i le taimi lenei.​—Isaia 65:17; Faaaliga 21:4.

•   “Faamagalo” e oo lava i masei lāiti. I nisi taimi, nai lo o le faamagalo o sē na faatigā mai, atonu e manaʻomia ona tatou iloa e leʻi iai se māfuaaga na manaʻomia ai ona tatou feita. Ua faapea mai le Tusi Paia: “Aua neʻi vave ona tigā lou loto, auā o ē e vālea o i latou ia e tigā o latou loto.”​—Failauga 7:9, faamatalaga pito i lalo.

Auala e faamagalo ai se tasi

1.   Ia manatua mea e aofia ai i le faamagalo atu. E lē faapea ua e lē ano i se mea sesē pe faafoliga atu e leʻi tupu, ae ona ua e filifili e faagalo.

2.   Ia iloa aogā o le faamagalo atu. O le lē teulotoina o le ita, o le a fesoasoani iā te oe e faatoʻafilemu ai ou faalogona, faaleleia ai lou soifua mālōlōina ma maua ai le fiafia. (Faataoto 14:30; Mataio 5:9) Ae o le mea e sili ona tāua, o le faamagalo atu i isi, o le auala sili lea e te maua ai le faamagaloga a le Atua mo au lava agasala.​—Mataio 6:​14, 15.

3.   Ia tigā alofa. O tatou uma lava o tagata e lē lelei atoatoa. (Iakopo 3:2) E pei lava ona tatou talisapaia pe a faamagaloina i tatou e isi, e tatau foʻi la ona tatou faamagalo mea sesē a isi.​—Mataio 7:​12.

4.   Ia magafagafa. Pe a iai sina māfuaaga ua tatou lē fiafia ai, e mafai ona tatou faatatau le fautuaga a le Tusi Paia: “Ia faaauau ona faapalepale le tasi i le isi.”​—Kolose 3:​13.

5.   Ia vave gaoioi. Ia faamagalo atu i le vave e mafai ai nai lo o le faataga o lou ita e tuputupu aʻe pea i le loto.​—Efeso 4:​26, 27.