O le tagata lotomaulalo e lē iai ni uiga faamaualuga, fia sili, pe e vaai maulalo i isi. O so o se tasi e lotomaulalo e tatau ona ia iloa o ia o se tagata agasala ma e gata mai lona malosi.

E leʻi faamaualuga Mose ona o le pule sa iā te ia. E masani lava ona faamaualuga se tasi pe a ia maua sina tulaga pule. Na taʻua e le tusitala o Robert G. Ingersoll e faapea, e iloagofie pe e lotomaulalo se tasi pe leai, i le auala e na te faaaogā ai le tulaga pule o loo iā te ia. Na faataatia e Mose se faaaʻoaʻoga mataʻina e tusa ai o lenei tulaga. E faapefea?

Na maua e Mose le tulaga pule mai iā Ieova e taʻitaʻia ai le nuu o Isaraelu, ae e leʻi faamaualuga ai o ia. Seʻi mātau le auala lotomaulalo sa ia taulimaina ai se fesili faigatā e tusa ai o le aiā e maua ai e se fafine se tofi. (Numera 27:1-11) E maʻaleʻale tele lenā fesili, auā o le iʻuga o lenā mataupu o le a aafia ai foʻi fafine o isi tupulaga o loo sosoo ane.

O le ā le tali atu a Mose? Pe sa manatu ua agavaa o ia e faia se faaiʻuga i le mataupu ona o ia o le taʻitaʻi o Isaraelu? Po o le a faalagolago i lona lava atamai, ma lona tomai mai i le tele o tausaga?

Atonu o le mea lenā e ono fai e se tagata faamaualuga, ae e leʻi faapena Mose. O loo taʻua i le Tusi Paia: ʻOna tuuina atu lea e Mose o le mataupu i luma o Ieova.’ (Numera 27:5) Seʻi mātau, ua silia ma le 40 tausaga o taʻitaʻia e Mose le nuu o Isaraelu, ae o loo faalagolago pea o ia iā Ieova. O i inei e iloa ai lona lotomaulalo.

E leʻi manatu Mose e na o ia e tatau ona iai le pule. Sa fiafia o ia ina ua tofia e Ieova isi tagata Isaraelu e avea ma perofeta. (Numera 11:24-29) Sa ia talia ma le lotomaulalo le fautuaga a le tamā o lana avā ina ia filifilia nisi tane e faia isi ona tiute. (Esoto 18:13-24) A o faasolo ina matua Mose, sa ia talosaga iā Ieova e tofia se isi e suitulaga iā te ia, e ui o loo malosi pea o ia. Ina ua tofia e Ieova Iosua, sa lagolago ma le lotoatoa e Mose lenei talavou, ma apoapoaʻi atu i tagata e mulimuli i le taʻitaʻiga a Iosua pe a ō atu i le Nuu Folafolaina. (Numera 27:15-18; Teuteronome 31:3-6; 34:7) O le mea moni, na manatu Mose o se faaeaga le taʻitaʻia o tagata Isaraelu, ae e na te leʻi faamuamua lona tulaga pule nai lo o le lelei o isi.

E lē tatau ona faamaualuluga ona o o tatou tomai, po ona ua tatou maua se tulaga pule. Manatua: Ina ia faia le auaunaga iā Ieova i le auala silisili, e tāua atu le lotomaulalo nai lo o o tatou tomai. (1 Samuelu 15:17) Pe a faaalia le lotomaulalo moni, o le a tatou taumafai malosi la e faatatau le fautuaga atamai a le Tusi Paia e faapea: “Ia e faatuatua iā Ieova ma lou lotoatoa, ae aua le faalagolago i lou lava malamalama.”​—Faataoto 3:5, 6.

O le faaaʻoaʻoga a Mose ua aʻoaʻoina ai foʻi i tatou e aua le soona faatāuaina pe faamaualuga i o tatou tulaga.

Pe e aogā le faaaʻoaʻo i le lotomaulalo o Mose? Ioe! Pe a tatou atiaʻe le lotomaulalo moni, o le a lelei la tatou faiā ma isi, ma o le a pele i tatou iā i latou. Ae sili atu i lenā, o le a pele i tatou iā Ieova, o lē e faaalia foʻi lenei uiga matagofie. (Salamo 18:35) Ua faapea mai le Tusi Paia: “E tetee le Atua i ē e faamaualuluga, ae e foaʻi mai e ia le agalelei faifua i ē e lotomaulalo.” (1 Peteru 5:5) Maʻeu se māfuaaga mataʻina e tatau ai ona tatou faaaʻoaʻo i le lotomaulalo o Mose!