PE A ʻata atu se tasi iā te oe, o le ā le auala e te tali atu ai? E mautinoa e te toe ʻata atu i ai, ma o le a e maua ai foʻi le fiafia. O le mea moni, pe a ʻataʻata mai au uō po o isi e te lē masani ai, o le a e toe ʻataʻata atu i ai ma e lelei ai faalogona. Na taʻua e se fafine e igoa iā Magdalena: “Ou te manatua pea si aʻu tane o Georg lea ua maliu, ona o si ana ʻataʻata māfana. Pe a vaai le tasi i le isi, ou te lagona ai le toʻafilemu ma le malupuipuia.”

O se ʻataʻata māfana e faaalia ai ni faalogona lelei, e pei o le olioli, fiafia, ma le faamalieina. Na taʻua i se mataupu i le Observer, o se lomiga i le Initaneti a le Association for Psychological Science: “E foliga mai o le ʻataʻata . . . o se mea na tatou fananau mai ma i tatou.” Na faamatalaina i lenā mataupu, e oo lava i pepe faatoʻā fananau mai e iloa po o fiafia pe faanoanoa foʻi se tagata i ona foliga vaaia. Na taʻua atili foʻi i le mataupu: “E lē gata e maua e tagata ni faamatalaga aogā mai le ʻata, ae e latou te faaaogā foʻi na faamatalaga e fua ai a latou gaoioiga.”

Na faia e ni tagata suʻesuʻe mai le Harvard University i le Iunaite Setete ni suʻesuʻega i tagata mamaʻi ua loa le soifua, ma le auala e latou te tali atu ai i foliga vaaia o ē tausia i latou. Na taʻua e nei tagata suʻesuʻe, pe a faaalia i foliga vaaia o ē tausia tagata matutua “le māfana, alofa, manatu mamafa, ma tigā alofa,” e lagona e tagata matutua le faamalieina ma e fesoasoani e maua ai le malosi i le tino ma le  mafaufau. Ae e tuufaafeagai faalogona e oo iā i latou, pe a faaalia i foliga o ē tausia i latou le lē manatu mamafa.

E aogā foʻi iā te oe le ʻataʻata. Ua faaalia i suʻesuʻega aogā o le ʻataʻata, lea e aofia ai faalogona mautinoa, fiafia, ma faaitiitia ai le popole. Ae pe a faaʻūʻū, e tuufaafeagai iʻuga e oo i ai.

A o soifua Magdalena lea na taʻua muamua, sa avea o ia o se Molimau a Ieova a o faagasolo le Taua Lona Lua a le Lalolagi. Sa ave faatasi o ia ma isi sui o lona aiga i le nofoaga o faasalaga i Ravensbrück i Siamani, ona o le teena o manatu a le ʻau Nasi. Na faamatalaina e Magdalena: “Na iai taimi na faasā ai e leoleo o le falepuipui ona matou talanoa atu i isi pagota. Ae e leʻi mafai ona latou suia o matou foliga fiafia. O le vaai atu i le ʻataʻata a si oʻu tinā ma loʻu uso, na atili ai ona ou mautinoa, ma faamalosia ai aʻu ina ia tumau pea.”

E te ono manatu o popolega o le olaga e faigatā ai ona e ʻata. Ae ia manatua, o mafaufauga e iai le aafiaga i ou faalogona. (Faataoto 15:15; Filipi 4:8, 9) E ui lava e faigatā, ae aiseā e lē taumafai ai e taulaʻi i mea lelei ma atiaʻe ai, i le tele e mafai ai? * Ua mafai e le toʻatele o tagata ona faia faapea ona o le faitauina o le Tusi Paia ma le tatalo. (Mataio 5:3; Filipi 4:6, 7) E tele taimi o loo taʻua ai i le Tusi Paia le “fiafia” ma le “olioli” faapea isi upu e fesootaʻi atu i ai. Aiseā e lē faitau ai ni itulau se tasi pe lua i aso taʻitasi? Atonu o le a fesoasoani iā te oe e faaauau ai pea ona e ʻataʻata.

Aua e te faatalitali seʻi ʻata atu se tasi iā te oe. Ia e tausolomua e ʻataʻata atu, ma fesoasoani ina ia maua e se isi tagata se aso fiafia. O lea, ia iloa le aogā o le ʻataʻata, o se meaalofa mai le Atua e te maua ai le fiafia faapea isi tagata.