MO ULUGALII
1: Faamaoni
LE UIGA O LE FAAMAONI
O tane ma avā e faamaoni i a latou faaipoipoga e vaai i ai o se faatasiga tumau ma e atiaʻe ai faalogona saogalemu. E mautinoa e paaga taʻitasi o le a faatāua e le isi le la mafutaga e ui lava i tulaga faigatā.
O nisi ulugalii e faaauau pea ona nonofo faatasi ona o uunaʻiga mai i tauaiga ma uō. I se faaeseesega, e sili atu le faamaoni lea e faavae mai i le alofa māfana ma le faaaloalo.
MATAUPU SILISILI FAALE-TUSI PAIA: “E lē tatau i le tane ona tuua lana avā.”—1 Korinito 7:11.
“E lē vave ona e ita pe afai e te faaalia le faamaoni i lau faaipoipoga. E vave ona e faamagalo atu ma faatoese atu. E te vaai i faafitauli o ni tulaga faigatā, ae e lē o ni tulaga e lē mafai ona foʻia lea e ono tatala ai se faaipoipoga.”—Micah.
LE TĀUA O LE FAAMAONI
Pe a tulaʻi faafitauli, e masani ona faapea ifo paaga faaipoipo e lē tumau ona faamaoni ʻAna iloa e ta te lē nonofo,’ ma taumafai e saʻili ni auala e tatala ai le faaipoipoga.
“O le toʻatele o tagata e faaipoipo ma le manatu e faapea, a lē taulau le faaipoipoga e mafai lava ona tatala. Pe a iā i laʻua lenā manatu, o lona uiga e la te leʻi faaalia le faamaoni mai lava i le amataga o le la faigāuō.”—Jean.
MEA E MAFAI ONA E FAIA
ILOILO OE LAVA
Pe a tulaʻi mai ni feeseeseaʻiga . . .
-
Pe e te lagona le salamō ona o lou faaipoipo atu i lē ua avea ma au paaga?
-
Pe e te faaāta i lou mafaufau le faaipoipo atu i se isi tagata?
-
Pe e te fai atu ni faamatalaga e pei o le, “Ua uma taʻua” po o le “O le a ou alu e suʻe se isi e alofa iā te aʻu”?
Pe afai o lau tali o le ioe i nisi o nei fesili po o fesili uma nei, o le taimi lenei e faamalosia ai lou faamaoni.
ILOILO FAATASI MA LAU PAAGA FAAIPOIPO
-
Po ua tauau ina mou atu le faamaoni i le ta faaipoipoga? Afai o lea, aiseā?
-
O ā mea e mafai ona ta faia ina ia faamalosia ai le ta faamaoni?
FESOASOANI
-
Ia fai ma tusi sau tusi i lau paaga e faailoa ai lou alofa iā te ia
-
Ia faaalia lou faamaoni e ala i le tuu o ata o lau paaga i luga o lau kesi faigaluega
-
Ia vili atu i lau paaga i aso uma a o e faigaluega pe faimalaga foʻi
MATAUPU SILISILI FAALE-TUSI PAIA: “O ē ua faatasia e le Atua, aua neʻi tuueseeseina e se tagata.”—Mataio 19:6.
