17 MAJ 2023
GJERMANI
Përurohet pllaka përkujtimore në nder të Dëshmitarëve të Jehovait në Flosenbërg
Më 22 prill 2023, Qendra Memoriale e Kampit të Përqendrimit të Flosenbërgut në Bavari, Gjermani, përuroi një pllakë në kujtim të Dëshmitarëve të Jehovait që vdiqën ndërsa ishin të burgosur aty. Flosenbërgu është qendra memoriale e nëntë që i nderon Dëshmitarët e Jehovait me një pllakë përkujtimore.
Në Flosenbërg dhe në kampet përreth kanë qenë të burgosur mbi 100 Dëshmitarë të Jehovait. Ceremoninë e ndoqën disa prej familjarëve të tyre. Një vëlla, i pranishëm në event, komentoi se «vendi të ngjallte trishtim për shkak të gjërave të llahtarshme që kishin ndodhur aty. Megjithatë, falë meditimit për besnikërinë e vëllezërve, ky event u shndërrua në një rast të gëzuar e dinjitoz».
Profesor Jërg Skribelaiti, drejtor i Qendrës Memoriale të Kampit të Përqendrimit të Flosenbërgut, shpjegoi se «Dëshmitarët e Jehovait ishin komuniteti i parë fetar që u ndaluan pasi [nazistët] erdhën në pushtet në mars 1933». Në një fjalim të shkurtër, ai tha se «besimi u dha forcë [Dëshmitarëve] në kampe përqendrimi . . . jo vetëm të mbijetonin, por edhe të inkurajonin të tjerët që nuk kishin të njëjtin besim».
Edhe vëlla Volfram Slupina, zëdhënës i Dëshmitarëve të Jehovait në Gjermani, tha dy fjalë për të pranishmit. Ai u shpreh: «Për të gjithë ne është mjaft e rëndësishme që historia e vuajtjeve të Dëshmitarëve të Jehovait të mos mbulohet nga pluhuri i harresës; është historia e njerëzve që ishin gati të dëgjonin zërin e ndërgjegjes në kohët më të errëta të Gjermanisë.»
Jemi të sigurt se motrat e vëllezërit tanë besnikë që u përndoqën, e madje vdiqën në kampet e përqendrimit, janë në ‘librin e kujtimit’ të Perëndisë.—Malakia 3:16.