Mipay drala tikagne hamelomagne ty keleiantikagne. (Ohabolana 30:8) ‘Fiarovagne o dralao.’ (Mpitoriteny 7:12) Va’e ho sarotse amy ty mpirovaly ty mirehake miomba o dralao, faie ko ampanahiragnegne anareo zay. (Efesianina 4:32) Toko’e hifampatoky ty mpivaly sady hifandahatse ty hampiasagne ty drala iareo.

INOGNE TY RAHA REHAFE TY BAIBOLY? “A ia ama’areo zao ty te hagnoregne tilikambo faie tsy hagneregneregne heike hikonte ty ho lany ama’e hahafantaragne tie ho ampe ndra tsy ho ampe?” (Lioka 14:28) Soa naho laharegne heike ty hampiasagne i dralay. (Amosa 3:3) Fantaro ty raha paliae’areo naho ty drala ho lanie’areo ama’e. (Ohabolana 31:16) Tsy naho fa tsahatse ty raha raike ty drala’o, le havili’o aze. Mikezaha tsy hitrosa sady ko mandany drala mihoatse ze anagna’o.—Ohabolana 21:5; 22:7.

INOGNE TY TOKO’E HATAO’O?

• Naho mbe misy sisa’e ty drala’ areo naho fa fara volagne, le laharo’areo ty hampiasagne aze

• Naho tsy ampe hatra fara volagne ty drala’areo, le laharo’ areo ty  hampihegnagne ze raha ho viliegne. Soa naho mahandro fa tsy mivily hanegne masake

INOGNE TY RAHA REHAFE TY BAIBOLY? Manoa raha “amy ty hamarenagne tsy tie ho vazoho i Jehovah avao fa ho trea o ndaty ka.” (2 Korintianina 8:21) Ko misy aetake ty karama’o naho ze drala linani’o fa le rehafo amy i vali’o iaby.

Mirehafa amy i vali’o avao naho fa misy raha lahibey hampiasà’o i dralay. (Ohabolana 13:10) Naho milahatse miomba ty hampiasagne i dralay nareo, le ho soa ty fiharoa’areo. Ko haligno fa anareo amo o keleia’ò ty karama’o fa tsy azo raike.—1 Timoty 5:8.

INOGNE TY TOKO’E HATAO’O?

• Laharo’areo tie fire ty drala lanie ty raike vaho tsy hangatahegne

• Ko mandigne tie misy raha manahiragne vaho hirehake drala amy i vali’o