Fu di Yehovah Kotoigi e du san Bijbel e leri, meki den no e bumui nanga politiek. Wi no e suku stem, wi no e stem tapu nowan politiek partèi noso politiek man, wi no e teki wroko di abi fu du nanga politiek èn wi no e pruberi tu fu puru tiriman so taki trawan kan kon na ini den presi. Wi e bribi taki Bijbel e sori krin fu san ede wi no kan du den sani disi.

• Wi e teki na eksempre fu Yesus. En ben weigri fu teki wan wroko di abi fu nanga politiek (Yohanes 6:​15). A ben leri den bakaman fu en taki den no musu de „wan pisi fu grontapu” èn a ben sori den krin taki den no musu teki sei na ini politiek.​—Yohanes 17:14, 16; 18:36; Markus 12:13-​17.

• Wi e horibaka gi Gado Kownukondre. Fu a Kownukondre disi Yesus ben taki: „A bun nyunsu disi fu a Kownukondre o preiki gi sma na heri grontapu” (Mateyus 24:14). Wi na sma di e preiki fu gi Gado Kownukondre èn wi kisi a wroko fu fruteri sma taki dyonsro a Kownukondre disi o kon. Dati meki wi no e bumui nanga politiek na ini nowan kondre, awinsi pe wi e libi.​—2 Korentesma 5:​20; Efeisesma 6:​20.

• Fu di wi no e bumui nanga politiek, meki wi man taki fri nanga ala sma fu a bun nyunsu fu Gado Kownukondre, awinsi fu sortu politiek partèi den de. Nanga den sani di wi e taki èn e du, wi e pruberi fu sori sma taki wi e bribi taki Gado Kownukondre o lusu den problema fu grontapu.​—Psalm 56:11.

• Fu di wi e du san wi man fu no meki politiek prati wi, meki wi na wán èn na heri grontapu wi e libi leki brada nanga sisa (Kolosesma 3:​14; 1 Petrus 2:​17). Ma fu di tra kerki e bumui nanga politiek, meki pratifasi de na ini den kerki.​​—1 Korentesma 1:​10.

Wi e lespeki tiriman. Aladi wi no e bumui nanga politiek, toku wi e lespeki den tiriman fu a kondre pe wi e libi. Na so wi e sori taki wi e du san Bijbel e taki: „Ibri sma musu saka ensrefi na ondro den tiriman” (Romesma 13:1). Wi e gi yesi na den wet fu a kondre, wi e pai belasting èn wi e horibaka gi a muiti di lanti e du fu sorgu gi den borgu fu a kondre. Wi no e teki a sei fu sma di e pruberi fu puru den tiriman fu a kondre. Na presi fu dati, wi e teki a rai fu Bijbel di e taki dati wi musu begi „gi kownu èn gi ala bigiman fu kondre”, spesrutu te den musu teki bosroiti di kan tapu wi fu anbegi Gado fri.​​—1 Timoteyus 2:​1, 2.

Wi abi lespeki tu gi a reti di sma abi fu teki den eigi bosroiti te a abi fu du nanga politiek. Fu eksempre, wi no e suku fu bruya den verkiezing èn wi no e tapu sma tu fu go stem.

Na wan sani fu a ten disi nomo taki Kresten no e bumui nanga politiek? Nôno. Leki fa wi e si tiriman na ini a ten disi, na so den apostel nanga den fosi Kresten ben e si den tu. A buku Beyond Good Intentions e taki: „Aladi den Kresten fu fosi ben e bribi taki den ben musu gi grani na den tiriman fu a kondre, toku den no ben e bribi taki den ben musu bumui nanga politiek.” A buku On the Road to Civilization e taki dati den fosi Kresten „no ben wani teki wan wroko di abi fu du nanga politiek”.

Na wan problema gi a kondre te wi no e bumui nanga politiek? Nôno. Lanti no abi fu frede wi, fu di na sma di lobi freide. Luku san wan artikel fu a Nationale Academie van Wetenschappen fu Ukraini taki na ini 2001. A taki: „Na ini a ten disi, yu abi sma kande di no lobi a fasi fa Yehovah Kotoigi e denki. Na dati meki den Nazisma nanga den Communist-sma ben e frufolgu den.” Ma srefi te den tiriman fu Rosiakondre ben e frufolgu den Kotoigi, toku den „ben de borgu di ben e tan gi yesi na den wet fu a kondre”. „Te den ben e wroko na den lanti boerderij noso na den lanti fabriki, den no ben e fufuru èn den no ben e denki densrefi nomo. Den no ben e prakseri srefi fu opo densrefi teige den Communist tiriman.” Na so a tu na ini a ten disi. Leki fa na artikel taki, dan a bribi fu Yehovah nanga den sani di den e du, no e gi sma deki-ati fu opo densrefi teige den tiriman fu nowan kondre èn den no e du noti tu di e sori taki den no e lespeki tiriman”.