“Ou te taumafai e faitau le Tusi Paia, ae e faavaivaia aʻu ona o le telē tele o lenei tusi!”​—Briana, 15.

 Pe e te manatu faapena? O le a fesoasoani lenei mataupu iā te oe!

•  Aiseā e te faitauina ai le Tusi Paia?

•  E faapefea ona ou faitauina le Tusi Paia?

•  Tala a isi talavou

 Pe o le faitauina o le Tusi Paia o se mea e te lē fiafia i ai? E malamalama pe afai o le tulaga lenā. E te ono mafaufau o le Tusi Paia o se tusi e sili atu i le afe itulau, e ninii mataʻitusi ma e leai ni ata. E sili atu ai ona faigofie le matamata i le TV ma vitiō i le initaneti!

 Ia mafaufau i le mea lenei: Seʻi faapea ua e tau i se pusa oloa tautele mai anamua, pe e te lē naunau e fia iloa po o ā mea o i totonu?

 O le Tusi Paia ua pei o lenā pusa oloa tautele. O loo iai le tele o oloa tāua o le atamai lea o le a fesoasoani iā te oe e

•   Faia filifiliga lelei

•   Maua ai se faiā lelei ma ou mātua

•   Maua ai ni uō sili ona lelei

•   Onosaia ai le popole

 E faapefea i lenā tusi mai anamuā ona aogā i o tatou aso? O le māfuaaga ona “o Tusitusiga Paia uma e mai i le agaga o le Atua.” (2 Timoteo 3:16) O lona uiga o fautuaga mai i le Tusi Paia e mai i se Puna e sili ona lelei.

 O se tasi o auala o le faitau o le Tusi Paia mai i le amataga seʻia oo i le faaiʻuga. O le a e maua ai le aotelega o le feʻau mai i le Tusi Paia. E tele auala e faitau ai le Tusi Paia. Iloilo faaaʻoaʻoga nei e lua:

•    E mafai ona faitau tusi e 66 o le Tusi Paia i le faasologa o loo faatulaga mai ai, mai i le Kenese e tau i le Faaaliga.

•    E mafai ona e faitau le Tusi Paia i le faasologa o mea na tutupu. O lona uiga o le faasologa o mea na tutupu e fesootaʻi i le taimi na tutupu ai.

 Fesoasoani: O le Faaopoopoga e 23 o le Faaliliuga a le Lalolagi Fou o loo aumaia ai faasologa o mea na tutupu i le soifuaga o Iesu i le lalolagi.

 O le auala lona lua e faitau ai le Tusi Paia o le filifili o se tala e fesootaʻi i se luʻi o loo e fesagaʻia. Mo se faaaʻoaʻoga:

•   Pe e te manaʻo ia maua ni au uō maufaatuatuaina? Faitau i le tala iā Ionatana ma Tavita. (1 Samuelu, mataupu e 18-20) Mātau ni uiga o Tavita na ono tosina atu ai Ionatana iā te ia.

•   Pe e te manaʻo e faamalosia lou tomai e tetee atu ai i faaosoosoga? Faitau le tala iā Iosefa i le auala na ia tetee atu ai i faaosoosoga. (Kenese, mataupu e 39) Mātau po o fea na maua mai ai e Iosefa le malosi e tetee atu ai i faaosoosoga.

•   Pe e te fia iloa le auala e fesoasoani ai le tatalo iā te oe? Faitau i le mea na tupu iā Neemia. (Neemia, mataupu 1 ma le 2) Mātau ni faamaoniga o le malosi o le tatalo a Neemia.

 Fesoasoani: Ina ia e uaʻi lelei atu i le faitauina o le Tusi Paia, ia faamautinoa o loo e iai i se siʻomaga toʻafilemu.

 O le auala lona tolu e faitau ai le Tusi Paia o le filifili o se tala po o se salamo, faitau i ai, ona iloilo lea pe faapefea ona faatatau iā te oe. A uma ona faitau, ia fesili iā te oe lava i fesili nei:

•    Aiseā na faaaofia ai e Ieova nei manatu i le Tusi Paia?

•    O le ā ua taʻu mai ai e faatatau i uiga o Ieova po o le auala na te faia ai mea?

•   E faapefea ona ou faatatauina nei manatu i loʻu olaga?

 Fesoasoani: Faatū se sini! Tusi i lalo le aso e te manaʻo e amata ai lau faitauga Tusi Paia e faaaogā ai le Faasologa mo le Faitauga Tusi Paia o loo i la tatou upega tafaʻilagi.