1. Aladi Yehovah na a Moro Heiwan, toku san a meki tra sma du?

YEHOVAH na a Moro Heiwan. Na en meki ala sani èn a abi ala koni nanga ala makti. Yob ben kon frustan a sani disi. Yehovah ben poti wan tu aksi gi en, di ben abi fu du nanga den sani di a meki. Ne Yob piki: „Mi kon si taki yu man du ala sani, èn nowan sma man tapu yu fu du san yu abi na prakseri” (Yob 42:2). Yehovah man du iniwan sani di a wani sondro taki wan sma yepi en. Toku fu di a abi lobi, meki sensi a bigin a gi tra sma a grani fu wroko makandra nanga en fu du a wani fu en.

2. Sortu prenspari wroko Gado meki Yesus du?

² A fosi sani di Gado meki, ben de en wan-enkri Manpikin. Baka dati Yehovah meki en Manpikin Yesus wroko makandra nanga en fu meki ala tra sani na hemel èn na grontapu (Yoh. 1:1-3, 18). Na apostel Paulus ben taki disi fu Yesus: „En na a sma di Gado gebroiki fu meki ala tra sani na hemel èn na grontapu,  sobun, den sani di wi man si nanga den sani di wi no man si, awinsi dati na kownumakti, a makti fu heihei sma, tirimakti, noso tra makti. Gado gebroiki en fu meki ala tra sani èn ala sani de gi en” (Kol. 1:15-17). Sobun, Yehovah gi en Manpikin grani fu di a gebroiki en fu meki ala tra sani èn fu di a fruteri trawan sortu prenspari frantwortu en Manpikin abi.

3. Sortu grani Yehovah ben gi Adam èn fu san ede?

³ Yehovah gi libisma a grani tu fu wroko makandra nanga en. Fu eksempre, a ben meki Adam gi den meti nen (Gen. 2:19, 20). Prakseri fa Adam ben e prisiri fu du a wroko disi! A ben luku den meti finifini, a ben e luku fa den de, dan a ben e gi ibriwan fu den wan nen di fiti. Na Yehovah meki ala den meti, sobun, en srefi ben kan gi den wan nen. Ma fu di a abi lobi, meki a gi Adam a wroko fu du dati. Gado ben gi Adam a wroko tu fu meki a paradijs kon moro bigi (Gen. 1:27, 28). Ma a sari taki te fu kaba Adam no ben wani wroko makandra moro nanga Gado. A sani disi tyari takru bakapisi kon gi en èn gi ala den bakapikin fu en.​—Gen. 3:17-19, 23.

4. Fa Gado meki tra sma wroko makandra nanga en fu du san a abi na prakseri?

⁴ Bakaten Gado gi tra libisma a grani fu wroko makandra nanga en fu du san a abi na prakseri. Fu eksempre, Noa bow na ark fu kibri ensrefi nanga en osofamiri te a Frudu ben o kon. Moses frulusu a pipel Israel fu Egepte. Yosua tyari a pipel dati go na ini a Pramisi Kondre. Salomo bow a tempel na ini Yerusalem. Maria tron a mama fu Yesus. Ala den reti-ati futuboi disi, nanga furu trawan, wroko makandra nanga Yehovah fu du san a abi na prakseri.

5. Sortu wroko wi mag du èn a de so taki Yehovah ben musu fu gi wi a grani disi? (Luku a prenki na a bigin fu na artikel.)

⁵ Na ini a ten disi, Yehovah wani taki wi du ala san wi man fu horibaka gi a Kownukondre. Furu fasi de fa wi kan du dati. A no ala Kresten man du a srefi sani na ini a diniwroko. Ma den alamala man preiki a bun nyunsu fu a Kownukondre. A no de fu taki dati Yehovah no ben abi fu gi wi a grani disi. En srefi ben kan taki langalanga fu hemel nanga libisma na grontapu. Yesus ben taki srefi dati Yehovah ben kan meki den ston taki fu a Kownu fu Gado Kownukondre (Luk. 19:37-40). Toku Yehovah e gi wi na okasi fu „wroko makandra nanga” en (1 Kor. 3:9). Na apostel Paulus ben skrifi: „Leki sma di e wroko makandra nanga en, wi e begi unu fu tan hori na prakseri fu san ede Gado sori unu bun-ati” (2 Kor. 6:1). Fu wroko makandra nanga Gado na wan grani di wi no abi reti na tapu èn a sani disi e gi wi bigi prisiri. Meki wi go luku fu san ede.

6. Fa a fosi Manpikin fu Gado ben feni en fu wroko makandra nanga en Papa?

⁶ Sensi na a bigin, futuboi fu Yehovah e prisiri fu wroko makandra nanga Gado. Fosi a Manpikin fu Gado kon na grontapu, a taki: „Na Yehovah srefi meki mi. . . . Mi ben e wroko nanga en sei na sei leki wan tumusi bun wrokoman. Ala dei mi ben e gi en bigi prisiri. Ala ten mi ben breiti, fu di mi ben de nanga en” (Odo 8:22, 30). Yesus ben prisiri fu wroko makandra nanga en Papa. Den sani di a ben meki, ben e gi en prisiri èn a ben breiti tu fu di a ben sabi taki Yehovah ben prisiri fu wroko makandra nanga en. Ma fa a de nanga wi?

7. Fu san ede a preikiwroko e gi wi prisiri?

 ⁷ Yesus ben taki dati wan sma e prisiri te a e gi sani, ma a e prisiri tu te a e kisi sani (Tori 20:35). Wi ben prisiri di wi leri sabi den tru tori fu Gado, ma wi e prisiri tu fu fruteri trawan den tori disi. Te wi e preiki a boskopu fu Bijbel gi sma di e angri fu kon sabi moro, dan wi e si taki den e prisiri te den bigin kon sabi Gado moro bun èn te den kon frustan den tru tori na ini Gado Wortu. Wi ati e furu nanga prisiri te wi e si taki den sma disi e kenki a denki fu den nanga a fasi fa den e libi. Wi e si taki a wroko di wi abi fu preiki a bun nyunsu de prenspari, fu di a e meki taki sma di kon bun baka nanga Gado e kisi na okasi fu libi fu têgo (2 Kor. 5:20). Sortu tra wroko e gi wi so furu prisiri?

8. San son sma di e wroko makandra nanga Yehovah, e taki?

⁸ Boiti taki wi e prisiri te sma e arki a boskopu di wi e preiki, wi e prisiri tu fu di wi sabi taki Yehovah breiti nanga wi èn taki a e warderi a muiti di wi e meki fu dini en. (Leisi 1 Korentesma 15:58.) Marco, di e libi na Italiakondre, e taki: „Mi e prisiri fu di mi sabi taki na Yehovah mi e gi a moro bun sani di mi abi. Sma ben o frigiti esi-esi san yu e du gi den, ma Yehovah no de so.” Franco, di e dini tu na Italiakondre, e taki: „Nanga yepi fu a Wortu fu en èn nanga den sani di a seti fu gi wi leri, Yehovah e sori wi ibri dei taki a lobi wi èn taki ala san wi e du gi en prenspari, srefi efu wi denki taki den muiti di wi e meki na fu soso. Na den sani disi e meki taki mi e prisiri fu wroko makandra nanga Gado èn den e meki mi firi koloku.”

9. Sortu matifasi Yehovah nanga Yesus abi èn fu san ede?

⁹ Te wi e wroko makandra nanga sma di wi lobi, dan wi e kon moro krosibei na den. Wi e kon sabi den fasi fu den nanga den sani di den man du. Boiti dati, wi e kon sabi tu san den wani du na ini den libi èn fa den wani du en. Yesus wroko makandra nanga Yehovah milyunmilyun yari. Den ben kon lobi makandra so te taki noti no man pori a matifasi di den abi nanga makandra. Dati meki Yesus taki: „Mi nanga a Tata na wán” (Yoh. 10:30). Yesus nanga Yehovah de wán fu di den man wroko heri bun nanga makandra.

10. Fu san ede a preikiwroko e meki wi kon moro krosibei na Gado èn na tra sma?

¹⁰ Na ini wan begi, Yesus ben aksi Yehovah fu kibri den disipel fu en. Fu san ede? A taki: „So taki den kan de wán neleki fa wi de wán” (Yoh. 17:11). Te wi e du san Gado wani èn wi e preiki a bun nyunsu, dan wi e kon sabi den moi fasi fu Gado. Wi e kon si fu san ede a prenspari fu frutrow na en tapu èn fu teki den rai di a e gi. Na so wan fasi wi e kon krosibei na Gado èn en srefi e kon krosibei na  wi tu. (Leisi Yakobus 4:8.) Boiti dati, wi o kon krosibei na den brada nanga sisa fu wi, fu di wi nanga den e miti den srefi problema, wi e ondrofeni den srefi moi sani èn wi alamala e meki muiti fu du a wani fu Gado. Iya, wi e wroko makandra, wi e prisiri makandra èn wi e horidoro makandra. Octavia, wan sisa di e libi na Ingrisikondre, e taki: „Te mi e wroko makandra nanga Yehovah, mi e kon moro krosibei na den brada nanga sisa fu mi, fu di den alamala e meki muiti fu du a wani fu Gado èn fu teki a tiri fu en.” A no so yu e firi tu? Yu no e kon moro krosibei na trawan te yu e si taki den e meki muiti fu du san Yehovah feni bun?

11. Fu san ede wi o kon moro krosibei na Yehovah èn na wi brada nanga sisa na ini a nyun grontapu?

¹¹ Wi abi lobi gi Gado èn gi tra sma. Ma a lobi disi o kon moro tranga na ini a nyun grontapu. Prakseri a wroko di wi o du na ini a ten di e kon! Wi o abi fu gi den sma di kisi wan opobaka wan switikon èn wi o abi fu leri den san na a wani fu Yehovah. Wi o wroko fu meki a grontapu tron wan paradijs. Den sani disi na bigi wroko di wi o du te Yesus o tiri grontapu. Ma a o gi wi furu prisiri fu wroko makandra na ini wánfasi teleki nowan libisma abi sondu moro. Ala libisma o kon moro krosibei na makandra èn na a Gado fu den di o „gi ala libisani san den e angri fu kisi”.​—Ps. 145:16.

12. Fa a preikiwroko e yepi wi fu abi wan tranga bribi?

¹² Wi no musu meki nowan sani pori a matifasi di wi abi nanga Yehovah. Fu di wi e libi na ini wan grontapu di Satan Didibri e tiri èn fu di wi na sondusma, meki a kan pasa makriki taki wi e bigin denki leki den sma fu a grontapu disi èn wi e tyari wisrefi leki den. A denki fu a grontapu disi de leki wan liba di e lon tranga èn di e hari wi go na wan presi pe wi no wani. Efu wi no wani meki a watra tyari wi gowe, dan wi musu swen bun tranga. Na so a de tu taki wi musu meki tranga muiti efu wi no wani taki a grontapu fu Satan abi krakti tapu wi denki. Te wi e preiki gi trawan, dan dati e yepi wi fu poti prakseri na sani di bun gi wi èn di e tranga a bribi fu wi, na presi fu poti prakseri na sani di kan swaki a bribi fu wi (Fil. 4:8). A preikiwroko e tranga a bribi fu wi, fu di a e yepi wi fu hori den wet di wi lobi Gado gi wi èn fu no frigiti den pramisi fu en. A e yepi wi tu fu tan gebroiki den sani di Gado gi wi fu feti.​—Leisi Efeisesma 6:14-17.

13. Fa wan Kotoigi na Australia e denki fu a preikiwroko?

¹³ Te wi abi furu fu du na ini a preikiwroko èn na ini na anbegi fu wi, dan wi no o abi ten fu broko wi ede nanga den problema fu wi. A sani disi na wan yepi gi wi. Joel, di e libi na Australia, e taki: „A preikiwroko e yepi mi fu no frigiti na ini sortu ten wi e libi. A e yepi mi fu si sortu problema e miti sma èn fu frustan taki na fu di mi e du san Bijbel e leri mi, meki sani e waka bun gi mi. A e yepi mi tu fu tan abi sakafasi èn fu tan frutrow na tapu Yehovah nanga den brada nanga sisa fu mi.

14. Te wi e tan du a preikiwroko, dan fa dati e sori taki Gado yeye de nanga wi?

¹⁴ A preikiwroko e meki wi si krin tu taki a yeye fu Gado de nanga wi. Denki a tori disi: Kon meki wi taki dati yu kisi a wroko fu prati brede gi sma na ini yu birti. Yu no o kisi moni gi a wroko disi èn sma no o pai yu gi den kostu di yu e meki.  San moro ogri, na taki son sma no wani a brede èn trawan e teige yu srefi fu di yu e prati en. O langa yu ben o tan du a wroko disi? Kande yu no ben o du en langa, fu di den sma meki yu lasi-ati. Ma nanga wi a de tra fasi. Aladi sma e kosi wi, den e spotu wi èn den no de nanga tangi, toku furu fu wi tan du a preikiwroko omeni yari langa. A sani disi no e sori krin taki Gado yeye de nanga wi?

15. San a preikiwroko abi fu du nanga den sani di Gado abi na prakseri gi libisma?

¹⁵ Te wi e du a preikiwroko, dan wi e wroko makandra nanga Gado fu du san a abi na prakseri gi libisma. Fa so? We, Gado ben wani taki libisma libi tapu grontapu sondro fu dede. Aladi Adam sondu, toku Yehovah no kenki en prakseri (Yes. 55:11). Na presi fu dati, a seti sani fu frulusu libisma fu sondu nanga dede. Dati meki Yesus kon na grontapu fu dede gi ala sma di e gi yesi na Gado. Ma fu man gi yesi na Gado, den sma disi musu kon sabi fosi san Gado e aksi fu den. Dati meki Yesus ben leri sma a wani fu Gado èn a taigi den disipel fu en fu du a srefi sani. Te wi e yepi sma fu leri sabi Gado, dan wi e wroko makandra nanga en fu meki sma kon fri fu sondu nanga dede.

16. Te wi e du a preikiwroko, dan san dati abi fu du nanga a moro bigi komando di Gado gi wi?

¹⁶ Te wi e yepi sma fu feni a pasi di e tyari sma go na têgo libi, dan wi e sori lobi gi den èn gi Yehovah. „A wani taki ala sortu sma musu kisi frulusu èn taki den musu kon sabi a tru leri finifini” (1 Tim. 2:4). Di wan man aksi Yesus san na a moro bigi komando di Gado ben gi Israel, dan Yesus piki: „’Yu musu lobi Yehovah yu Gado nanga yu heri ati, nanga yu heri libi, èn nanga yu heri frustan.’ Disi na a fosi èn a moro bigi komando. A di fu tu komando de leki a wan disi èn dati na: ’Yu musu lobi tra sma leki fa yu lobi yusrefi’” (Mat. 22:37-39). Te wi e du a preikiwroko, dan wi e gi yesi na den tu komando disi.​—Leisi Tori fu den apostel 10:42.

17. Fa yu e si a grani di yu abi fu preiki a bun nyunsu?

¹⁷ Yehovah e blesi wi trutru! A gi wi wan wroko di e gi prisiri, di e meki wi kon krosibei na en nanga tra sma èn di e yepi wi fu abi wan tranga bribi. A wroko disi e gi wi na okasi tu fu sori taki wi lobi Gado nanga tra sma. A situwâsi fu Gado pipel na heri grontapu e difrenti. Ma awinsi wi yongu noso owru, awinsi wi gudu noso pôti, awinsi wi tranga noso swaki, wi alamala e meki muiti fu fruteri tra sma den sani di wi e bribi. A no de fu taki dati yu e agri nanga Chantel di e libi na Fransikondre. A e taki: „A moro makti Gado fu hemel nanga grontapu, a sma di meki ala sani, a koloku Gado, taigi mi: ’Go! Taki! Fruteri sma fu mi. Du dati nanga yu heri ati. Mi gi yu mi krakti, mi Wortu, den engel nanga brada nanga sisa. Mi gi yu leri nanga rai na a yoisti ten.’ Na wan bigi grani trutru fu du san Yehovah e aksi fu wi èn fu wroko makandra nanga wi Gado!”