O le ā le Manatu o le Tusi Paia i le Anapogi?
Tali a le Tusi Paia
I taimi o le Tusi Paia, na talia e le Atua anapogi na faia ona o se uunaʻiga saʻo. Ae e leʻi fiafia lona finagalo i anapogi na faia ona o ni māfuaaga sesē. I aso nei, e lē o faatonuina e le Tusi Paia tagata ina ia anapogi, pe faasā foʻi ona anapogi.
O ā māfuaaga na anapogi ai nisi o loo taʻua i le Tusi Paia?
Pe a saʻili atu i le fesoasoani ma le taʻitaʻiga a le Atua. Na anapopogi tagata na malaga atu i Ierusalema, e faaalia ai lo latou naunau moni e maua le fesoasoani a le Atua. (Esera 8:21-23) E iai taimi na anapopogi ai Paulo ma Panapa pe a la tofia toeaina i faapotopotoga.—Galuega 14:23.
Pe a taulaʻi atu i le faia o le finagalo o le Atua. Ina ua mavae le papatisoga o Iesu, na anapogi o ia mo le 40 aso, e sauniuni ai mo le faia o le finagalo o le Atua a o faataunuu lana faiva.—Luka 4:1, 2.
E faaalia ai le salamō mai i agasala na faia i le taimi ua mavae. Na fetalai atu le Atua i tagata lē faamaoni o Isaraelu e ala i le perofeta o Ioelu: “Ia outou toe foʻi mai iā te aʻu ma o outou lotoatoa, ma le anapogi, o le fetagisi, ma le tagiauē.”—Ioelu 2:12-15.
Pe a faamanatuina le Aso o le Togisala. I le Tulafono na avatu e le Atua i le nuu o Isaraelu, na aofia ai se faatonuga ina ia anapopogi i le Aso o le Togisala i tausaga taʻitasi. a (Levitiko 16:29-31) Na talafeagai ona anapogi tagata Isaraelu i lenā taimi, ona na faamanatu atu ai lo latou tulaga lē lelei atoatoa, ma e latou te manaʻomia le faamagaloga a le Atua.
O ā ni uunaʻiga sesē e anapogi ai nisi?
Ina ia faaofo ai isi. Na aʻoaʻo e Iesu, o le anapogi o se mataupu e patino i le vā o le tagata lava ia ma le Atua.—Mataio 6:16-18.
Ina ia faamaonia atu ai le amiotonu o se tasi. Pe a anapogi se tasi, e lē faapea ai ua sili atu ona lelei lana amio po o lona itu faaleagaga nai lo o isi.—Luka 18:9-14.
Ina ia totogi ai se agasala na faia ma le loto i ai. (Isaia 58:3, 4) E na o anapogi a ē na faaalia le usiusitaʻi ma le salamō moni na talia e le Atua.
Ona o se tū masani faalotu. (Isaia 58:5-7) E tai pei le Atua o se matua, e lē fiafia pe a faaalia e le fanau le alofa ona o se tiute e tau ina fai, ae e lē sau mai i le loto.
Pe e manaʻomia ona anapogi Kerisiano?
E leai. Na faatonuina e le Atua tagata Isaraelu ina ia anapogi i le Aso o le Togisala, ae e leʻi manaʻomia ona toe faamanatuina lenā aso ina ua uma ona ofoina atu e Iesu le togiola mo agasala, a i latou e faaalia le salamō. (Eperu 9:24-26; 1 Peteru 3:18) E lē o toe tausia e Kerisiano le Tulafono a Mose, lea e aofia ai le Aso o le Togisala. (Roma 10:4; Kolose 2:13, 14) O lea, e filifili le Kerisiano lava ia pe anapogi pe leai.—Roma 14:1-4.
E iloa e Kerisiano, o le anapogi e lē o le vala tāua lea o la latou tapuaʻiga. E lē o taua i le Tusi Paia le anapogi e fesootaʻi atu i le fiafia. I se faaeseesega, e mātaulia le tapuaʻiga moni i le fiafia, lea e faaatagia mai ai le uiga o Ieova, o ia o “le Atua fiafia.”—1 Timoteo 1:11; Failauga 3:12, 13; Kalatia 5:22.
Manatu sesē e faatatau i le aʻoaʻoga a le Tusi Paia i le anapogi
Manatu sesē: Na fautuaina e le aposetolo o Paulo Kerisiano faaipoipo ina ia anapopogi.—1 Korinito 7:5, Tusi Paia Samoa—Lomiga 1969.
Mea moni: I manusikulipi pito i leva o le Tusi Paia, e lē o taʻua ai le anapogi i le 1 Korinito 7:5. b E iai faamaoniga, na faaopoopo e i latou na faia kopi o le Tusi Paia le manatu e faatatau i le anapogi e lē gata i le mau lenei, ae faapea foʻi le Mataio 17:21; Mareko 9:29; ma le Galuega 10:30. O le tele o faaliliuga o le Tusi Paia i aso nei, e lē o faaopoopoina i ai lenei manatu sesē e faatatau i le anapogi.
Manatu sesē: E tatau i Kerisiano ona anapogi e faamanatu ai le 40 aso na anapogi ai Iesu, ina ua mavae lona papatisoga.
Mea moni: E leʻi faatonuina e Iesu le faia o lenā anapogi, ma e leai ni faamaoniga i le Tusi Paia e iloa ai na faamanatu lenā anapogi c e uluaʻi Kerisiano.
Manatu sesē: E tatau ona anapogi Kerisiano pe a faamanatuina le maliu o Iesu.
Mea moni: E leʻi faatonuina e Iesu ona soo ina ia anapopogi pe a latou faamanatuina lona maliu. (Luka 22:14-18) Ina ua fetalai Iesu o le a anapopogi ona soo pe a maliu o ia, e na ta leʻi avatuina se faatonuga, ae e na ona ia taʻua o le mea o le a tupu. (Mataio 9:15) Na faatonuina foʻi e le Tusi Paia se Kerisiano e fia ʻai ina ia ʻai i lona fale, a o ia leʻi faamanatuina le Faamanatuga o le maliu o Iesu.—1 Korinito 11:33, 34.
a Na fetalai atu le Atua i tagata Isaraelu: “E ao ona outou faapuapuagatia iā te outou” pe “ia puapuagatia ai outou e outou” i le Aso o le Togisala. (Levitiko 16:29, 31; Tusi Paia Samoa—Lomiga 1969) O lenei faaupuga e faasino atu i le anapogi. (Isaia 58:3) O lea ua faaliliuina ai e le Contemporary English Version: “E lē tatau ona outou aai, ina ia faaalia ai lo outou salamō mai i a outou agasala.”
b Tagaʻi i le A Textual Commentary on the Greek New Testament, a Bruce M. Metzger, Third Edition, itulau 554.
c Ua faapea mai le New Catholic Encyclopedia e faatatau i le talafaasolopito o le anapogi mo aso e 40 lea e taʻua o le Litania: “I uluaʻi senituri e tolu, o le anapogi lea e sauniuni ai mo le ʻaiga o le paseka [Eseta], e leʻi atoa se vaiaso e fai ai. E masani lava ona faia i le tasi pe lua aso. . . . O le taimi muamua na taʻua ai le umi e 40 aso, o le kanona lona lima o le Fono i Naisia (325), e ui e manatu nisi tagata atamamai e lē o uiga atu i le Litania.”—Second Edition, Volume 8, itulau 468.