2 Timoteu 3:1-17
3 Kpa fa kwagh ne, ken ayange a masejime yô, ashighe a bo aa va shi uma una taver.
2 Gadia ior vea hingir mba soon iyol ve tseegh man mba soon inyaregh man mba kaan ihyagh man mbawan imanger man mba lahan Aôndo man mba hemban mbamaren vev ato, man mba wuese kwagh ga man mba eren kwagh a ior* sha mimi ga,
3 man mba lun a dooshima ga man mba lumun u gban zwa môm a mbagenev sha ma kwagh ga, man mbavihin ior iti man mbakôron iyol ve tsaha ga, man mba toron asema man mba soon kwagh u dedoo ga,
4 man mba eren kwagh a azende a ve sha mimi ga, man mba norom sha kwagh, man mba kenden a iyol sha man mba ve soon u keren msaanyol ve tseegh, kpa Aôndo yô a doo ve ishima ga yô;
5 sha ashe yô, vea lu er ka mbacivir Aôndo nahan, kpa ieren ve ia tese ér mba civir Aôndo ga;* gema ijime a ambaaior ne.
6 Mbagenev ken a ve ka ior mba ka ve mough ve nyôr ken uya mba iorov myer ve ngohol asema a kasev mba taver ga, mba ve eren asorabo kpishi, mba asaren atô kposo kposo a hemen ve,
7 mba ve henen kwagh hanma shighe kpa mayange ve fetyô u aren sha mfe u vough u mimi ga la yô.
8 Er Yane man Yambere yange ve hendan a Mose nahan, kape mban kpa ve lu hendan a mimi her je la. Mhen u ambaaior ne vihi, Aôndo venda ve sha ci u ieren ve zua sha ityesen ne ga.
9 Nahan kpa, vea kera fatyô u zan hemen ga, gadia ior cii vea va nenge a ibumegh vev kira wang, er iorov mba uhar mbara kpa lu nahan.
10 Kpa we yô, u ngu dondon ityesen yam vough vough, kua ieren yam, shi u fa awashima wam, man kwagh u jighjigh u nan wam man ishimawan yam man dooshima wam man ishimataver yam;
11 shi u fa er yange i tôvom a atsan shi m ya atsan hen Antiôki man Ikonium man Lisetera yô. Yange m taver ishima shighe u i lu tôvon mo a atsan la, nahan Ter yimam ken a cii.
12 Jighilii yô, mba i sar ve u civir Aôndo ken mzough vea Kristu Yesu cii, ve kpa a tôv ve a ican.
13 Kpa ieren i mbaaferev man mbatsughunior ia lu vihin gban a gba kera, vea lu tsughun ior, shi ve di kpa a lu tsughun ve.
14 Kpa we yô, za hemen u dondon akaa a u fe, a yange i pase u ve u ne jighjigh la, gadia u fa ior mba u hen a sha ikyev ve la,
15 man er iyev je, u hii u fan icighanruamabera u una na u hingir orfankwagh, sha u va zuan a myom sha jighjigh u nan ken Kristu Yesu la yô.
16 Ruamabera jimin cii ka Aôndo a ne i nger ye, ngu a inja sha u tesen or man sha u kôôm or man sha u sôron akaa a i er shami ga yô, man sha u tsaase or sha kwagh u perapera,
17 sha er or u Aôndo nana kuma vough, nana wa ago iyol tsembelee sha hanma tom u dedoo yô.
