Eka. Mino zahay fa ‘boake amy ty hery ty fagnahy masin’Andrianagnahare, mba hampianaragne’ ty Baiboly. (2 Timoty 3:16) Agnisa izay o Testamenta talohao naho o Testamenta vaovaò, arake ty itokava o ndatio aze. Izahay ka mitoka ireo tihoe Soratse Hebreo naho Soratse Grike Kristiana, mba tsy hieretseretagne tie fa lany date ndra tsy ilaegne sasa ty tapa’e ila’e amy Baiboly ao.

 Nampirehafen’Andrianagnahare hoe izao ty apostoly Paoly, sady ireke Kristiana: “Ze sinoratse taloha, le sinoratse hianarantikagne.” (Romanina 15:4) Misy fagnazavagne tena ilaentikagne areke ty amy Soratse Hebreo ao. Agnisa izay i tantara andrambesantikagne lesogne rey vaho i torohevetse mahasoa rey.

•   Tantara andrambesagne lesogne. Rehafegne amy ty pitsopitso’e amy ty Soratse Hebreo ao ty tantara i famorognagney naho ze nahavy o ndatio hanota. Naho tsy nisy ze fagnazavagne zay, le tsy ho fantantikagne ty vale i fagnonteneagne tihoey: Akore ty nampisy antikagne? Nagnino o ndatio ro mate? (Genesisy 2:7, 17) Tantaraegne amy ty Soratse Hebreo ao ka ty fomba nifandrambesan’Andrianagnahare tamy ze ndaty nanagne raha mahafale naho nanagne olagne manahake antikagne avao ka.​—Jakoba 5:17.

•   Torohevetse mahasoa. Misy torohevetse tsy mete lany date ty amy boke Ohabolana naho Mpitoriteny ao, i aze amy Soratse Hebreo ao rey. Rehafegne ao tie akore ty hahasambatse ty keleiagne (Ohabolana 15:17), akore ty ahaiagne manahatsahatse amy ty asa (Ohabolana 10:4; Mpitoriteny 4:6), vaho tihoe akore ty azo o tanorao ampiasagne ty fiaigna’e agnate i fahatanora’ey (Mpitoriteny 11:9-12:1).

 Mandrambe soa ka tikagne naho fa mianatse ty Lalà i Mosesy amy Torah ao (i boke dime voaloha’e amy Baiboly ao rey). Tsy fehé o lalàna iohoe sasa ty Kristiana. Faie misy toro lalagne mahasoa magnampe antikagne ho sambatse ty ao.​—Levitikosy 19:18; Deoteronomia 6:5-7.