Michelle: Fa a e go mevrouw? Mi na Michelle.

Sofia: Mi na Sofia.

Michelle: Mi breiti fu miti yu Sofia. Tide wi e prati a traktaat disi gi den sma na ini a birti. A traktaat nen, Yu wani sabi a piki tapu den aksi disi? A wan disi na fu yu.

Sofia: Na kerkitori yu e kon taki?

Michelle: Iya. A abi siksi aksi na tapu a fosi bladzijde. Tapu sortuwan fu den aksi disi yu ben wani wan—

Sofia: No. Yu no abi fu taki go doro. Na lasi yu o lasi yu ten.

Michelle: Fu san ede yu e taki dati?

Sofia: Mi e aksi misrefi efu wan Gado de trutru.

Michelle: Mi breiti taki yu fruteri mi krin fa yu e denki. Ma na ala ten yu ben e denki so?

Sofia: No. Fosi mi ben e go na kerki. Ma na wan langa pisi ten mi no e go moro.

Michelle: Oh, ma mi kan aksi yu wan sani? Fu san ede yu no e bribi na ini Gado moro?

Sofia: We, 17 yari pasa wagi naki mi mama.

Michelle: Hmmmm! A kisi hebi mankeri?

Sofia: Iya. Sensi a ten dati a no man waka moro.

Michelle: A sari yèrè. Mi kan frustan taki a e hati yu taki a sani disi miti yu mama.

Sofia: A e hati mi iya. Efu wan Gado de trutru, dan fa a ben kan meki a sani dati pasa? Fu san ede Gado e meki sma pina so?

Michelle: Mi e frustan fa yu e firi èn a no fowtu fu poti den sortu aksi disi. Furu sma e aksi densrefi a sani disi te ogri miti den. Fu taki en leti, Bijbel e taki fu wan tu mansma nanga umasma di ben aksi densrefi a sani disi tu, aladi den ben e bribi na ini Gado.

Sofia: Oh, mi no ben sabi.

Michelle: Iya. Mi kan sori yu wan fu den eksempre na ini Bijbel?

Sofia: A bun.

Michelle: Luku san a profeiti Habakuk ben aksi Gado. A skrifi dyaso na ini Habakuk kapitel 1, vers 2 nanga 3. A e taki: „O Yehovah, o langa mi musu bari, fosi yu arki mi? O langa mi musu bari fu yu yepi mi? O langa yu o meki sma du ogri nanga mi, fosi yu frulusu mi? Fu san ede yu e meki mi si takrudu?” Yu no feni taki den aksi disi gersi den wan di yu poti didyonsro?

Sofia: Iya.

Michelle: Di Habakuk poti den aksi disi, Gado ati no bron na en tapu. A no taigi Habakuk tu taki a ben musu abi moro bribi.

Sofia: Hmm, mi no ben si en so.

Michelle: Bijbel e taki dati Gado e si fa wi e pina èn taki a e broko en ede nanga wi.

Sofia: Ooh?

Michelle: Luku san Eksodes 3:7 e taki. Yu wani leisi en?

Sofia: A bun. A taki: „Yehovah taki tu: ’Mi si fa mi pipel e pina na ini Egepte, èn mi yere fa den e  bari e suku yepi, fu di sma e dwengi den fu wroko. Iya, mi sabi heri bun fa den e pina.’”

Michelle: Grantangi. Te yu e luku a tekst disi, dan yu denki taki Gado ben e si fa a pipel fu en ben e pina?

Sofia: Ai.

Michelle: Luku a lasti pisi fu a tekst baka. Gado taki: „Mi sabi heri bun fa den e pina.” Disi e sori taki a no e si nomo san e pasa, ma a e firi gi wi. Sobun, yu denki taki Gado no e broko en ede nanga wi?

Sofia: No, a e broko en ede nanga wi.

Michelle: Iya. Gado no e si nomo san e pasa nanga wi, ma a e sari tu te wi abi problema.

Sofia: Iya, mi e frustan.

Michelle: Meki wi luku wan tra tori di e sori fa a pipel fu Gado ben e pina. A skrifi na ini Yesaya 63:9. A fosi pisi fu a tekst e taki: „Te den ben de na ini banawtu, ensrefi ben de na ini banawtu tu.” Te yu e luku a tekst disi, dan yu denki a ben e hati Gado di a pipel fu en ben e pina?

Sofia: San mi si a ben hati en iya.

Michelle: Soleki fa yu srefi si Sofia, dan Gado e broko en ede nanga wi trutru. A no lobi en kwetikweti te wi e pina. Te ogri e miti wi, dan a e hati en trutru.

Michelle: Mi kan sori yu ete wan sani fosi mi gowe?

Sofia: Ok.

Michelle: Luku san Yeremia 10:12 e taki fu a krakti di Gado abi. Yu wani leisi en grantangi?

Sofia: A bun. A taki: „En na a Mekiman di gebroiki en krakti fu meki grontapu. En na a sma di gebroiki en koni fu seti grontapu steifi na en presi. En na a sma di gebroiki en sabi fu bradi hemel leki wan krosi.”

Michelle: Grantangi. Meki wi luku a tekst disi moro fini. Gado ben musu fu abi furu krakti fu man meki ala sani na hemel nanga grontapu, a no so?

Sofia: Iya, seiker.

Michelle: Moi. Efu Gado abi a krakti fu meki ala sani na wi lontu, dan yu no denki taki a man sorgu taki ala sani e go bun nanga wi?

Sofia: Ai.

Michelle: Prakseri a mama fu yu. Fu san ede a e hati yu fu si fa a e pina?

Sofia: Na mi mama. Mi lobi en.

Michelle: Efu yu ben abi a krakti fu meki a kon betre tide, yu ben o du dati?

Sofia: Seiker mi ben o du en.

Michelle: Prakseri a tori disi pikinso. Bijbel e leri wi taki Gado e si fa wi e pina, a e firi gi wi, èn a abi so furu krakti. Gado kan tyari wan kaba kon na ogri wantewante. Sobun, na hori a e hori ensrefi fu no du dati.

Sofia: Noiti mi si en so.

Michelle: Wan sani musu fu de fu san ede a no tyari wan kaba kon ete na den problema fu wi. *

Sofia: Hmm, a sa de so iya.

Michelle: A no a telefon fu yu mi e yere?

Sofia: Oh, ai!

Michelle: Mi kan kon wan tra leisi fu taki fu a tori disi?

Sofia: Iya, dati ben o bun. *