Aʻoaʻoga a le Tusi Paia

Pe e Mafai Ona E Ola e Faavavau?

O loo talanoaina i lenei mataupu fesili atonu e te fia malamalama i ai, ma mau o le Tusi Paia e maua ai tali. E fiafia Molimau a Ieova e tou te talanoa i tali o na fesili.

1. Aiseā e foliga ai e puupuu le olaga?

E puupuu le olaga o le tagata pe a faatusatusa i nisi o laumei e ola mo le 150 tausaga, ma nisi o laau e ola mo le 3,000 tausaga. Peitaʻi e sili atu ona uigā o tatou olaga nai lo o laumei ma laau, ona ua faia e Ieova le tagata ma le tomai e fiafia ai i musika, taaloga, meaʻai, aʻoaʻoina o mea, femalagaaʻi, ma le faafeiloaʻia o tagata. Na tuu e le Atua i le loto o le tagata le faanaunauga ia ola e faavavau.—Faitau le Failauga 3:11.

2. Pe e mafai ona tatou ola e faavavau?

E soifua e faavavau Ieova ma e lē mafai ona maliu. O ia o le Puna o le ola, o lea, e mafai ona ia foaʻi mai le ola e faavavau. (Salamo 36:9; Sapakuka 1:12) E lē gata i lea, na ia folafola mai e maua e i latou e usiusitaʻi iā te ia le ola e faavavau, ma o le a ia toe faafoʻisia le tagata i le olaga talavou.—Faitau le Iopu 33:24, 25; Isaia 25:8; 33:24.

E mafai ona tatou talitonu i folafolaga a le Atua e faatatau i le ola e faavavau i se olaga lelei atoatoa, ona o galuega mamana a Iesu. Na faamālōlō e Iesu faamaʻi eseese, ma toe faatutūina mai i latou na maliliu.—Faitau le Luka 7:11-15, 18, 19, 22.

 3. O afea o le a taunuu ai?

E finagalo le Atua ia tatou ola e faavavau i se lalolagi parataiso saogalemu, e aunoa ma ni faafitauli ma faiga sauā. (Salamo 37:9, 29; Isaia 65:21, 22) Pe a toe faafoʻisia le lalolagi e avea ma Parataiso, ona faatutū mai lea o le faitau miliona o tagata ua maliliu. Pe a toe tutū mai i latou nei ma filifili e tapuaʻi ma usiusitaʻi i le Atua, ona latou maua lea o le ola e faavavau.—Faitau le Luka 23:42, 43; Ioane 5:28, 29.

4. E faapefea ona maua le ola e faavavau?

E na o le Atua e maua ai le ola e faavavau, o lea e tatau ai ona tatou iloa lelei o ia ina ia mafuta vavalalata atu ai iā te ia. O loo faatusa i le Tusi Paia le aʻoaʻoina o le poto i le Atua, i le taumafaina o se meaʻai. (Mataio 4:4) E tatou te fiafia e aai, ae ina ia maua le meaʻai, e manaʻomia ai ni taumafaiga. I se tulaga talitutusa, o le aʻoaʻoina o mataupu faaleagaga e manaʻomia ai foʻi ni taumafaiga. E leai se mea e sili atu nai lo o le mafuta vavalalata i le Atua, ma maua le ola e faavavau.—Faitau le Luka 13:23, 24; Ioane 6:27; 17:3.

Mo nisi faamatalaga, tagaʻi i le mataupu e 3 o lenei tusi, O ā Aʻoaʻoga Moni a le Tusi Paia?, lomia e Molimau a Ieova.

[Ata i le itulau 17]

E maua aogā mai i taumafaiga ina ia iloa lelei le Atua