KWAGH U UNA WASE IHYOM IA BEE YÔ
1 | De Sangen a Sange Ga
Bibilo Kaa Ér:
“Aôndo sangen a sange ga, kpa ken hanma ikyurior cii, [hanma] or u nan cie un shi nan eren kwagh u vough yô, una lumun nan.”—AERENAKAA 10:34, 35.
Inja i Kwagh u Bibilo i Ôr La:
Yehova * Aôndo nengen se ér se hemba mbagenev shin mbagenev hemba se sha ci u mlu u tar u se due ker la, shin kwavyolough wase shin aeren a ityôô a ase ga. Kpa ka a hemba veren ishima sha gbenda u se henen kwagh la kua akaa a a sar se la. Bibilo shi kaa ér: “Or nengen mluashe u ken won, kpa TER yô, nengen ken ishima.”—1 Samuel 16:7.
Er Kwagh u Bibilo i Ôr la Una Wase U Yô:
Shin er se fetyô u fan kwagh u ken ishima i or er Aôndo nahan ga kpa, se fatyô u nôngon dondon ikyav na i sangen a sange ga la. De nengen a or maa tôôn wer ior mba ken nongoior u or shon la cii mba er nan nahan ga. Shighe u u va hii u kaven wer u soo kwagh u ior mbagenev ga, er abuter shin mba ken ma tar ugen nahan yô, er msen hen Aôndo wer a wase u u dugh mhen la ken ishima you kera. (Pasalmi 139:23, 24) Aluer u er msen hen Yehova sha mimi wer a na u agee u eren kwagh a ior cii sha mimi, u sangen a sange ga yô, ka keng una ungwa msen wou shi una wase u.—1 Peteru 3:12.
^ Ikyum. 6 Yehova ka iti i Aôndo.—Ekesodu 6:3.
“Lu hiin je m za tema vea orbuter hen ya u nan ken bem [la] . . . Yange m hii u nengen mer m ngu ken tsombor u anmgbianev mba sha tar cii la kpôô kpôô.”—MKAANEM MA TITUS
