Nagnino o Vavolombelo i Jehovah-o ro mbe Mitory Avao amy ty Ndaty Mirehake tie Tsy Liagne?
Tea an’Andrianagnahare naho ty mpiara-belogne ama’e o Vavolombelo i Jehovah-o, le fale iareo mitory amy ze kila ndaty iaby, agnisa izay o aze mirehake tie tsy liagne reo. (Matio 22:37-39) Tea an’Andrianagnahare iareo, le mankatò ty lily i Ana-dahi’ey mba hitory ndra “hagnazava soa” ty Saontsin’Andrianagnahare. (Asan’ny Apostoly 10:42; 1 Jaona 5:3) Miherenkeregne mitory iareo manahake ty natao ty mpaminanin’Andrianagnahare taloha. (Jeremia 25:4) Satria tea’ay ka ty mpiara-belogne ama’ay, le mitory ty “talily soa i fanjakagney” amy ze kila ndaty ndra amy ty ndaty mirehake tie tsy liagne zahay. Ty anto’e mamonje aigne o talily soa iohoe.—Matio 24:14.
Mateteke zahay ro mahatrea ndaty liagne naho fa miheregne mitilike amy ty tragno nisy ndaty nirehake tie tsy liagney. Misy anto’e telo mahavy anay manao izay.
Nifindra ty ndaty nitoboke ao.
Misy ndaty hafa liagne amy i hafatse torie’aỳ ty amy i tragnoy ao.
Miova o ndatio. Manjare ‘mipay an’Andrianagnahare’ ty ndaty ila’e noho ty raha miseho magneran-tane naho ty raha manjò iareo amy ty fiaigna’e. Manjare liagne amo o Baibolio areke iareo. (Matio 5:3) Va’e hiova ka o ndaty manohetseo, manahake i apostoly Paoly.—1 Timoty 1:13.
Faie tsy mamoresé o ndatio hitsanogne anay zahay. (1 Petera 3:15) Ty anto’e, hai’ay tie anjara ty tsikiraidraike ty mifily ze fivavahagne tea’e.—Deoteronomia 30:19, 20.