1-3. (a) Yosua ver ikyav i dedoo i or u yange nan tsua kwagh u vough nena? (b) Shighe u i gbe u se tsua akaa a se er yô, ka nyi i doo u se umburu?

IAN i hanma or nan lu a mi i tsuan akaa a nan soo la ka i injaa kpen kpen. Kwagh ne ka a na nan lu a tahav sha iyol i nan. U tesen ikyav yô: Tôô ase wer or ngu yemen sha gbenda maa gbenda shon za ta agbar ahar. Nahan ka u han nana zaa? Aluer or la ngu a ijiir i nan soo u zan yô, alaghga gbenda u môm ua za a nan ijiir la, ugen di ua a yem a nan vegher ugen kposo.

² Bibilo pase kwagh u ior kpishi mba yange ve tagher a kwagh u gba u vea tsua yô. U tesen ikyav yô, yange gba u Kain una kighir ishimanyoon na la, shin una kighir ga. (Gen. 4:6, 7) Yange gba u Yosua una tsua u civir Aôndo u mimi shin civir mbaaôndo mbaaiev. (Yos. 24:15) Awashima u Yosua lu u lun a Yehova kôôsôô; sha nahan yô, a tsua kwagh u una wase un u eren kwagh ne yô. Kpa Kain yô, lu awashima la ga, nahan a tsua u eren kwagh u una pav un a Yehova yô.

³ Se kpa ashighe agen se tagher a akaa a i gbe u se tsua u eren yô. Aluer kwagh ngu nahan yô, umbur kwagh u a lu awashima wou la; ka u eren akaa cii sha u van Yehova a icivir, shi palegh nyityôkwagh i ia na u undu un la cii. (Ôr Mbaheberu 3:12.) Ken ngeren ne, man ngeren u a dondo la cii, se lu timen sha akaa ataankarahar a i gbe u se de ser a̱ pav se a Yehova ga yô.

4. Gba kpee u se er tom sha ci u nyi?

⁴ I wa Mbakristu tindi ér ve nenge sha ayol a ve man icombor ve. Bibilo tese ér aluer or soo u nengen sha ior mba hen ya u nan ga yô, nan hemba gban kera a or u nan ne jighjigh ga yô. (2 Tes. 3:10; 1 Tim. 5:8) Sha kpôô yô, tom u eren ka u wase se kpen  kpen, kpa aluer se wa ikyo ga yô, tom shon ua pav se a Yehova. Ua pav se a Yehova nena?

5. Ka nyi i gbe u se hen sha mi cii ve se ngohol ma tomo?

⁵ Aluer u ngu keren tom di ye? Wea lu hen ijiir i tom u lu ican u zuan a mi yô, alaghga ishima ia mgbegha ú ker u ngohol nyityô tom u i ne u cii. Kpa aluer tom shon hendan a atindiakaa a Bibilo ye? Aluer tom shon ka u ua na yô u zenden sha kpishi, nahan u kera faantyô u civir Aôndo shin lun vea tsombor wou imôngo ga di ye? Doo u ú gba ngohol tom shon tsô, u ta icia wer hemba u teman ave gbilinii? Umbur wer, aluer u tsua tom sha inja ga yô, ua pav u a Yehova. (Heb. 2:1) Aluer u ngu keren tom shin u soo u geman tom yô, u er kwagh ne sha kwaghfan nena?

6, 7. (a) Ka mbaawashima mba nyi alaghga or a lu a mi sha kwagh u tom u uke? (b) Ka awashima u nyi una na se seer lun a Yehova kôôsôô, man ka sha ci u nyi?

⁶ Er se vande ôron sha ijime nahan, de hungur awashima wou la ga. Pine iyol you wer, ‘M soo mer tom ne u wasem u eren nyi?’ Aluer u tsua tom la wer u̱ wase u kua tsombor wou u civir Yehova yô, una ver iniôngon you la doo doo. (Mat. 6:33) Shighe u i de u tom shin inyaregh ki ze ihyen kpa, Yehova fa er i gbe u una wase u yô. (Yes. 59:1) “Mba ve civir Aôndo la Ter fa u yiman ve ken imeen” shin mtaver. (2 Pet. 2:9)

⁷ Kpa aluer awashima wou cii yô, ka u ma u hingir ornyar di ye? Alaghga u zua a ki. Nahan kpa, aluer u de akaa cii u yem nôngon wer u hingir ornyar yô, kwagh u vihin tsung una er u. (Ôr 1 Timoteu 6:9, 10.) Aluer u hemba veren ishima sha u lun a inyaregh shin zuan a tom yô, kwagh ne una pav u a Yehova.

8, 9. Gba u mbamaren vea lu a mnenge u nyi sha kwagh u tomo? Ta iwanger.

⁸ Wea lu ormaren yô, hen er ikyav you ia bende a ônov ou yô. Ka nyi ve nengen ér i hemba gban we kwagha? Ka tom shin ka mlu wou vea Yehova? Aluer ve nenge ér ka shagba kua inyaregh man itizan i hembe gban we kwagh yô, vea va kera dondo gbenda wou u bo ne nga he? Shi vea na u icivir kpa? Gumkwase ugen, u a lu Orkristu yô, kaa ér: “M umbur er ngise la, terem uve ityough ken tom yô. Sha hiihii la, lu inja er ngu eren tom kpoghuloo sha ci u kwagh a de banen tsombor wase ga nahan. Yange soo ér una nenge sha a vese tsembelee. Kpa ken anyom a karen ne, kwagh kôr gema. Ka a vihi shighe sha tom kpishi, una hiden yô a yam akaa a taver ishe kpishi, a kwagh a gbe tsombor a mi keng ga yô. Kwagh ne na yô, i fa tsombor wase ér ka tsombor u lun a inyaregh, i fa u ér ka tsombor u taver mbagenev asema ér ve civir Yehova ga. Mo yô, m hemba soon mer terem a er tom kpoghuloo u wasen tsombor wase u kporom ikyua a Yehova, i de lu u ombon inyaregh ga.”

⁹ Ne mbamaren, de gbaan nen ica a Yehova sha u hemban veren ishima sha kwagh u tomough ga. Ieren yen i tese ônov enev ér ne na jighjigh sha mimi ner, hemba kan a inja u lun yôughyôugh ken jijingi, a u lun yôughyôugh sha iyol.—Mat. 5:3.

10. Ka nyi i doo u gumor nana hen sha mi, zum u nan lu henen sha tom u nan soo u va eren laa?

¹⁰ Wea lu gumor u u lu henen sha tom u u vese ve u er yô, u tsua kwagh u a lu vough sha gbaa ne nena? Er se vande henen nahan, a gba u u fa kwagh u u soo u eren a uma wou la. Aluer u ngu henen sha ma tom u u soo wer u hen u fa u eren yô, tom shon ua wase u lun kôôsôô a Yehova shinii, ua pav u a pav a naa? (2 Tim. 4:10) U soo u lun er ior i tar ne, mba i saan ve iyol sha shighe u ve zough a inyaregh tseegh laa? Shin u soo u lun a vangertiôr er Davidi nahana? Yange nger  ér: “Ngise m lu iyev, hegen m bee iyol, nahan kpaa, mayange m ngu a nenge i ta orperapera kera ga, shin tsombor u nan kpaa u sônon kwaghyan ga.” (Ps. 37:25) Umbur wer, gbenda ugen ú tsua u zan sha mi yô, ua pav u a Yehova, ugen di ua na uma wou una hemba doon cii. (Ôr Anzaakaa 10:22; Malaki 3:10.) Ka gbenda u han u tsua? *

11. Bibilo ôr kwagh u iemberyolough ér nyi, kpa ka nyi i doo u se lu a mi ken ishima?

¹¹ Bibilo yange se iemberyolough ga, shi i tese ér iemberyolough i eren ka ashe a timbir kpaa ga. Paulu yange nger Timoteu washika kaa ér: “U karen iyol, i̱ taver la tseegh yô, wa ngun a inja kpeghee.” (1 Tim. 4:8) Bibilo kaa ér “shighe u ahan a sen” ngu, kua “shighe u yaren kwan” je kpaa; shi i taver se ishima ér se memen kpaa. (Orpa. 3:4; 4:6) Kpa aluer u wa ikyo ga yô, iemberyolough ia pav u a Yehova. Kwagh ne una er nena? Kwagh ne har sha inja iemberyolough i u tsough u eren la, man shighe u ka u vihi u eren i la.

12. Ka nyi i doo u ú gbidye kwar sha mi shighe u ú soo u tsuan ma iemberyolough i u ere?

¹² Hiihii yô, gbidye kwar sha inja iemberyolough shon. Fa wer igbenda ngi imôngo i u fatyô u eren iemberyolough sha inja yô. Nahan cii kpa, u ôron kwagh sha mimi yô, iemberyolough i ior kpishi ve eren nyian la ka i mgbough a akaa a Aôndo a ker a ihyom la, kua ipila man ahir a eren man ijimba kpaa. Sha nahan yô, gba u ú her a her tsuan iemberyolough i u er yô. Gbidye kwar sha mbampin mban nahan: Iemberyolough ne ia bende a mo nena? Ia tuur mo u eren ipila shin gban gesa u pilagh shin hemban soon tar wam a tar u ior mbageneve? (Anz. 3:31) Ia vihim inyaregh cicaa? Shin ia na mbagenev gbeev mbu nôngono? (Rom. 14:21) Iemberyolough i m tsough u eren ne ia na me hingir u za nyôron nongo a unô ioro? (Anz. 13:20) Iemberyolough ne ia mgbegham me lu a isharen i eren asoraboo?—Yak. 1:14, 15.

13, 14. Ka nyi i gbe u ú fa sha kwagh u vihin shighe kpishi u eren akaa a nan we msaanyol laa?

¹³ Gbidye kwar sha shighe u ka u vihi u eren iemberyolough la kpaa. Pine iyol  you wer: ‘Ka m vihi shighe kpishi u eren akaa a aa nam msaanyol la je m kera lu a shighe u zan mbamkombo shin duen kwaghpasen gaa?’ Aluer u tsua u vihin shighe kpishi sha kwagh u iemberyolough yô, u kera zua a msaanyol er man u er i akuma akuma ve ma u zough a mi la ga. Jighilii yô, ka mba ve eren iemberyolough akuma akuma la ve hemban zuan a mkunduyol u mimi ye. Sha ci u nyi? Sha ci u ve fa ér ve vande eren “akaa a a hembe lun a inja” la, nahan mba a ibo sha shighe u ve tee u eren akaa a nan ve msaanyol la ga.—Ôr Mbafilipi 1:10, 11.

¹⁴ Shin er alaghga a doo se u eren akaa a nan se msaanyol sha shighe gôgônan nahan kpa, kwagh ne una fatyô u paven se a Yehova. Kwagh ne yange er anmgbian u kwase ugen u lun anyom 20, mba yer un ér Kim, a kaa wener: “Yange m zaan uiniongo hanma shighe cii, sha hanma Tomataan man Sati man Lahadi. Nahan kpa m kav hegen mer akaa nga kpishi a eren, a a hembe lun a inja yô. U tesen ikyav yô, hegen m ngu eren pania, nahan ka m nder sha ahwa 6:00 pepe, m yem kwaghpasen, nahan me kera fatyô u za shin hen iniongo zan zan ihwa i môm shin ahwa ahar a sha use ga. M fa er i lu uiniongo cii ve lu mba bov ga yô. Nahan kpa, vea fatyô u danen se kpishi je. Nahan gba u se eren ve akuma akuma.”

15. Mbamaren vea wase ônov vev u tsuan akaa a aa na ve msaanyol nena?

¹⁵ Mbamaren mba a tom u nengen sha gbayol ve ma u tsombor ve, shi wasen tsombor ve u lun a Yehova kôôsôô, shi tesen u dooshima shi eren akaa a nan u msaanyol kpaa. Aluer u ngu ormaren yô, de luun or u kôron iemberyolough cii ihyom ga. Ka mimi, iemberyolough igen ka i doo ga. (1 Kor. 5:6) Kpa aluer u vande gbidyen kwar sha mi tsembelee yô, u fatyô u tsuan iemberyolough i ia va tsombor wou a msaanyol u mimi yô. * Aluer u er nahan yô, we vea tsombor wou cii ne za sha gbenda u ua wase ne ne kporom ikyua a Yehova yô.

16, 17. Ka ishimavihin i nyi mbamaren kpishi ve nyer kere, man er nan se fe ser Yehova fa ishimavihin ve laa?

¹⁶ Mlu u her atô u mbamaren vea ônov vev la ka a lu kangenaa kpishi. Yehova yange tôô mlu ne tese ikyav i dooshima u un lu a mi sha ior nav la. (Yes. 49:15) Sha nahan yô, shighe u or u hen tsombor wase nan undu Yehova yô, ka i vihi se kpen kpen. Anmgbian u kwase ugen u yange i dugh wan na u kwase ken tiônnongo kera yô, kaa ér: “Kwagh ne yange vihim pev, nahan m pine mer, ‘Er nan ve a undu Yehova?’ Ishima yam nam ibo, shi m war a iyol yam kpaa.”

¹⁷ Yehova fa er i vihi u ken ishima yô. Un kpa yange “vihi Un ken ishima” tsung zum u wan na u hiihii ken tsombor u uumace hemba un ato, kua uumace mba ve va lu cii man mngerem ma deemee la. (Gen. 6:5, 6) Ior mba imba kwagh ne i vande eren ve ga yô, alaghga vea kav er ka i vihi ken ishima la ga. Nahan cii kpa, doo u se de ser ieren i dang i or u hen tsombor wase, u i dugh nan ken tiônnongo kera la i̱ pav se a Yehova ga. Sha nahan yô, se wa ishima a mzungu u ka se nyôr ker shighe u or u hen tsombor wase nan undu Yehova la nena?

18. Gba u mbamaren vea war a ayol a ve shighe u wan ve nan undu Yehova la ga sha ci u nyi?

¹⁸ De waren a iyol you sha kwagh u a er la ga. Gba u hanma or u hen tsombor u nan er batisema cii nana “tôô ikyav mbi nan iyol i nan,” shi nana tsua u civir Yehova shin civir un ga. (Gal. 6:5) Jighilii yô, ka orisholibo la Yehova a pine  nan kwagh sha kwagh u nan tsough u eren la ye, ka we ga. (Esek. 18:20) Shi de waren a mbagenev kpaa ga. Tese icivir sha gbenda u Yehova a tsahan ior nav la. Hendan a Diabolo, i de lu mbatamen mba ve kuran tiônnongo la ga.—1 Pet. 5:8, 9.

19, 20. (a) Mbamaren mba i dugh ônov vev ken tiônnongo kera la vea er nan ve ishima a kera vihi ve ker yum ga? (b) Ka nyi ishimaverenkeghen mbamaren mban ka ve lu a mini?

¹⁹ Kpa aluer ishima vihi u a Yehova yô, kwagh ne una pav u a na. Jighilii yô, gba u or u hen tsombor wou u nan doo u ishima la nana nenge ér Yehova hemba doon we ishima a hanma kwagh ugen cii, kua tsombor wou je kpaa. Nahan kwagh u una wase ú u wan ishima a mlu ne yô, ka u zan hemen u lun a Yehova kôôsôô. De luun paleghaa a anmgbianev ou mba nomso man mba kasev mba ve lu civir Yehova sha mimi la ga. (Anz. 18:1) Pase Yehova ken msen er i lu u ken ishima la. (Ps. 62:7, 8) De keren atôakyaa a kôron ave, lun imôngo vea or u hen tsombor wou u i dugh nan kera la, er u tindin nan a loho sha Intanet nahan ga. (1 Kor. 5:11) Uve ityough ken tom u Yehova. (1 Kor. 15:58) Anmgbian u kwase u se er kwagh na sha heen la kaa ér: “M fa mer gba kpee u me uve ityough ken tom u Yehova shi me eren akaa a aa wasem u seer taver ikyav i m ye vea na la, sha er zum u wan wam u kwase una hide hen Yehova kpa me lu sha ian i wasen un yô.”

²⁰ Bibilo kaa ér dooshima “luun a ishimaverenkeghen sha akaa cii.” (1 Kor. 13:4, 7) Aluer u ver ishima wer yange sev a hungwa a av, or wou la nana cin a hide yô, ka kwaghbo ga. Hanma inyom yô, ior kpishi mba i dugh ve ken tiônnongo kera yô, ka ve gema ishima ve cin ve hide ken nongo u Yehova. Yehova lun a iyugh ishima a or u nan gem ishima la ga. Kpa ngu a gema a “kegh iyol u den kwaghbo.”—Ps. 86:5.

21, 22. U kange ishima u eren nyi a ian i u lu a mi i tsuan kwagh u ú soo laa?

²¹ Yehova gba uumace na ve ian i tsuan kwagh u ve soo u eren la. (Ôr Duteronomi 30:19, 20.) Kpa ian ne gema na se tom u vesen u tsuan akaa a se er la iyol yase. Doo u hanma Orkristu nana pine iyol i nan ér: ‘Ka gbenda u han m lu zan sha mini? M de mer tom shin iemberyolough gayô mlu u hen tsombor wam a pavem a Yehovaa?’

²² Dooshima u Yehova a lu a mi sha ior nav la gem tenger ga. Kwagh ngu u una pav se a Yehova ga, saa sea dondo gbenda u bo tseegh. (Rom. 8:38, 39) Nahan kpa, de lumun wer imba kwagh ne i er u ga! Kange ishima, de deen wer kwagh môm a pav u a Yehova ga. Ngeren u a dondo la una time sha akaa anyiin agen a i gbe u ú de wer a̱ pav u a Yehova ga yô.