Mi gebore na ini Ciudad Mante, wan moi foto na ini a distrikt Tamaulipas na Meksikow. Furu fu den sma na ini a foto abi switifasi èn den lobi prati sani nanga sma. Ma a sari taki a libi drape no ben makriki fu di difrenti grupu ogriman de di e du furu ogri.

Mi papa nanga mama ben abi fo boi èn mi na a di fu tu boi. Mi papa nanga mama dopu mi na ini Lomsu Kerki èn bakaten mi ben e singi na ini a kerki koor. Mi ben wani du san Gado wani fu di mi ben frede srefisrefi taki a ben o krutu mi èn taki mi ben o bron fu têgo na ini hel.

Di mi ben abi feifi yari, mi papa gowe libi wi. A sani dati hati mi èn mi ben misi en srefisrefi. Mi no ben man frustan fu san ede a gowe libi wi aladi wi ben lobi en so te. Mi mama ben musu wroko te lati fu sorgu gi den fo boi fu en.

Fu di mi mama no ben de na oso furu, meki mi no ben e go na skoro. Mi ben e go waka nanga den moro bigi pikin. Den leri mi fu taki dotitaki, fu smoko, fu fufuru èn fu feti naki kofu. Fu di mi ben lobi prei basi gi trawan, meki mi leri boks, mi leri worstel, mi leri karate èn mi leri gebroiki gon. Mi tron wan yonguman di ben lobi du ogri. Mi nanga den mati fu mi ben gwenti feti nanga tra grupu èn wi ben e sutu makandra nanga gon. Wan tu leisi mi ben didon brudu na strati. Den ben libi mi fu dede. Mi mama ben e sari srefisrefi te a ben e feni mi so èn a ben musu opo mi tyari go na ati-oso esi-esi!

Di mi ben abi 16 yari, Jorge, wan mati fu mi di mi sabi sensi di mi ben pikin, kon na wi oso. A taigi wi taki en na wan Yehovah Kotoigi èn taki a ben wani fruteri wi wan prenspari boskopu. A bigin taki fu a bribi fu en èn a gebroiki Bijbel tu. Noiti mi ben leisi Bijbel. Mi ben breiti fu kon sabi Gado nen èn san a o du gi libisma. Jorge aksi wi efu wi wani studeri Bijbel. Na so wi bigin studeri.

Mi ben breiti srefisrefi di mi kon sabi taki Bijbel no e leri taki libisma e bron na ini hel (Psalm 146:4; Preikiman 9:5.) Di mi leri a sani dati, mi no ben  si Gado moro leki wan Gado di de nomonomo fu strafu sma. Ma mi bigin si en leki wan lobi-ati Papa di wani taki a e go bun nanga den pikin fu en.

O moro mi ben e studeri Bijbel, o moro mi kon si taki mi ben musu kenki den fasi fu mi. Mi ben musu kon abi sakafasi èn mi no ben musu du ogri moro. A rai na ini 1 Korentesma 15:33 yepi mi. Drape skrifi: „Takru kompe e pori bun gwenti.” Mi kon frustan taki efu mi ben wani kenki den fasi fu mi, dan mi no ben musu moksi moro nanga sma di ben leri mi fu du sani di no bun. Dati meki mi suku tra mati na ini a Kresten gemeente. Te den sma disi abi kesekese nanga trawan, dan den no e naki kofu èn den no e feti. Ma den e du san Bijbel e leri.

Wan tra pisi fu Bijbel di yepi mi, na Romesma 12:17-19. Drape skrifi: „Te wan sma du unu wan ogri, un no musu du a sma dati ogri baka. . . . Du ala san yu man fu libi bun nanga ala sma. . . . No pai wan sma gi na ogri di a du nanga yu, . . . bika Gado Buku taki: ’Na mi o puru atibron na den tapu. Mi o pai den baka gi den ogri di den du, na so Yehovah taki.’” Mi bigin bribi taki Yehovah o tyari wan kaba kon na kruktudu na wan fasi di a feni bun èn na wan ten di a feni bun. Safrisafri mi leri fu no du ogri moro.

Noiti mi o frigiti san pasa wan neti di mi ben e go na oso. Wan tu yonguwan fu wan tra grupu bigin feti nanga mi. A fesiman fu a grupu naki mi na mi baka, dan a taki: „Feti noh!” Na a momenti dati mi begi Yehovah esi-esi. Mi aksi en fu yepi mi fu no naki baka. Aladi a ben muilek gi mi fu hori misrefi, mi ben man lon gowe fu drape. A tra dei mi miti a fesiman fu a grupu. A ben de en wawan. Mi ati bron so te, taki mi ben wani go feti nanga en, ma mi begi Yehovah baka na ini mi ati fu yepi mi fu hori misrefi. Mi skreki di a yonguman waka kon na mi tapu èn a taigi mi: „Sorry yèrè gi a sani di pasa esdeneti. Eigenlijk mi wani kon de leki yu. Mi wani studeri Bijbel.” Mi breiti srefisrefi taki mi ben man hori misrefi a neti na fesi! A sani disi meki taki a bigin studeri Bijbel tu.

A sari taki den tra sma fu mi famiri no studeri Bijbel go doro. Ma mi bosroiti taki mi ben o studeri go doro èn mi no ben o meki nowan sma tapu mi. Mi ben sabi taki te mi ben o moksi doronomo nanga a pipel fu Gado, dan dati ben o yepi mi fu no sari moro èn mi ben o feni a famiri di mi ben abi fanowdu. Mi tan go na fesi èn na ini 1991 mi teki dopu, dan mi tron wan Yehovah Kotoigi.

Fosi, mi ben abi bita-ati, mi ben lobi prei basi gi sma èn mi ben e du ogri. Ma Gado Wortu kenki mi heri libi. Now mi e preiki a Bijbel boskopu fu freide gi iniwan sma di wani arki. Na ini den 23 yari di pasa, mi preiki a Bijbel boskopu sowan 70 yuru ibri mun.

Wan pisi ten mi ben e wroko na a bijkantoro fu Yehovah Kotoigi na ini Meksikow. Di mi ben de drape, mi miti Claudia, wan yongu Kresten uma di ben de fayafaya. Wi trow na ini 1999. Mi de nanga tangi taki Yehovah gi mi so wan bun wefi!

Mi nanga Claudia ben e dini na ini wan Dofusma-tongo gemeente na ini Meksikow. Wi ben e yepi den dofusma fu leri sabi Yehovah. Bakaten wi kisi a kari fu go dini na Belise fu preiki a Bijbel boskopu gi den sma drape. Dyaso wi no abi so furu sani, ma toku wi de koloku. Wi no ben o wani kenki a libi disi gi nowan tra sani!

Baka wan pisi ten mi mama bigin studeri Bijbel baka èn a teki dopu. Mi bigi brada, en wefi nanga den pikin fu den tron Yehovah Kotoigi tu. Wan tu fu den mati di mi fruteri a Kownukondre boskopu e dini Yehovah tu.

A sari taki wan tu famiriman fu mi dede fu di den tan du ogri. Efu mi ben go doro nanga a libi dati, dan kande mi srefi no ben o de na libi now. Mi de nanga tangi taki Yehovah yepi mi fu kon sabi en nanga den anbegiman fu en di abi pasensi nanga switifasi. Den leri mi fu du san Bijbel e leri.