Ngohol a Iwuese, Gema Na a Ishima i Môm

KWAGH wase gba Yehova, Ter wase u sha u doon ishima la ishima tsung. Mkaanem ma Aôndo na se ibumun ér koson se cii sha mimi. (1 Pet. 5:⁠7) Gbenda môm u Yehova a tese ér un koson se yô, ka sha u wasen se sha igbenda kposo kposo sha er se civir un sha mimi yô. (Yes. 48:17) Yehova ka a soo ér se zua a mtsera ken iwasen i un lu nan se la, hemban je yô, shighe u se lu yan ican la. Tindi u Mose la tese kwagh ne.

Sha ikyev i Tindi u Mose la, Yehova yange sôr ian ver sha er “icanor,” inja er ancôghol man kwasecôghol kua shiror nahan nana zuan a iwasen yô. (Lev. 19:​9, 10; Dut. 14:29) Nyian kpa, Yehova fa er alaghga a gba u mbacivir un vea zua a iwasen hen mbacivir Aôndo a ve imôngo yô. (Yak. 1:27) Nahan yô, ma or u civir Aôndo môm kpa kunya u de ker nan u ngohol iwasen hen mba Yehova a mgbegh ve u nan ve iwasen la ga. Kpa doo u se tese ieren i dedoo shighe u i ne se iwasen yô.

Mkaanem ma Aôndo shi pase se wang ér ior mba Aôndo mba ngohol a ngohol iwasen tseegh ga, mba ne mbagenev iwasen kpaa. Umbur kwagh u “kwasecôghol u a lu icankwase” u Yesu yange nenge un lu eren iyua ken tempel ken Yerusalem la. (Luka 21:​1-4) A shi nan kpa, kwase ne yange zuan a iwasen i Yehova naan kasev mba côgholov sha ikyev i Tindi la. Nahan kpa, ior mba umbur kwagh u icankwase la ér, yange i na un iwasen ga, kpa mba umbur kwagh na ér yange er iyua. Adooga ieren na i nan nagh la yange i va un a msaanyol, gadia Yesu kaa ér: “U nan a na kwagh hembe saan iyol a u ngohol a ngohol kwagh.” (Aer. 20:35) Er u fe mimi ne yô, we kpa ú hen u ‘nan nagh,’ nahan geman zuan a msaanyol u nagh ku nan ku ve a mi la nena?​—⁠Luka 6:⁠38.

“Ka Nyi Me Na [Yehova]?”

Orpasalmi yange pine ér: “Ka nyi me na TER sha ci u akaa a Na a dedoo a A erem cii laa?” (Ps. 116:12) Ka akaa a dedoo a nyi yange i er sha ci naa? Yehova yange sue un shighe u lu ken “ican man mzungu” la. Heela tseegh ga, Yehova shi “yima uma [na] ken ku.” Ka nahan ve soo ér una ker gbenda a “na” Yehova kwagh ye. Nahan orpasalmi ne er nena? A kaa ér: “Me kure uiceghzwa av a TER.” (Ps. 116:​3, 4, 8, 10-14) Yange kange ishima ér una kure uiceghzwa mba un er a Yehova la cii, shi una er ityom i í gbe u una er Yehova la cica cii.

We kpa u fatyô u eren nahan. U er kwagh ne nena? U er kwagh ne sha u hanma shighe yô wan atindi a Aôndo man akaawan a na cii ikyo. Nahan yô, ver ishima sha er mcivir u Yehova a luun we kwagh u vesen shi jijingi u Aôndo kpa a̱ hemen we ken akaa a u eren cii. (Orpa. 12:13; Gal. 5:​16-18) Kpa jighilii yô, u fatyô u nan Yehova kwagh sha akaa a A er sha ci wou la cica cii ga. Nahan kpa, Yehova ka una nenge wea civir un sha ishima i môm nahan ‘i saan un iyol’ kpen kpen. (Anz. 27:11) Ian i se lu a mi i nan ser i saan Yehova iyol sha gbenda ne la ka kwagh u doon kpishi!

 We Kpa Keren Mkpeyol u Tiônnongo

We kpa u fatyô u kaan wer ú zua a iwasen ken tiônnongo u Kristu sha igbenda kpishi. Yehova ne se kwaghyan u ken jijingi kpishi sha ikyev i tiônnongo. Ú ngohol mimi u a pase u sha ikyev i iferkwagh i kwaghaôndo man ime i ken jijingi a toho la. (Yoh. 8:32) Shi u zua a mfe u una va a uma u tsôron ken paradiso shin tar, ape mnyoon man ican i yan cii ia kera lu ga la, ken mbamkombo mba tiônnongo man mbamkohol mba kiriki kua mba vesen mba “wanakiriki u jighjigh man u fan kwagh” a ser a ver la. (Mat. 24:​45-47) Sha kpôô yô, u fatyô u ôron mbamtsera mba u zough a mi sha ikyev i tiônnongo u Aôndo shi u va zua a mi ken hemen la cii been ga. Nahan kanyi u fatyô u nan tiônnongoo?

Apostoli Paulu nger ér: “[Ka sha er] iyol cii er i magh i, i zua i sha iwasen i hanma ijuan i i lu ker yô, sha tom u hanma ilyeghegh ki lu eren sha inja i ki la, i lu vesen i lu maan iyol i i ken dooshima ye.” (Ef. 4:​15, 16) Er yange i nger ivur Bibilo la sha ci u Mbakristu mba i shigh ve mkurem mbara nahan kpa, kwaghwan u i̱ la ngu a inja sha ci u Mbakristu nyian cii. Hanma or ken tiônnongo nana fatyô u keren mkpeyol man mzehemen u tiônnongo. Sha nyi igbenda?

Se er kwagh ne sha u hanma shighe yô keren gbenda u taver mbagenev asema, shi maan ve ken tom u ve eren Aôndo la. (Rom. 14:19) Shi se fatyô u seer sha ‘mvese u iyolough’ sha u umen ityamegh ki jijingi u Aôndo ken akaa a se eren a mbananjighjigh a vese imôngo la. (Gal. 5:​22, 23) Heela tseegh ga, se fatyô u keren aan a “eren . . . akaa a doon a ior cii, kpa jim je yô, ka mbananjighjigh.” (Gal. 6:10; Heb. 13:16) Hanma or ken tiônnongo cii, anmgbianev mba nomso man mba kasev kua agumaior man mbabeenyol cii, vea fatyô u wan uwegh sha u ‘maan iyol i i lu ken dooshima’ ne.

Kwagh ugen yô, se fatyô u yaren tom a kwaghfan wase man agee a ase kua inyaregh yasegh sha u eren tom u waren uma, u tiônnongo a lu eren ne. Yesu Kristu kaa ér: “Ne ngohol gbilin.” Nahan doo u se di se er nena? A kaa ér: “Na nen di gbilin kpaa.” (Mat. 10:⁠8) Nahan yô, nôngo sha gbashima wou cii sha er u er tom u pasen kwagh u Tartor shi geman ior hingir mbahenen ne yô. (Mat. 24:14; 28:​19, 20) Ma kwagh ngu u a lu yangen we u eren kwagh ne yôô? Umbur kwagh u kwasecôghol u Yesu ôr kwagh na la. Yange na nagh ku ndahar kpishi. Nahan cii kpa, Yesu kaa ér nagh ku kwasecôghol la hemba hanma nagh ku mbagenev na la cii. Kwasecôghol la na nagh a ishima na i môm sha mlu na. ​—⁠2 Kor. 8:​1-5, 12.

Ngohol Iwasen Saan Saan

Nahan kpa, alaghga ashighe agen a gba u tiônnongo una na u iwasen. Aluer tiônnongo na u iwasen shighe u ú lu nôngon a mbamtaver mba tar ne yô, mayange i de taver we u ngohol iwasen la ga. Yehova na se ior mba kwagh wase a gbe ve ishima, mba ve vie ken jijingi la ér ve “koso nongo u Kristu” shi ve wase se shighe u se tagher a mbamtaver man tôvacan yô. (Aer. 20:28) Mbatamen man mbagenev ken tiônnongo ka ve sur se asema shi ve sue se shi ve kura se shighe u se lu ken mbamtaver yô.​—⁠Gal. 6:2; 1 Tes. 5:⁠14.

Kpa aluer u zua a ma iwasen yô, i saan we iyol. Hanma kwa u i ne u iwasen cii, tese wer u ngu a iwuese. Nengen iwasen i anmgbianev ou mba ken Kristu ve ne u la wer ka erdoo u Aôndo hen a we. (1 Pet. 4:10) Kwagh ne ngu hange hange sha ci u nyi? Ka sha ci u se soo u ngohol iwasen sha gbenda u ior kpishi ken tar ve ngohol la ga, gadia mba tesen iwuese ga.

Eren Kwagh sha Inja man Akuma Akuma

Paulu yange ôr kwagh u Timoteu ken washika na u nger hen tiônnongo u ken Filipi la  ér: “M kera ngu a orgen u nan lu ishima i môm a ven u nana ver ishima sha kwagh wen sha mimi nahan ga.” Paulu shi kaa wener: “Mbagenev cii mba keren akaa a ve ayol a ve, kera ka kwagh u Kristu Yesu ga.” (Fil. 2:​20, 21) Er Paulu a tese mnenge na sha ikyaa ne wang se nenge nahan yô, se nyian se har ishima yase cii sha u keren ‘akaa a ase ayol a ase’ ga nena?

Doo u se zer zan mbagenev ken tiônnongo iyol shighe u se soo ser ve wase se u sôron mbamzeyol asev la ga. Sha ci u nyi? Hen ase sha kwagh ne: Alaghga anmgbian nana na se iwasen shighe u aikyôr a er se yô, nahan a doo se kpishi. Kpa a doo u hanma shighe cii se soo ser nana naan se inja iwasen nee? A doo nahan ga cii. Shin er ka i doo anmgbianev asev u nan se iwasen hanma shighe nahan kpa, doo u se ver ishima ser ve vihi shighe ve cica cii sha u wasen se ga. Sha mimi yô, a hemba doon se u anmgbianev asev ve wase se a ishima i gbar gbar, i de lu er mba kighir ve a kighir ga.

Hanma shighe cii kpa, anmgbianev ou mba ken Kristu vea kegh iyol u wasen we je ka u tunan ga. Nahan kpa, ashighe agen vea fatyô u nan we iwasen i u soo la ga. Aluer kwagh ngu nahan je kpa, fa wer Yehova una sue u ken atsan a ou cii, vough er yange sue orpasalmi nahan.​—⁠Ps. 116:​1, 2; Fil. 4:​10-13.

Nahan yô, aluer Yehova na u iwasen i kwagh a gba u sha mi la yô, mayange i de taver we u ngohol i saan saan ga, hemban je yô, shighe u u lu ken ican yô. (Ps. 55:22) A soo ér u ngohol iwasen la. Nahan kpa, Yehova shi soo ér u ‘naan nagh sar sar.’ Sha nahan yô, vande ‘wan ken ishima you’ u nan iyua er u fetyô la, sha u suen mcivir u mimi. (2 Kor. 9:​6, 7) Aluer u er nahan yô, u fatyô u ngohol iwasen a iwuese shi nan mbagenev iwasen a ishima i môm kpaa.

[Ngeren u kiriki/Foto peeji 31 la]

“Ka Nyi Me Na TER sha ci u akaa a Na a dedoo a A erem cii laa?”—Ps. 116:12

▪ Keren aan a “eren . . . akaa a doon a ior cii”

▪ Taver mbagenev asema shi maan ve ken tom u ve eren Aôndo la

▪ Eren tom u geman ior hingir mbahenen ne sha afatyô wou cii