Shighe kar yô, ior ngee sha tar kpishi, kpa mbaaferev hemba ngeen cii. Mbatyomov mba shaav mbagenev je kpa hingir mbaaferev. Yange ve undu ya ve u sha la ve va lu shin tar. U fa kwagh u yange na ve ve er nahan kpa? Yange ve va shin tar ér vea va gema ken iyol i uumace, shi vea vôso kasev.

Mbatyomov mbara mar ônov a kasev mba ve vôso la. Ônov vev mba shon vese hingir mba lun a agee kpishi shi bulan ior. Yange ve er ior akaa a vihin tsung. Kpa Yehova de ér akaa la a za hemen ga. Nahan a tim mbaaferev mbara sha mngerem ma deemee.

Kpa orgen lu kposo. Or la ya ijende a Yehova. I yilan un ér Noa. Noa lu a kwase man ônov mba nomso utar, ve yô, lu Shem man Ham kua Yafeti, shi hanmô ve lu a kwase. Yehova yange kaa a Noa ér a er zegetso, sha er Noa vea tsombor na vea war Mngerem ma Deemee mara yô. Tso ne lu er ka zegeyou u lun azongo anyiin nahan, lu u una fatyô u yemen sha zar mnger. Yehova shi kaa a Noa ér a nyôr a annyamev kpishi ken tso la sha er ve kpa vea war yô.

Fese je maa Noa hii u gban tso. Noa vea tsombor na er tom u gban tso la kuma er anyom 50 nahan. Yange ve gba tso shon er Yehova tese ve ér ve gba la vough. Shighe u ve lu gban tso la, Noa shi lu tan ior icin ér ve wa ikyo Mngerem ma Deemee ma van. Kpa or môm soo u ungwan kwagh la ga.

Zan zan shighe va kuma u nyôron ken tso. De se nenge ase kwagh ugen u yange er yô.