TORI FU A KAFTI
Yu musu begi?
Kande yu e aksi yusrefi: ’Efu Gado sabi ala sani, sosrefi san mi e prakseri nanga san mi abi fanowdu, dan fu san ede mi musu begi?’ Dati na wan bun aksi. Yesus no ben taki dati Gado „sabi san unu abi fanowdu, srefi bifo unu aksi en”? (Mateyus 6:8) Kownu David fu owruten Israel ben frustan a sani dati, èn a skrifi: „Yehovah, fosi mi opo mi mofo, Yu sabi kaba san mi wani taki” (Psalm 139:4). Dan fu san ede wi musu begi Gado? Fu man piki na aksi dati, meki wi go luku san Bijbel e taki fu begi. *
„Kon krosibei na Gado èn a o kon krosibei na unu.”
BEGI E YEPI WI FU TRON MORO BUN MATI FU GADO
Aladi Bijbel e taki dati Yehovah * Gado sabi ala sani, a e sori tu taki a no e suku nomo fu kon sabi sani fu den anbegiman fu en (Psalm 139:6; Romesma 11:33). Aladi Yehovah man memre ala sani, toku a no de leki wan computer di man sabi sani fu sma, ma di no man firi gi den. Fu taki en leti, Gado wani sabi san wi e prakseri na ini wi ati fu di a wani taki wi tron mati fu en (Psalm 139:23, 24; Yakobus 4:8). Dati meki Yesus gi den bakaman fu en a deki-ati fu begi, awansi en Tata sabi san wi abi fanowdu trutru (Mateyus 6:6-8). O moro wi e fruteri Yehovah san de na tapu wi ati, o moro wi o kon krosibei na en.
Son leisi, a kan muilek gi wi fu sabi san wi musu aksi Gado. Awansi dati de so, toku Gado man sabi fa wi e firi na ini wi ati, èn fu di a sabi soifri san na a situwâsi fu wi, meki a kan gi wi san wi abi fanowdu (Romesma 8:26, 27; Efeisesma 3:20). Te wi kon frustan fa Gado yepi wi na ini wi libi, awansi wi no ben man si dati wantewante, dan wi o kon abi moro lobi gi en.
GADO E PIKI ALA BEGI?
Bijbel e sori wi krin taki na Almakti Gado e piki den begi fu den reti-ati futuboi fu en. Ma Bijbel e sori wi tu fu san ede Gado no e arki son begi. Fu eksempre, na a ten di ogridu ben lai na ini owruten Israel, Gado meki a profeiti Yesaya taigi a pipel: „Awinsi unu e begi mi furu tron, toku mi no o arki. Unu kiri furu sma” (Yesaya 1:15). A de krin taki den sma di no abi lespeki gi den wèt fu Gado, èn den wan di no e begi en nanga wan krin ati, no kan fruwakti taki Gado o arki den begi fu den.
Ma Bijbel e taki tu: „Awansi san wi e aksi en, a e yere wi, solanga a e kruderi nanga a wani fu en” (1 Yohanes 5:14). Ma dati wani taki dati Gado o gi den anbegiman fu en iniwan sani di den e aksi en? A no abi fu de so. Luku a tori fu na apostel Paulus, di begi Gado dri leisi fu puru ’wan maka na ini en skin’ (2 Korentesma 12:7, 8). A kan taki Paulus ben e siki na en ai. A ben musu fu de wan hebi gi en! Paulus ben kisi a krakti fu dresi sma èn a ben wiki wan dede sma srefi. Ma toku a ben musu libi nanga a siki fu en (Tori fu den apostel 19:11, 12; 20:9, 10). Aladi Gado no piki den begi fu en na a fasi fa a ben wani dati, toku Paulus ben de nanga tangi gi a yepi di Gado ben gi en.
„Wi sabi taki awansi san wi e aksi en, a e yere wi, solanga a e kruderi nanga a wani fu en.”
A tru taki son sma na ini Bijbel kisi piki tapu den begi fu den fu di Gado du wan wondru (2 Kownu 20:1-7). Ma a no ala ten dati ben e pasa. Son anbegiman ben e lasi-ati te a ben gersi leki Gado no ben piki den begi fu den. Kownu David ben aksi: „Ke Yehovah, o langa yu o tan frigiti mi? Fu ala ten?” (Psalm 13:1) Ma di a reti-ati man dati kon frustan omeni leisi Yehovah ben yepi en, dan a kon abi moro frutrow na ini Gado. Na ini a srefi begi dati, David ben taki: „Mi sabi taki yu o sori mi bun-ati” (Psalm 13:5). Neleki David, a de fanowdu son leisi taki anbegiman fu Gado e horidoro na ini begi teleki den kon frustan fa Gado piki den begi fu den.
A FASI FA GADO E PIKI BEGI
Gado e gi wi san wi abi fanowdu trutru.
Son leisi papa nanga mama abi bun reide fu no gi den pikin fu den san den wani noso o ten den wani dati. Kande Gado no e gi wi tu san wi wani, noso o ten wi wani dati. Ma wi kan de seiker taki neleki wan lobi-ati papa, wi Mekiman sa gi wi san wi abi fanowdu na a yoisti ten èn na a yoisti fasi.
Son leisi te wi e suku yepi na Gado, dan wi e feni a yepi dati na ini Bijbel
Son leisi wi no e si a piki wantewante.
Ma fa a de te wi e begi fu wan problema di wi abi wan heri pisi ten kaba? Wi musu denki taki na fu di Yehovah no lusu a problema na wan wondru fasi, dan dati wani taki dati a no piki a begi fu wi? A ben o bun fu luku efu Gado yepi wi na tra fasi di wi no ben si wantewante. Fu eksempre, kande wan bun mati fu wi e du san a man fu yepi wi na a momenti di wi ben abi yepi fanowdu (Odo 17:17). Yu denki taki na Yehovah naki na ati fu a mati dati fu yepi yu? Boiti dati, son leisi te wi e suku yepi na Gado, dan wi e feni a yepi dati na ini Bijbel. Bijbel abi bun rai di e sori wi san wi kan du te wi abi problema.
Gado kan meki wan bun mati yepi wi na a yoisti ten
Son leisi Gado no e lusu wan problema di wi abi, ma nofo tron a e gi wi a krakti di wi abi fanowdu fu man libi nanga a problema (2 Korentesma 4:7). Fu eksempre, di Yesus ben begi en Tata fu puru en na ini wan tesi, fu di a ben frede taki a sani dati ben o gi Gado porinen, dan Yehovah seni wan engel fu kon tranga en Manpikin (Lukas 22:42, 43). Na so a de tu taki Gado kan meki wan bun mati gi wi deki-ati na a ten di wi abi dati tranga fanowdu (Odo 12:25). Na ini den sortu situwâsi disi wi no man si wantewante taki na Gado piki a begi fu wi. Dati meki wi musu de na ai fu kon si fa Gado e piki den begi fu wi.
Son leisi wi musu wakti tapu Gado.
Bijbel e taki dati na Almakti Gado e du bun gi sakafasi sma „na a reti ten” (1 Petrus 5:6). Sobun, efu a gersi leki a e teki langa fosi Yehovah piki den begi fu wi, dan wi no musu denki taki a no e broko en ede nanga wi. Fu di wi lobi-ati Mekiman abi koni pasa marki, meki wi no abi fu tweifri taki a e luku san na a moro bun fasi fa a kan piki den begi fu wi.
„Sobun, saka unsrefi na ondro a bigi èn makti Gado, so taki a kan hei unu na a reti ten.”
Luku na eksempre disi: Kon meki wi taki dati yu abi wan yongu boi di e aksi yu wan baisigri. Yu o gi en wantewante san a aksi yu? Efu yu feni taki a yongu tumusi fu rèi wan baisigri, dan yu kan bosroiti fu no bai a baisigri ete. Ma kande baka wan pisi ten, yu e bosroiti fu gi en san a ben aksi yu te yu feni taki a fiti now fu du dati. Na so a de tu taki te wi e tan begi Gado, dan a kan gi wi „san [wi] ati wani”, te a feni taki dati na a yoisti ten.
ABI A FRUTROW TAKI YEHOVAH E ARKI
Bijbel e gi tru Kresten deki-ati fu tan abi a frutrow taki begi e yepi. Ma kande son sma e taki: ’A sani dati makriki fu taki.’ Te wan problema e moro wi wan pisi ten kaba, noso efu wan ogri e miti wi, dan a kan muilek gi wi fu wakti tapu Gado. A ben o bun fu memre taki Yesus ben leri wi fu tan begi doronomo.
Yesus ben fruteri na agersitori fu wan pôti uma di masra ben dede kaba, èn di tan go na wan kruka krutuman fu kisi en reti (Lukas 18:1-3). Aladi a krutuman weigri fosi fu yepi en, toku a taki te fu kaba: „Mi o sorgu taki a kisi en reti. Dan a no o kon fruferi mi moro èn a no o tan aksi mi fu du sani gi en” (Lukas 18:4, 5). Soleki fa a tekst na ini Grikitongo e taki, dan a krutuman yepi na uma so taki a no ben o „naki [en] na ondro en ai”, noso fu taki en tra fasi, so taki a no „pori [en] nen”. * Efu wan kruka krutuman kan yepi wan pôti uma, soso fu di a frede fu kisi porinen, dan a no de fu taki dati wi lobi-ati Gado o sorgu taki den wan di „e bari kari en dei nanga neti, kisi reti”! Soleki fa Yesus ben taki, dan Gado „sa sorgu taki den o kisi reti esi-esi”.
„Tan aksi, dan unu sa kisi.”
Aladi wi kan kon weri son leisi fu tan begi Gado fu yepi wi, toku wi musu tan begi. Te wi e tan begi, dan wi e sori nanga wi heri ati taki wi abi Gado fanowdu na ini wi libi. Wi o leri tu fu kon si fa Gado piki den begi fu wi, èn na so wi o kon moro krosibei na en. Iya, wi kan abi a frutrow taki Yehovah o piki den begi fu wi efu wi e tan begi en sondro fu tweifri taki a e arki.
^ paragraaf 3 Efu wi wani taki Gado arki den begi fu wi, dan wi musu du ala san wi man fu du san a e aksi fu wi. Efu wi e du dati, dan wi o si taki begi e yepi wi, soleki fa na artikel disi e sori. Efu yu wani sabi moro, dan luku kapitel 17 fu a buku San Bijbel e leri wi trutru? di Yehovah Kotoigi tyari kon na doro.
^ paragraaf 5 Yehovah na a nen fu Gado soleki fa a skrifi na ini Bijbel.
^ paragraaf 22 Na ini Bijbel ten, Gado ben wani taki den krutuman na ini Israel ben musu du bun gi uma di masra ben dede èn gi pikin di no ben abi papa nanga mama moro.
