TRA PRENSPARI SANI
Yesus Krestes—A Mesias di Gado ben pramisi
FU DI Yehovah Gado ben wani yepi wi fu kon sabi suma na a Mesias, meki a sorgu taki furu fu den profeiti fu Bijbel, skrifi finifini fu sani di ben o pasa na a pisi ten di a Mesias ben o gebore, fu a diniwroko fu en, èn fu a dede fu a Frulusuman disi. Ala den Bijbel profeititori disi kon tru na ini Yesus Krestes. A moi fu si fa den profeititori disi e taki soifri san ben o pasa, èn fa den e sori finifini fa sani ben o waka. Leki eksempre, meki wi go luku wan tu profeititori di ben e taki fu sani di pasa na a pisi ten di a Mesias gebore, èn fu sani di abi fu du nanga en pikin-nengreten.
A profeiti Yesaya ben taki na fesi dati a Mesias ben o de wan bakapikin fu Kownu David (Yesaya 9:7). Yesus ben gebore trutru leki wan bakapikin fu David.—Mateyus 1:1, 6-17.
Mika, wan tra profeiti fu Gado, ben taki na fesi dati a pikin disi ben o tron wan tiriman te fu kaba, èn taki a ben o gebore na ini "Betlehem Efrata” (Mika 5:2). Na a ten di Yesus ben gebore, tu foto na ini Israel ben nen Betlehem. Wan fu den foto disi ben de krosibei fu Nasaret na a noordsei fu a kondre, èn a trawan ben de krosibei fu Yerusalem na ini Yuda. A Betlehem di ben de krosibei fu Yerusalem, na a wan di sma fu fositen ben sabi leki Efrata. Yesus ben gebore na ini a foto dati, soifri soleki fa a profeititori ben taki!—Mateyus 2:1.
Wan tra Bijbel profeititori ben taki na fesi dati Gado ben o kari en Manpikin "komopo na Egepte”. Di Yesus ben de wan yongu pikin, den ben tyari en go na Egepte. Baka di Herodes dede, den tyari Yesus kon baka fu Egepte, èn na so fasi a profeititori ben kon tru.—Hosea 11:1; Mateyus 2:15.
Na ini a faki "Profeititori di abi fu du nanga a Mesias”, na ondro na edeprakseri di nen "Profeititori”, yu abi bijbeltekst di e fruteri wan tu finifini tori fu a Mesias. Grantangi, teki den bijbeltekst disi gersi nanga den wan di skrifi na ondro na edeprakseri "Kontru”. Te yu e du dati, dan disi sa meki yu kisi moro bribi taki Gado Wortu de tru.
Te yu e ondrosuku den bijbeltekst disi, dan yu musu hori na prakseri taki den bijbeltekst di e taki fu den profeititori, ben skrifi hondrohondro yari bifo Yesus gebore. Yesus ben taki: "Ala san a wet fu Moses, nanga den leri fu den Profeiti, nanga den Psalm skrifi fu mi, musu kon tru” (Lukas 24:44). Soleki fa yu kan leisi na ini yu eigi Bijbel, dan ala den tori disi kon tru finifini!
| SANI DI BEN PASA | PROFEITITORI | KONTRU |
|---|---|---|
| A ben de fu a lo fu Yuda | Genesis 49:10 | Lukas 3:23-33 |
| Wan nyunwenke ben meki en | Yesaya 7:14 | Mateyus 1:18-25 |
| A ben de wan bakapikin fu Kownu David | Yesaya 9:7 | Mateyus 1:1, 6-17 |
| Yehovah ben kari a Mesias En Manpikin | Psalm 2:7 | Mateyus 3:17 |
| Sma no ben poti bribi na ini en | Yesaya 53:1 | Yohanes 12:37, 38 |
| A kon na ini Yerusalem na tapu wan buriki | Sakaria 9:9 | Mateyus 21:1-9 |
| Wan krosibei mati ben tori en | Psalm 41:9 | Yohanes 13:18, 21-30 |
| Den tori en gi 30 pisi solfru moni Sakaria | Sakaria 11:12 | Mateyus 26:14-16 |
| A ben tan tiri aladi den kragi en | Yesaya 53:7 | Mateyus 27:11-14 |
| Den trowe lòt fu kisi den krosi fu en | Psalm 22:18 | Mateyus 27:35 |
| Den spotu en aladi a ben e anga na a postu | Psalm 22:7, 8 | Mateyus 27:39-43 |
| Nowan fu den bonyo fu en ben broko | Psalm 34:20 | Yohanes 19:33, 36 |
| Den beri en pe guduwan e beri | Yesaya 53:9 | Mateyus 27:57-60 |
| A ben kisi wan opobaka fosi en skin pori | Psalm 16:10 | Tori fu den apostel 2:24, 27 |
| A kisi wan hei posisi na a reti-anu fu Gado | Psalm 110:1 | Tori fu den apostel 7:56 |
