I LE 2006, na pē ai le laumei o Harriet i le 175 o ona tausaga. O se ituaiga o laumei mai Galapagos, ma sa tuu i se tasi o nofoaga sa tausia ai manu i Ausetalia. Pe a faatusatusa mai iā i tatou, e umi le taimi na ola ai lenei laumei. Peitaʻi, pe a faatusatusa i isi meaola, e lē mataʻina le umi o le ola o lenei laumei. Seʻi mātau nisi o faaaʻoaʻoga.

• Ua faapea mai tagata suʻesuʻe i Finilani, atonu e oo atu i le 200 tausaga le umi e ola ai le freshwater pearl mussel.

• O se tasi o faisua e taʻua o le ocean quahog, e masani lava ona silia ma le 100 tausaga e mafai ona ola ai, ma ua lipotia mai foʻi e mafai ona ola mo le silia ma le 400 tausaga.

• E faitau afe tausaga e mafai ona ola ai ituaiga o laau eseese e pei o le bristlecone pine, giant sequoia, ma nisi ituaiga eseese o le laau o le cypress ma le spruce.

Peitaʻi, e ui lava o tagata o le foafoaga sili lea i le lalolagi ma e latou te faia taumafaiga uma ina ia faafualoaina ai o latou soifua, ae e masani lava e na o le 80 pe 90 tausaga e mafai ona ola ai.

Ae o le ā sou manatu, pe e lava le 80 tausaga pe sili atu foʻi e tatou te ola ai? Pe e mafai ona tatou ola mo se taimi umi? O le toʻatele e manatu atonu e mafai e le poto faasaienisi ma togafitiga faafomaʻi faaonapōnei, ona faafualoaina ai lo tatou ola.

E tele itu ua saosaolaumea ai le faasaienisi i le faaleleia o le soifua mālōlōina ma togafitiga faafomaʻi i aso nei. Ua faapea mai le mekasini o le Scientific American: “Ua faaitiitia le fuainumera o tagata [i le Iunaite Setete] ua maliliu mai faamaʻi pipisi po o le faafaigatā foʻi ona faafanau o se fafine. Talu mai le 1960 e 75 pasene ua faaitiitia ai le fuainumera o pepe e feoti.” Peitaʻi, e lē mafai e taumafaiga faasaienisi ona faafualoa le ola o le tagata. O loo taʻua foʻi i se isi lomiga o le Scientific American: “E ui lava i le tele o tausaga o faia suʻesuʻega e faatatau i le soifua matua, ae e lē o maua lava se auala e foʻia ai.” Peitaʻi “ua faaalia i faamaoniga, atonu e māfua ona oo le tagata i le soifua matua, ona ua lē toe gaoioi sela o le tino e toe faafou ma faaleleia isi sela.” Ua taʻua atili i lea mekasini: “Pe afai la e māfua mai le tino matua ona o sela o le tino, e telē le talitonuga e iai le taimi o le a mafai ai ona foʻia.”

Ina ia saʻilia māfuaaga autū o le soifua matua lea e aofia ai ma faamaʻi, ua suʻesuʻeina ai e nisi o saienitisi ni togafitiga fou lea e aofia ai ma le epigenetics. O le ā le epigenetics?

O loo iai i totonu o sela taʻitasi ni faamatalaga lea e manaʻomia ina ia fausia ai nisi sela fou. O le tele o nei faamatalaga e maua i totonu o le genome, o se faaupuga e faasino atu i DNA uma o loo i totonu o se sela. Ae talu ai nei, ua oo atu le loloto o suʻesuʻega a saienitisi i nisi vaega ninii i totonu o le sela e taʻua o le epigenome. O lea, o le suʻesuʻega o nei vaega ninii faapea gaoioiga e latou te faia, e taʻua o le epigenetics.

E telē le eseesega o le DNA ma vaega ninii o loo faia aʻe ai le epigenome. E pei le DNA o ni tamaʻi maea e fili faatasi, ae o le epigenome e pei o ni vasevase o loo pipii i le DNA. I le pei o se fuataimi o se fāʻili toʻatele, e faatonutonuina e le epigenome le auala o loo avatu ai faamatalaga i le DNA. Pe afai ua iai se faalētonu i le sela o le tino, e faailoa atu e nei vasevase mea e manaʻomia e le sela. E iloagofie lenei tulaga pe a lē paleni mea taumafa, lagona le mafatia ma aveesea otaota ma vai e lē aogā mai le tino. Ua matuā suia le auala e vaai ai i le tulaga o mea ona o suʻesuʻega talu ai nei e fesootaʻi atu i le epigenome. Ua faaalia i nei suʻesuʻega, e iai le sootaga o le epigenetics ma nisi o faamaʻi faapea le soifua matua.

Ua faapea mai Nessa Carey o se tasi e suʻesuʻeina epigenetics: ʻE iai le sootaga o le epigenetics ma faamaʻi e pei o le maʻi o le mafaufau lea e taʻua o le schiszophrenia, gugu, kanesa ma maʻi faaumiumi. E saosaolaumea foʻi i le oo atu i le soifua matua.’ O lea, o suʻesuʻega e faatatau i epigenetics e ono iʻu atu ai i ni togafitiga aogā mo le faaleleia o le soifua mālōlōina, auala e puipuia ai mai faamaʻi e aofia ai le kanesa, ma umi ai ona ola. Peitaʻi, e leʻi maua lava se togafitiga faaonapōnei i le auala e foʻia ai le tino matua. Ua faapea mai Carey: ʻO loo tatou iai lava i le mea masani, o le tausami o fualaau ʻaina ma toʻaga e faamalositino ina ia tumau ai pea foliga talavou.’

Ae aiseā la ua faia ai e tagata le tele o taumafaiga ina ia umi ai ona ola? Aiseā e tatou te mananaʻo ai e ola e faavavau? I se isi faaupuga e pei ona taʻua i se nusipepa a Peretania o le The Times: “Aiseā ua matuā naunau ai tagata e saʻilia auala e sao mai ai le oti, e pei o le ola pea o le agaga pe a oti le tagata, toetū, po o le toe ola mai i se isi tino?” O le a tatou iloiloina le tali, ma iloa ai le pogai autū o le soifua matua.

Ua tele tausaga o taumafai tagata e saʻilia le tali o lenā fesili. Pe e iai se tali faamalieloto e ōgatusa lelei ma le auala na foafoaina  ai i tatou, faapea lo tatou faanaunauga ina ia ola e faavavau? E tali mai ma le mautinoa le faitau miliona o tagata i le Ioe! Aiseā? Ua latou maua tali e sili ona faamalieloto mai le Tusi Paia e faatatau i le olaga o tagata.

E pei ona taʻua i le amataga o le mataupu, o loo faamatalaina ma le manino i le Tusi Paia, e iai lava vala e ese ai tagata mai isi meaola e ui ina tutusa i nisi itu. O se faaaʻoaʻoga, ua faapea mai le Kenese 1:27 na faia e le Atua le tagata i lona faatusa. O le ā le uiga o lenei faamatalaga? Na ia tuuina iā i tatou le tomai e faaalia ai le alofa, faamasinotonu ma le atamai. Ua ia tuuina foʻi iā i tatou le faanaunauga e ola ai e faavavau, talu ai o ia o Lē soifua pea e faavavau. Ua faapea mai le Failauga 3:11: “Ua ia tuu le faavavau i o latou loto.”

Na foafoaina tagata ma le fuafuaga ina ia ola e faavavau. E faamaonia lenei mea i le maoaʻe o le tomai o le faiʻai o le tagata. Na taʻua e le The Encyclopedia of the Brain and Brain Disorders, “e leai se mea e gata mai ai” le tomai o le faiʻai e teuina le tele o faamatalaga. Aiseā la e tatou te manaʻomia ai lenei tomai pe afai e lē faaaogāina atoatoa? O le mea moni, ua faamaonia mai i le auala na foafoaina ai le tagata le uluaʻi fuafuaga a le Atua ia ola e faavavau. Aiseā la e tatou te ola matutua ai, mafatia ma feoti?

Sa lelei atoatoa tino o le uluaʻi ulugalii ma sa la maua foʻi le filifiliga saʻoloto. Peitaʻi, na  la faaaogāsesēina lenā saʻolotoga e ala i le fouvale i Lē na foafoaina i laʻua. * (Kenese 2:16, 17; 3:6-11) O lo la lē usiusitaʻi po o le agasala, na oo ai iā i laʻua lagona o le matuā nofosala ma le māsiasi. Na la melea ai foʻi le tulaga lelei atoatoa, ma oo atu ai lava i le oti. Ua faapea mai le 1 Korinito 15:56: “O le tui e iʻu i le oti o le agasala lea.”

O i latou uma e tupuga mai iā Atamu ma Eva e aafia i le tulaga lē lelei atoatoa, e aofia ai le faanaunau e faia le agasala po o le mea sesē. Ua faapea mai le Roma 5:12: “E pei ona oo mai o le agasala i le lalolagi ona o le tagata e toʻatasi, o le oti foʻi ona o le agasala, ona oo mai ai lea o le oti i tagata uma auā ua agasala uma lava.”

O le ā ua tatou aʻoaʻoina mai i nei faamatalaga? E lē mafai e le faasaienisi ona faafualoaina le soifua o le tagata. E na o le Atua e mafai ona toe faaleleia mea uma ua faaleagaina ona o le agasala. Po o le a ia faataunuuina lenā mea? O le mea mautinoa lenā o loo taʻua i le Tusi Paia.

Ua māeʻa ona faia e Ieova se gaoioiga tāua e aveesea ai le agasala ma le oti. Na ia auina mai Iesu Keriso e maliu mo i tatou. O le ā le aogā o le maliu o Iesu mo i tatou? Sa fanau mai Iesu o se tagata e lelei atoatoa, ma e na te ʻleʻi faia se agasala.’ (1 Peteru 2:22) O le māfuaaga lea ua talafeagai ai ona ia mauaina le ola e lē mafai ona oti o se tagata e lelei atoatoa. Na ia lotomalie e faataulaga lona ola ina ia totogi ai a tatou agasala. Ua moni ai upu o loo i le Mataio 20:28, na foaʻi e Iesu lona ola “e fai ma togiola e sui aʻi tagata e toʻatele.” E lē o toe umi ona tatou maua lea o aogā atoatoa o lenā togiola. O le ā le uiga o lenā manatu mo oe? Seʻi mātau mau nei:

• “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.”​—Ioane 3:16.

• “O le a faaumatia e ia le oti e faavavau, o le a soloiesea foʻi e le Alii Pule Silisili Ese o Ieova loimata mai i mata uma.”​—Isaia 25:8.

• “Ona faaumatia lea o le fili mulimuli, o le oti lea.”​—1 Korinito 15:26.

• “Ua iai i tagata le faleʻie o le Atua . . . E na te soloiesea foʻi loimata uma i o latou mata, e lē toe iai se oti.”​—Faaaliga 21:3, 4.

O lea, o le ā le umi e mafai ona e ola ai? E manino le tali mai le Tusi Paia. E mafai ona maua e tagata le faamoemoe e ola ai e faavavau, lea o le a faataunuuina pe a māeʻa ona tafiesea e le Atua mea leaga uma mai le lalolagi. (Salamo 37:28, 29) Sa manatua pea e Iesu lenā faamoemoe pupula ina ua ia fetalai atu i se tasi tamāloa sa faatautau faatasi ma ia e faapea: “O le a ta faatasi ma oe i le Parataiso.”​—Luka 23:43.

O le faanaunauga ina ia ola e faavavau o se faalogona masani ma e talafeagai, auā o le auala lenā na foafoaina ai i tatou e le Atua. O le a ia faataunuuina foʻi lenā faanaunauga. (Salamo 145:16) Peitaʻi, e iai la tatou vaegafai. E manaʻomia ona atiaʻe lo tatou faatuatua i le Atua, auā ua faapea mai le Eperu 11:6, ʻa aunoa ma le faatuatua e lē mafai ona faafiafiaina le Atua, auā o lē e faalatalata atu i le Atua, e tatau ona ia talitonu o loo soifua o ia, ma e na te tauia ē e matuā saʻili iā te ia.’ O lenā faatuatua e lē o faasino atu i le talitonu e aunoa ma ni faamaoniga mautinoa, nai lo lea, o loo faasino atu i talitonuga lea e faavae mai i le poto saʻo o loo i le Tusi Paia e faatatau i le Atua. (Eperu 11:1) Pe a e fia mauaina lenā faatuatua, faamolemole talanoa i Molimau a Ieova i la outou vaipanoa, pe tagaʻi foʻi i la matou tuatusi i le www.mr1310.com.