SHA CI U NOOV MAN KASEV
4: Ka Ve De Or Kwaghbo
INJA I KWAGH LA ÉR NYI?
U den or kwaghbo la inja na yô, ka u or a er u kwagh u vihin kpa u de oron iyev ga shi u de we kwagh ishima a nan cuku tsô kpaa ga. Ka u tôôn wer kwagh u vihin u i er u la ka ankwagh u kiriki, shin tôôn wer kwagh shon er u ga kuaa la i lu u den or kwaghbo ga.
KWAGHWAN U BIBILO: “Waan nen ishima a mbagenev shi deen nen mbagenev kwaghbo sha mimi hanma shighe cii, aluer or er kwagh a orgen doo nan ga je kpaa.”—Mbakolose 3:13.
“Aluer kwase wou shin nomou doo u ishima yô, u ver ishima sha mbamyen nav ga, kpa u nenge a ieren i dedoo i a lu nôngon ér una lu a mi la.”—Mkaanem ma orgen, iti na ér Aaron.
ER I HII VE KWAGH NE A LU HANGE HANGE YÔ
Aluer u wa kwagh ishima a or gbem yô, u wua iyol you, sha ci u u mem ken ishima ga shi kwagh la una na u angev, shi ivese you ia vihi.
“Kwagen la nomom er kwagh u vihin mo kpishi, nahan zamber a mo ér mo m ya un anyi. Yange taver mo u den un kwaghbo la kpishi. Kpa ken masejime yô, m de un. Ka i vihim er yange m de un kwaghbo shon fele ga yô. Sha ci u kwagh shon yange na yô, lu se ken ishima hang gbem a ityôkyaa shio.”—Mkaanem ma kwase ugen, iti na ér Julia.
KWAGH U U ER YÔ
HEN SHA MBAMPIN MBAN
Shighe ugen nomou shin kwase wou una ôr shin una er kwagh u doon we ga yô, pine iyol you wer:
‘Kwagh ngôôr vihin mo ga yumuu?’
‘Kwagh shon ka kwagh u vesen je saa una zamber mo, shin me gba den tsô?’
LAM VEA NOMOU SHIN KWASE WOU SHA MBAMPIN MBAN
Ishima ka ia vihi u a mo, shin ia vihim a we nahan, ka i tôô se shighe nena cii ve mase den kwagh shono?
Shighe u kwagh a lu nahan yô, se er nen ve se de or kwaghbo fesee?
AKAA A AA WASE NE YÔ
Aluer nomou shin kwase wou er kwagh u doon we ga yô, de kaan wer a er sha apera ga.
Nôngo fa ityôkyaa i i ne ve a er kwagh la yô, shi umbur wer “se cii ka se nôngo gbeev acin imôngo.”—Yakobu 3:2.
“Se uhar cii ka sea lu a ibo sha kwagh yô, ka taver se u den hanma wase ibo ga, kpa ka a lu ibo i or môm tseegh yô, i taver orgen la kpishi u den nan. Saa u lu or u hiden a iyol jime tsung ve ungwa zamber u or shi u de nan kwaghbo ye.”—Mkaanem ma kwase ugen, iti na ér Kimberly.
KWAGHWAN U BIBILO: “Sôr zayol u u lu a mi vea or . . . la fese.”—Mateu 5:25.
Aluer u wa kwagh ishima a or gbem yô, u wua iyol you, sha ci u u mem ken ishima ga shi kwagh la una na u angev, shi ivese you ia vihi
