TORI FU A KAFTI
Te wan sma di yu lobi dede
’No krei, mi gudu. Na Gado wani en so.’
Disi na san wan sma taki safri na ini a yesi fu wan uma di nen Bebe. A ben de na a beri fu en papa di lasi libi di wan ongoloku pasa.
Bebe ben lobi en papa trutru. Wan mati fu a famiri taigi en a sani disi fu di a ben wani trowstu en. Ma a sani di a taki hati Bebe srefisrefi. Ala yuru a ben e taigi ensrefi: „A dede fu en no tyari nowan bun.” Di Bebe fruteri a sani disi na ini wan buku furu yari baka dati, a ben de krin taki a ben e sari ete fu a dede fu en papa.
Soleki fa Bebe srefi ondrofeni, dede kan meki wan sma sari wan heri pisi ten, spesrutu efu a dede sma ben de wan lobiwan fu en. Wi kan frustan fu san ede Bijbel e taki dati dede na „a lasti feanti” (1 Korentesma 15:26). Wi no man tapu dede. Te a kon, a e bruya wi heri libi. Nofo tron a e kon sondro taki wi fruwakti en èn a e puru den lobiwan fu wi na wi sei. Nowan fu wi man wai pasi gi dede nanga den bakapisi fu en. Sobun, wi kan frustan taki a kan hebi srefisrefi gi wan sma te wan lobiwan fu en dede.
Kande yu aksi yusrefi: ’O langa a e teki fosi wan sma kaba sari? San wan sma kan du te a e sari? Fa mi kan trowstu sma te wan lobiwan fu den dede? Howpu de gi den lobiwan fu wi di dede?’