Ia Mafuta Atu i le Atua

“Sii Aʻe ia Lau Tama”

2 TUPU 4:8-37

O LE maliu o se tamaitiiti, o se tasi lea o tigā ogaoga ua oo i le tagata. O loo iā Ieova le mana e aveesea ai ia lagona faavauvau. E tatou te mautinoa auā sa Ia tuuina i ni tane i taimi o le Tusi Paia le mana e toe faatutū ai ē ua maliliu. O loo faamauina i le 2 Tupu 4:8-37 se tala o se tamaitiiti sa toe faatūina e Elisaia.

Na tupu lenei mea i le aai o Sunema. Na faaalia pea e se fafine e pā e lē fanau, ma lana tane le agalelei iā Elisaia, i le fafagaina o ia ma faanofo i lo la fale. I se tasi aso, na faapea atu ai le perofeta i le fafine i lona agaga faafetai: “O le a e sapasapaia se tama i le taimi faapenei i le tausaga fou.” E leʻi manatu fafine o le a tupu lea mea, ae na taunuu le upu a Elisaia, ma na maua le tama tama a le fafine. O le mea e faanoanoa ai ona e leʻi umi lona fiafia. I ni nai tausaga mulimuli ane, a o iai le tama i le fanua, na tigā ai lona ulu ma na ave ai loa i le fale, ma oti ai a o ‘⁠sii i vae o lona tinā.’ (Fuaiupu 16, 19, 20) Ua sii e le tinā mafatia le tino maliu o si ana tama, ma faataoto lemū i luga o le sofa sa masani ona moe ai le perofeta.

Na ioe le toʻalua o le fafine e alu, ma na malaga atu loa le fafine i le mauga o Karamelu, e tusa o le 20 maila [30 km] le mamao, e saʻili Elisaia. Ina ua feiloaʻi ma Elisaia, e leʻi tagi auēuē o ia pe faaali lona faanoanoa i se isi auala. Po o le māfuaaga ea ona na faalogo o ia na toe faaolaina e Elia, lē na muamua iā Elisaia, le tama a se fafine ua oti lana tane? (1 Tupu 17:17-23) Pe na talitonu le fafine Sunema e mafai foʻi e Elisaia ona toe faatūina si ana tama? Po o le ā lava se manatu na iā te ia, ae e leʻi manaʻo e foʻi i lona aiga seʻi vaganā ua toe foʻi ma Elisaia.

Ina ua la toe foʻi atu i Sunema, ona ulu atu lea o Elisaia i lona potu, ma iloa atu ai le tino maliu o loo “faataoto i luga o lona moega.” (Fuaiupu 32) Ua faalatalata atu le perofeta iā Ieova ma tatalo faatauanau. A o faō Elisaia i luga o le tama, na ‘⁠faasolo ina māfanafana le tino o le tama.’ Ua amata ona tātā lona fatu! Na valaau atu Elisaia i le fafine ma fai atu upu na matuā suia ai le mafatia o le fafine i le olioli: “Sii aʻe ia lau tama.”—Fuaiupu 34, 36.

Ua avea le tala i le tama a le fafine Sunema ma puna o le faamoemoe ma faamāfanafanaga. E silafia lelei e Ieova lagona faavauvau o mātua, ona ua motusia e le oti le mafutaga ma fanau. E lē gata i lea, o lona finagalo, ia toe faaleleia lea tulaga. (Iopu 14:14, 15) O le toetū sa faia e Elisaia ma isi i le taimi o le Tusi Paia, o ata na o mea o le a faia e Ieova i se tulaga aoao tetele i lana lalolagi fou amiotonu. *

E lē aveesea atoatoa e le folafolaga a le Tusi Paia o le toetū, le tigā o le toesea o sē e pele. Na taʻua e se Kerisiano faamaoni ua maliu si ona alo e toʻatasi e faapea: “E lē mafai ona teʻa lelei loʻu mafatia seʻiloga ua ma toe feiloaʻi ma si oʻu atalii.” Seʻi manatu la i ai, o le a mafai ona tou toe feiloaʻi ma ē e pele iā te oe ua maliliu. O le a faaitiitia lou mafatia pe a e manatua, o le a tou toe feiloaʻi ma i latou. Pe e lē uunaʻia ai ea oe e aʻoaʻoina atili e uiga i le Atua, o lē e ala mai ai lenei faamoemoe matagofie?

[Faaopoopoga i lalo]