Aha’a. Naho fa ampitahaegne i soratse tagnagne taloha rey, le trea fa tsy le niova o Baibolio ndra tie nadika tagnagne mateteke tagnate ty agn’arivo taogne aza. Faie fitaovagne mora simba ka ty nanoratagne aze.

 Agn’arivo’e ty Baiboly sinoratse tagnagne fa ela fa nitrea. Naho fa ampitahaegne reo, le misy raha tsy mitovy ty ila’e. Misy diso areke i aze sinoratse tagnagne rey. Faie tsy le lahibey o tsy fitoviagne rehoe, sady tsy magnova ty heve o andine’e reo. Faie misy tsy fitoviagne lahibey nitrea satria nisy ndaty taloha nisatry raha nagnova ty hevetse tea o Baibolio ho rehafegne. Intoagne misy ohatse roe:

1.   Misy ty rehake retoagne ohatse ty amy 1 Jaona 5:7 ao amy i Baiboly ila’e talohay: “Ty an-dagnitse agne, le i Rae naho ty Saontsy naho ty Fagnahy Masigne; sady iareo telo reo mifagnarake.” Faie tsy ireo ty tam-boaloha’e tagne naho fa henteagne i soratse tagnagne atokisagney. Tafara tatoy o rehake rehoe vaho nisy nampizilike tagnate Baiboly ao. a Nafahagne boake amy i dikan-drehake azo atokisagne tafara atoỳ areke o rehake reo.

2.   Miherenkeregne agn’arivo’e amy i Baiboly sinoratse tagnagne talohay tao ty tahinan’Andrianagnahare. Faie maro ty Baiboly manolo aze amy ty agnaram-boninahitse tihoe “Tompo” ndra “Andrianagnahare.”

 Fa maro zao ty sinoratse tagnagne nitrea, le manjare mora ty mahatrea raha diso agnate i dikan-drehakey ao. b Naho ampitahaegne areke i soratse tagnagne rey, le ino ty porofo fa tena maregne soa o Baiboly amy izaò?

•   Izao ty nirehafe ty manam-pahaiagne raike atao tihoe William Green miomba ty Soratse Hebreo (“Testamenta Taloha” ty ahafantaragne aze): “Tsy diso tikagne naho mirehake tie tsy misy asa soratse fa hambo’e nadika tamy ty fomba maregne soa hoe izay.”

•   Izao ty nisorate ty manam-pahaiagne raike miomba o Baibolio atao tihoe F. Bruce, miomba ty Soratse Grike Kristiana ndra “Testamenta Vaovao”: ‘Maro ty porofo mampiseho fa tena mitovy amy i tam-boaloha’e tagney o Testamenta Vaovao anagnantikagne amy izaò. Tsy mba nanahake izay o asa soratse taloha hafa sinoratse tagnagne reo. Faie tsy misy mitsikera i raha rey.’

•   Hoe ty A^toa Frederic Kenyon, manam-pahaiagne miomba ty Baiboly sinoratse tagnagne: ‘Tsy mba misalasala tikagne ndra mirehake tie, tena saontsin’Andrianagnahare o Baibolio. Tsy nisy nagnafahagne io hatrake amy ty taranake maro nifandimbe.’

•   Tsy nafaha o Jiosio naho o Kristiana mpandika tagnagne ty Soratse Masigneo ty fitantaragne miomba ty fahotagne lahibey natao ty vahoan’Andrianagnahare. c (Nomery 20:12; 2 Samoela 11:2-4; Galatianina 2:11-14) Tsy nafaha iareo ka i andine’e mirehake tie tsy nankatò o Jiosio ndra mirehake tie diso ty ila’e amy ty fampianara o ndatio. (Hosea 4:2; Malakia 2:8, 9; Matio 23:8, 9; 1 Jaona 5:21) Trea boake amy izay areke fa azo atokisagne o mpandika tagnagne reo sady tena nagnaja ty Saontsin’Andrianagnahare iareo.

•   Andrianagnahare ty nampanoratse o Baibolio. Toko’e hahagaga vao naho narova’e i Saontsi’ey mba tsy hisy diso? d (Isaia 40:8; 1 Petera 1:24, 25) Tsy ty ndaty taloha avao ty tea’e handrambe soa boake amy io, fa itikagne amo o andro hinane zao ka. (1 Korintianina 10:11) “Fa ze sinoratse taloha, le sinoratse hianarantikagne, mba hanan-draha tamaegne tikagne amy ty fiaretantikagne naho ty fampionognagne boake amy ty Soratse Masigne ao.”—Romanina 15:4.

•   Nagneregne ty rehake ila’e boake amy ty Soratse Hebreo ty Jesosy naho i mpanonjohy ty lia’e rey sady tsy ninekoneko iareo tie, kera misy diso i rehake nahere’e rey.—Lioka 4:16-21; Asan’ny Apostoly 17:1-3.