Aiga Kerisiano ia Mulimuli i le Faaaʻoaʻoga a Iesu!

‘Ua tuu mai e Keriso le faaaʻoaʻoga mo outou, ina ia outou mulimulituʻi i ona tulagāaao.’—1 PETE. 2:21.

1. (a) O le ā le matafaioi a le Alo o le Atua i le foafoaga? (e) O ā lagona o Iesu i tagata?

INA ua faia e le Atua le lagi ma le lalolagi, sa iai faatasi ma lona Alo ulumatua “o le tufuga.” Sa galulue faatasi lenei Alo ma lona Tamā, ina ua faatulaga ma faia le anoanoaʻi o meaola ma laau i inei i le lalolagi, faapea foʻi ma le taimi na Ia sauniunia ai le Parataiso e avea ma aiga o tagata ua faia i le faatusa o Ieova. Sa tele le alofa o le Alo o le Atua o Iesu i tagata. “O loʻu fiafia foʻi, sa i le fanau o tagata lea.”—Faata. 8:27-31; Kene. 1:26, 27.

2. (a) O ā mea na saunia e Ieova mo tagata lē lelei atoatoa? (e) O le ā se tasi o vala o le olaga ua faatonu mai e le Tusi Paia?

² Ina ua agasala le uluaʻi ulugalii, na avea ai le laveaʻiga o tagata agasala ma vaega tāua o le fuafuaga a Ieova. Na saunia e Ieova le taulaga togiola iā Keriso, ina ia mafai ai ona faia lea togiola. (Roma 5:8) E lē gata i lea, ua saunia foʻi e Ieova lana Afioga le Tusi Paia, o loo aumaia ai taʻiala i le tagata, ina ia taulau ai i le olaga e ui ina ua tuufaasolo mai le lē lelei atoatoa. (Sala. 119:105) I lana Afioga, ua saunia ai e Ieova faatonuga ina ia fesoasoani i tagata e maua ni aiga malolosi ma fiafia. Ua taʻua i le Kenese e faatatau i faaipoipoga, o le tamāloa e tatau ona “faatasi ma lana avā; ona avea ai lea o i laʻua ma tino e tasi.”—Kene. 2:24.

3. (a) O le ā na aʻoaʻo e Iesu e tusa ai ma faaipoipoga? (e) O le ā o le a tatou iloiloina i lenei mataupu?

³ A o faagasolo le faiva a Iesu i le lalolagi, sa ia faamamafa ai o le faaipoipoga o se faatulagaga e tumau. Na ia aʻoaʻo atu taʻiala, pe a faatatauina, o le a fesoasoani i le aiga e ʻalofia ai  uiga ma amioga e ono lamatia ai le faaipoipoga po o le fiafia o le aiga. (Mata. 5:27-37; 7:12) O le a iloiloina i lenei mataupu auala e fesoasoani ai aʻoaʻoga ma faaaʻoaʻoga a Iesu a o iai i le lalolagi i tane, avā, mātua, ma fanau, ina ia maua se olaga fiafia, ma faamalieina.

Le Auala e Faaaloalo ai le Tane Kerisiano i Lana Avā

4. O le ā se mea e talitutusa ai le matafaioi a Iesu ma tane Kerisiano?

⁴ Ua tofia e le Atua le tane e avea ma ulu o le aiga, e pei lava foʻi ona avea Iesu ma Ulu o le faapotopotoga. Ua taʻua e le aposetolo o Paulo e faapea: “O le tane o le ulu lea o le avā, e pei foʻi o Keriso o le ulu ia o le faapotopotoga, o ia foʻi o le faaola o lenei tino. O outou tane, ia faaauau ona alolofa atu i a outou avā, e pei o le Keriso foʻi ona alofa i le faapotopotoga, ma foaʻi atu lona ola mo le faapotopotoga.” (Efe. 5:23, 25) O le mea moni, o le auala na feutagaʻi ai Iesu ma ona soo, na faataatia ai se faatulagaga i le auala e feagai ai tane Kerisiano ma a latou avā.

5. Na faapefea ona faatino e Iesu lana pule i ona soo?

⁵ Sa “agamalu ma lotomaulalo” Iesu. (Mata. 11: 29) Sa faia foʻi e ia se gaoioiga patino pe a manaʻomia. E leʻi iai lava se taimi na tuulafoaʻiina ai e Iesu ona tiute tauave. (Mare. 6:34; Ioa. 2:14-17) Sa ia avatua ma le agalelei fautuaga i ona soo, ma toe faia foʻi pe a tatau ai. (Mata. 20:21-28; Mare. 9:33-37; Luka 22:24-27) E leʻi otegia foʻi e Iesu pe faamāsiasi i latou, e leʻi agaleaga foʻi o ia iā i latou pe manatu faapea, e lē agavaa i latou e faia mea ua ia aʻoaʻoina ai i latou e fai. Nai lo lea, na ia faalaeiauina ona soo. (Luka 10:17-21) E lētioa faaaloalogia Iesu e ona soo ona o lana tausiga alofa ma lona alofa mutimutivale iā i latou!

6. (a) O le ā e mafai ona aʻoaʻoina e tane i le auala na feagai ai Iesu ma ona soo? (e) O le ā le faalaeiauga na tuuina atu e Peteru i tane?

⁶ O le faaaʻoaʻoga a Iesu i le tulaga ulu, e aʻoaʻo mai ai e tane, e lē tatau ona latou pule sauā i a latou avā, a ia tausia i latou ma le faaaloalo ma le alofa lē manatu faapito. Sa faalaeiauina e le aposetolo o Peteru tane, ina ia faaaʻoaʻo i auala alofa a Iesu e ala i le “nonofo faatasi” ma a latou avā, ma “ia āva i fafine.” (Faitau le 1 Peteru 3:7.) E faapefea la ona faatino e se tane lana pule, ae i le taimi e tasi o loo ia tausia lana avā o se tasi e tatau i ai le faaaloalo?

7. O le ā le auala e faaalia ai e le tane le āva i lana avā? Faataʻitaʻi.

⁷ O se tasi o auala e faaalia ai e se tane le āva i lana avā, o le amanaʻia lea o ona manatu ma ona faalogona a o leʻi faia ni faaiʻuga e aafia ai le aiga. Atonu o se filifiliga e faatatau i le siitia atu i se isi mea, po o le suia o se galuega, po o mataupu i aso faisoo e pei o se mea e ō e tafafao ai po o le auala e fetuutuunaʻi ai tulaga tautupe a le aiga, ina ia mafai ai ona faafetaiaʻia le taugatā o le soifuaga. Ona o le a aafia ai  le aiga, e lelei la mo le tane ona amanaʻia manatu o lana avā, ina ia faia ai se faaiʻuga paleni, ma faigofie ai ona lagolagoina o ia e lana avā. (Faata. 15:22) O tane Kerisiano e āva i a latou avā, e latou te maua e lē gata i le alofa ae faapea foʻi ma le faaaloalo, ae sili atu ona tāua, o le faamaoniga a Ieova.—Efe. 5:28, 29.

Auala e Faaalia ai e se Avā le Faaaloalo Loloto i Lana Tane

8. Aiseā e ʻalofia ai le faaaʻoaʻoga a Eva?

⁸ Ua maua e avā Kerisiano mai iā Iesu se faaaʻoaʻoga atoatoa mo le gauaʻi i le pule. Maʻeu se eseesega o lona manatu i le pule ma uiga na faaalia e le uluaʻi fafine! Na lē taulau ona faataatia e Eva se faaaʻoaʻoga lelei mo avā ina ia mulimuli ai. Na iā te ia se ulu na tofia mai e le Atua, o lē na faaauala mai ai e Ieova faatonuga. Ae peitaʻi, e leʻi faaaloalo Eva i lenei faatulagaga. E na te leʻi taliaina faatonuga na fai atu e Atamu iā te ia. (Kene. 2:16, 17; 3:3; 1 Kori. 11:3) O le mea moni na faasesēina Eva; peitaʻi sa tatau ona ia faailoa atu i lana tane, pe e tatau ona talitonu i le leo lea na fai atu iā te ia “ua silafia e le Atua.” Nai lo lea, sa manatu o ia e na te taʻitaʻia lana tane.—Kene. 3:5, 6; 1 Timo. 2:14.

9. O le ā se faaaʻoaʻoga o le gauaʻi na faataatia e Iesu?

⁹ Ae na ese mai ai Iesu, sa ia faataatia se faaaʻoaʻoga atoatoa i le gauaʻi atu i lona Ulu. E atagia mai i ona uiga ma lona soifuaga lona lē “manatu . . . e faoa le pule, ina ia tutusa ai o ia ma le Atua.” O le mea lea, “na tuua [ai] e ia o mea uma lava ma fai o ia ma pologa.” (Fili. 2:5-7) I le avea o ia ma Tupu i aso nei, o loo faaauau pea ona iā te ia na uiga. E gauaʻi atu ma le lotomaulalo i lona Tamā i mea uma lava, ma lagolagoina Lona tulaga ulu.—Mata. 20:23; Ioa. 5:30; 1 Kori. 15:28.

10. E faapefea ona lagolagoina e se avā le tulaga ulu o lana tane?

¹⁰ E ao i se avā Kerisiano ona faaaʻoaʻo iā Iesu i le lagolagoina o le tulaga ulu o lana tane. (Faitau le 1 Peteru 2:21; 3:1, 2.) Seʻi manatu i se avanoa e mafai ai ona ia faia faapea. Ua talosaga mai lana tama tama mo se faatagaga i se mea o loo ia manaʻo e fia alu i ai, lea e manaʻomia ai le faatagaga a mātua. Ona e leʻi talanoaina muamua lea mataupu e ona mātua, e tatau la i le tinā ona ia fesili atu faapea, “Na e faanoi i lou tamā?” Pe afai e leʻi faia e lana tama, e ao ona la talanoaina le mataupu ma lana tane a o leʻi faia se faaiʻuga. Ae peitaʻi, e tatau i se avā Kerisiano ona taumafai e ʻalofia le feteenaʻi ma lana tane ma luʻia lana pule i luma o le fanau. Afai e lē ioe i manatu o lana tane, e lelei ona ia talanoa atu e tau lava o i laʻua.—Efe. 6:4.

Faaaʻoaʻoga a Iesu mo Mātua

11. O le ā le faaaʻoaʻoga na faataatia e Iesu mo mātua?

¹¹ E ui lava e leʻi faaipoipo Iesu pe faia sana  fanau, ae o ia o se faaaʻoaʻoga sili mo mātua Kerisiano. E faapefea? Sa ia aʻoaʻo ma le alofa ma le onosai ona soo, e lē gata i upu a o faaaʻoaʻoga. Na ia faailoa iā i latou le auala e fai ai le tofiga na ia tuuina atu iā i latou. (Luka 8: 1) O manatu ma le auala na feagai ai Iesu ma ona soo, na aʻoaʻoina ai i latou i le auala e feagai ai le tasi ma le isi.—Faitau le Ioane 13:14-17.

12, 13. O le ā e manaʻomia ona faia e mātua pe a la mananaʻo e tausia aʻe ni fanau e matataʻu i le Atua?

¹² E masani ona faaaʻoaʻo le fanau i gaoioiga lelei ma lē lelei a o latou mātua. O lea la, e ao i mātua ona fesili ifo iā i latou lava: ‘O le ā le feʻau o loo avatu i le fanau e ala i a la faaaʻoaʻoga i le tele o le taimi e matamata ai i le Televise ma faafiafiaga, ae i le isi itu, o le ā le tele o le taimi e faaalu i suʻesuʻega faale-Tusi Paia ma talaʻiga? O ā moni mea o loo faamuamua e lo taʻua aiga? Po o ta faia se faaaʻoaʻoga lelei e ala i le faaautū o o ta olaga ma filifiliga i le tapuaʻiga moni?’ E tatau ona mauaa le tulafono a le Atua i loto o mātua pe a la fia mananaʻo e tausia aʻe ni fanau e matataʻu i le Atua.—Teu. 6:6.

¹³ Pe afai e taumafai mātua e faatatauina mataupu silisili o le Tusi Paia i mataupu fai i aso faisoo, o le a mātauina foʻi la e fanau. O le a uigā foʻi la upu ma aʻoaʻoga a mātua. Ae peitaʻi, pe afai e iloa e fanau e lē o mulimuli mātua i faatulagaga o fai atu i le fanau, e latou te ono fai ai se faaiʻuga faapea, e lē tāua ma e lē aogā mataupu silisili o le Tusi Paia. O le iʻuga, o le a oo ina lolo atu fanau i omiga a le lalolagi.

14, 15. O ā uiga e tatau ona totō e mātua i le fanau, ma o le ā se tasi o auala e mafai ona la faia ai faapea?

¹⁴ Ua iloa e mātua Kerisiano, o le tausia o se tamaitiiti e tele mea e aofia ai nai lo o le saunia o mea faaletino e manaʻomia. O lea la, o se faiga e matuā lē atamai lava le aʻoaʻo o se tamaitiiti e tuliloa sini, e na o ona lelei faaletino lava e maua ai. (Fai. 7:12) Na aʻoaʻo e Iesu ona soo e faatāua mea faaleagaga ma faamuamua le saʻilia o le Malo o le Atua. (Mata. 6:33) O lea la, o le faaaʻoaʻo o mātua Kerisiano iā Iesu, e tatau ai foʻi ona taumafai e atiaʻe i a latou fanau le faanaunauga ia faamuamua sini faaleagaga.

¹⁵ O se tasi o auala e mafai ai e mātua ona faia lenei mea, o le faaaogā lelei lea o avanoa e auaufaatasi ai le fanau, ma ē o loo auai i le auaunaga faataimi atoa. Seʻi manatu i le tele o faalaeiauga e mafai ona maua e talavou pe a faamasani i paeonia, ma le ovasia o le matagaluega ma lana avā. O misionare e asiasi mai, tagata Peteli, ma i latou o loo galulue i faugafale faavaomalo, e mafai ona latou faamatala mai ma le mautinoa e faatatau i mea na latou olioli ai i le auaunaga iā Ieova. E mautinoa lava e tele tala a i latou e faamatala e tusa ma mea na tutupu i le auaunaga. O ā latou faaaʻoaʻoga o le auauna atu ma le lē manatu faapito, e ono fesoasoani i lau fanau e fai ni faaiʻuga atamai, faatutū ni sini aogā, ma maua ai ni aʻoaʻoga e talafeagai ina ia  mafai ai ona tausia i latou i le auaunaga faataimi atoa.

Fanau—O le ā e Fesoasoani iā te Oe e Mulimuli ai i Faaaʻoaʻoga a Iesu?

16. Na faapefea ona faaalia le āva o Iesu i ona mātua faalelalolagi, ma lona Tamā i le lagi?

¹⁶ Le fanau e, ua saunia foʻi e Iesu se faaaʻoaʻoga e aupito sili ona lelei mo oe. Sa tuuina atu Iesu ina ia tausia e Iosefa ma Maria, ma sa ia usiusitaʻi iā i laʻua. (Faitau le Luka 2:51.) Na ia iloa faapea, e ui i lo la lē lelei atoatoa, ae na tuu atu e le Atua iā i laʻua le tiute tauave o le tausia o ia. O le iloaina o lenā tulaga, sa tatau ai ona āva Iesu iā i laʻua. (Teu. 5:16; Mata. 15:4) A o tuputupu aʻe Iesu ma ua matua, sa ia faia pea mea e finagalo malie i ai lona Tamā o i le lagi. O lona uiga ia teena e ia tofotofoga. (Mata. 4:1-10) O outou le fanau talavou, e iai taimi e tofotofoina ai outou ia lē usiusitaʻi i o outou mātua. O lea, o le ā e fesoasoani iā te outou e mulimuli ai i le faaaʻoaʻoga a Iesu?

17, 18. (a) O ā ituaiga o omiga o loo fesagaʻi ma talavou i aʻoga? (e) O le manatuaina o le ā, e mafai ona fesoasoani i talavou e tetee atu ai i tofotofoga?

¹⁷ O le toʻatele lava o au uō i le aʻoga e foliga mai e itiiti, pe e lē manatu mamafa foʻi i mataupu silisili o le Tusi Paia. Atonu e latou te taumafai e uunaʻia oe e faia ni mea sesē, ma e ula atu iā te oe pe a e musu e fai. Pe na taufaifai atu au uō i le aʻoga ona o lou musu e auai faatasi ma i latou i le faia o na mea? O lea la, o le ā lou uiga faaalia? Ua e iloa afai e te lolo atu iā i latou, o le a lē fiafia ou mātua faapea ma Ieova iā te oe. O fea o le a e iʻu i ai pe a e lolo atu i au uō i le aʻoga? Atonu ua iai ni ou sini patino, e pei o le avea ma paeonia po o se auauna o le faiva, auauna i se oganuu o loo manaʻomia tele ai tagata talaʻi o le Malo, po o le avea foʻi ma tagata Peteli. Po o le a fesoasoani le auaufaatasi ma au uō i le aʻoga e ausia ai ou sini?

¹⁸ Outou talavou i le faapotopotoga Kerisiano, pe na iai se taimi na tofotofoina ai lou faatuatua? Pe na faapefea ona e tali atu? Seʻi mafaufau iā Iesu o loo avea ma ou faaaʻoaʻo. E leʻi lolo atu i faaosoosoga ae na ia tu mausalī i le mea na ia iloa e saʻo. O le manatuaina o lenā mea, o le a e lototele ai e taʻu atu i au uō i le aʻoga, e te lē fia auai i le faia o mea e te iloa e sesē. I le pei o Iesu, ia faaauau ona uaʻi atu i le faamoemoe o le auauna atu ma le fiafia, ma le usiusitaʻi iā Ieova i le olaga atoa.—Epe. 12:2.

Le Ala e Maua ai se Aiga Fiafia

19. O le ā le ala o le olaga e maua ai le fiafia moni?

¹⁹ E finagalo Ieova le Atua ma Iesu Keriso ia maua e tagata le mea e sili ona lelei. E ui lava i lo tatou tulaga lē lelei atoatoa, ae e mafai lava ona tatou maua le fiafia. (Isa. 48:17, 18; Mata. 5:3) Na aʻoaʻoina e Iesu upu moni faaletapuaʻiga lea e faavae ai le fiafia o tagata, ae e lē na o le pau lenā o le mea na ia taʻu atu i ona soo. Na ia aʻoaʻoina foʻi le auala e sili ona lelei e ola ai. E lē gata i lea, na ia faataatia se faaaʻoaʻoga e sili ona lelei o se olaga paleni, ma uiga talafeagai. O i tatou uma lava, po o le ā lava la tatou matafaioi i le aiga, e tatou te maua aogā pe a mulimuli i lana faaaʻoaʻoga. O lea la, o outou tane, avā, mātua, ma le fanau, ia outou mulimuli i le faaaʻoaʻoga a Iesu! O le taliaina o aʻoaʻoga a Iesu ma faataʻitaʻi i lana faaaʻoaʻoga, o le auala moni lea e maua ai se olaga faaleaiga e fiafia ma faamalieina ai.

E Faapefea Ona E Tali?

• E faapefea ona faatino e tane le pule ua tuuina i ai e le Atua?

• E faapefea ona mulimuli se avā i le faaaʻoaʻoga a Iesu?

• O le ā e mafai ona aʻoaʻo e mātua mai le auala na feagai ai Iesu ma ona soo?

• O le ā e aʻoaʻo e talavou mai i le faaaʻoaʻoga a Iesu?

[Fesili mo le Suʻesuʻega]

[Ata i le itulau 8]

A o leʻi faia se filifiliga e aafia ai le aiga, o le ā o le a faia e se tane alofa?

[Ata i le itulau 9]

O le ā le tulaga e ono lagolagoina ai e le avā le tulaga ulu o le tane?

[Ata i le itulau 10]

Le fanau e, ia faaaʻoaʻo i masaniga lelei a o outou mātua