1, 2. Ka nyi ia taver jighjigh u se ne ser Tartor la ua kure awashima u Aôndo sha ci u uumacee, man ka sha ci u nyi? (Nenge foto u a lu sha mhii u ngeren ne la.)

ER SE lu Mbashiada mba Yehova yô, ka se kaa ser ka Tartor u Aôndo tseegh ua sôr mbamzeyol asev cii ye, shi ka se pase ior mimi u hange hange u a lu ken Ruamabera ne sha gbashima. Shi ka se zua a ishimasurun kpishi ken ishimaverenkeghen i Tartor shon u ne se la. Nahan cii kpa, jighjigh u se ne ser Tartor la ngu kpôô kpôô shi ua kure awashima u i ver u ér u kure la taver tsung kpa? Ka nyi i ne ve i gbe u jighjigh u nan u se lu a mi sha kwagh u Tartor la una tenger ga?—Heb. 11:1.

² Ka Aôndo uhembanagee iyol na yange ver Tartor u Mesiya sha u kuren awashima na u gban akaa la ye. I ver Tartor ne sha imaagh ki tenger mayange ga, ka ian i Yehova a lu a mi i hemen vindi vindi la je la. Ka an nan lu Tor u Tartor ne? Ka unô vea hemen vea Tor ne? Vea hemen unô, shi ka nyi ia lu sha ikyev ve? Yehova er akaa a Tartor a hange hange ne sha tindi, sha ikyev i uikyurmbayan. Uikyurmbayan mban ka uiceghzwa mba sha tindi mba Yehova shin Wan na,  Yesu Kristu ve er yô. Aluer se time sha uikyurmbayan mban yô, se hemba fan er awashima u Yehova una kure yô, man er i hii ve se ne jighjigh ser Tartor la ua tenger ga la kpaa.—Ôr Mbaefese 2:12.

3. Ka nyi se time sha mi ken ngeren ne man u dondon laa?

³ Bibilo ôr kwagh u uikyurmbayan mba vesen ataratar mba ve zough sha kwagh u Tartor u Mesiya, u Kristu Yesu a hemen la. Ka ve je ne (1) ikyuryan i Aberaham man (2) ikyuryan i Tindi man (3) ikyuryan i Davidi man (4) ikyuryan i pristi i sha inja i Melkisedeki man (5) ikyuryan i he kua (6) ikyuryan i Tartor. De se time se nenge er uikyurmbayan mban ve gbe ve zough sha kwagh u Tartor shi ve wase u kuren awashima u Aôndo a lu a mi sha kwagh u uumace man tar ne la.—Nenge ngeren u a lu a itinekwagh ér, “ Er Aôndo Una Kure Awashima Na Yô” la.

4. Er i pase ken Genese nahan, ka akaa a nyi Yehova yange ôr sha kwagh u uumace?

⁴ Yehova yange gbe tar wase u doonashe ne, sha u uumace ve lu sha mi, been cii yô, a ôr akaa atar a gba u una er keng sha kwagh u uumace yô, ér: Aôndo una gba uumace sha ibeen na, shi uumace vea samber a Paradiso a tser tar cii shi vea mar ônov mba perapera vea iv ker, shi una yange uumace u yan kon u mfe u fan kwagh u dedoo man u bo la. (Gen. 1:26, 28; 2:16, 17) Lu akaa a gba u Aôndo una er cii je ne. Aôndo gbe or kera yô, lu akaa a ahar agen la tseegh hingir hange hange u a er kwagh sha mi sha u kuren awashima na ye. Nahan kpa, hii nan ve va gba u a due a uikyurmbayana?

5, 6. (a) Satan yange nôngo ér una vihi awashima u Aôndo nena? (b) Yehova yange er nena sha imbwase i Satan kaa un ken sule u Eden la?

⁵ Satan Diabolo yange hii ihyembeato sha u una vihi awashima u Yehova yô. A nôngo ér or a de ongo imo i Aôndo ga, sha u meen Ifa ér a ya atam a kon u mfe u fan kwagh u dedoo man u bo la. (Gen. 3:1-5; Mpa. 12:9) Kwagh u Satan er ne laha ian i Aôndo a lu a mi i hemen akaa a a gbe a cii la. Shi shighe kar yô, Satan kaa ér uumace mba civir Aôndo sha mimi sha ci u akaa a ve hen ér vea zua a mi hen ana la.—Yobu 1:9-11; 2:4, 5.

⁶ Nahan Yehova una er nyi sha imbwase i Satan kaa un ken sule u Eden la? Sha kpôô yô, Yehova yange una tim mbahembanato mbara yô, ma bee a ihyembeato i ve va a mi la. Kpa kwagh ne ma bunde awashima u Aôndo lu a mi ér ônov mba Adam man Ifa, mba ungwan imo na ve mar ve iv tar la. Nahan kpa, Orgban se u lun a kwaghfan la tim mbahembanato mban ga, a gema a ôr kwaghôron u profeti u doon tsung ugen, sha er hanma kwaghôron na cii una kure vough yô. Mba yer kwaghôron u profeti ne ér Ityendezwa i ken Eden.—Ôr Genese 3:15.

7. Ka vangertiôr u nyi ityendezwa i ken Eden la i ne se sha kwagh u iyô vea tsombor na?

⁷ Yehova yange ôr iyô ijir vea tsombor na sha ikyev i ityendezwa i ken Eden la. Iyô vea tsombor na la tile sha ityough ki Satan Diabolo man mba ve dondo un sha u kaan ér Aôndo kuma u hemen ga la cii. Aôndo u mimi la gema na tsombor u kwase na u sha la tahav mbu timin Satan. Sha nahan yô, ityendezwa i ken Eden la i pase gbenda u a kar a or u yange nan hii ihyembeato ken sule u Eden la, man mbamzeyol  mba ieren i nan ne i ve a mi la cii tseegh tsô ga, kpa shi i pase or u kwagh ne una er sha ikyev i nan la kpaa.

8. Se fatyô u ôron nyi sha kwagh u kwase la man tsombor na?

⁸ Ka unô vea lu tsombor u kwase la? A gba u tsombor la ua lu or u ken jijingi. Sha ci u nyi? Sha ci u tsombor ne ua “vihi agee” a Satan, u un kpa a lu or u ken jijingi u i nengen a na ga la. (Heb. 2:14) Sha nahan yô, a gba u kwase u una mar tsombor ne la kpa una lu kwase u ken jijingi. Er tsombor u iyô la lu ngeen seer a seer nahan kpa, kwase la man tsombor na yô, i fa kwagh ve ga je nôngo u kuman anyom 4,000, hii shighe u Yehova er ityendezwa i ken Eden la. Hen shighe ne, Yehova va a uikyurmbayan kpishi mba ve pase ior mba ve lu ken tsombor ne la, shi tese mbacivir un wang ér ka tsombor la una er tom a mi u been a zayol u Satan a ve uumace a mi la ye.

9. Ka nyi i lu ikyuryan i Aberaham laa, man yange i hii u eren tom shighe u hana?

⁹ Yehova yange er Satan ijir i kuugh anyom nga kar er dubu uhar nahan yô, a kaa a tertamen Aberaham ér a undu ya na u lu ken Ur, hen Mesopotamia la, a mough a yem ken tar u Kanaan. (Aer. 7:2, 3) Yehova kaa a na ér: “Due ken tar wou man ken ityô you man ken ya u teru, yem ken tar u Me tese u la. Me er u, ú hingir ikyurior i vesen, Me ver u doo doo, Me er iti you i̱ za gwa man shi ú lu iveren kpaa. Mba vea ver u doo doo yô, Mo kpaa Me ver ve doo doo; or u nana wa u ifan la, Mo kpaa Me wa nan ifan; ka ken a we je akuraior a sha won cii aa zua a iveren ye.” (Gen. 12:1-3) Ka kwagh u yange i hii ngeren sha kwagh u ikyur i Yehova ya a Aberaham la je la. I fa shighe u Yehova hii yan ikyur ne a Aberaham la jighilii ga. Kpa se fa ser  ikyuryan la yange i hii u eren tom ken inyom i 1943, cii man shighe u Kristu la. Lu shighe u Aberaham lu anyom 75, maa undu Haran, mough yem za per ifi u Uferati je la.

10. (a) Aberaham yange tese ér un ngu a jighjigh u nan u tenger ga la ken uityendezwa mba Aôndo nena? (b) Ka nyi Yehova yange seer pasen sha kwagh u tsombor u kwase laa?

¹⁰ Yehova yange kimbir ityendezwa i er a Aberaham ne acin imôngo, shi hanma kwa u una kimbir ityendezwa ne yô, a seer pasen un kwagh u ikyuryan shon la. (Gen. 13:15-17; 17:1-8, 16) Er Aberaham tese ér un ngu a jighjigh u nan u tenger ga la ken uityendezwa mba Aôndo, je lumun u nan nagh sha wan na u môm môm la yô, Yehova seer taver ikyuryan na sha u bumun a Aberaham ér una kure ityendezwa na kpee a bunde ga. (Ôr Genese 22:15-18; Mbaheberu 11:17, 18.) Ikyuryan i Aberaham la yange i hiin u eren tom cii yô, Yehova pase akaa a hange hange a sha kwagh u tsombor u kwase la kure kure. Tsombor la ua due ken Aberaham, ua ngee kpishi shi ua lu a ator, ua tim mbaihyomov mba Aôndo, shi ua lu iveren hen ior kpishi.

11, 12. Ruamabera tese ér ikyuryan i Aberaham la ia va kure sha gbenda u vesen nena, man kwagh la una lu se a inja nena?

¹¹ Er ikyuryan i Aberaham la yange i hii kuren sha mi shighe u ônov mba Aberaham ya dyakô u tar u ityendezwa la nahan cii kpa, Bibilo tese ér ikyuryan ne ia va seer van a averen ken hemen kpaa. (Gal. 4:22-25) Apostoli Paulu pase ér Yesu Kristu ka vegher u vesen u ken tsombor u Aberaham la. Mbakristu mba i shigh ve mkurem, ve lu iorov 144,000 mbara di mba vegher u sha uhar u ken tsombor u Aberaham la. (Gal. 3:16, 29; Mpa. 5:9, 10; 14:1, 4) Kwase u i er kwagh na ken Sule u Eden la di ka “Yerusalem u Sha,” u a lu nongo u Aôndo u ken jijingi, u i lu mbatyomov la. (Gal. 4:26, 31) Er ikyuryan i Aberaham la i tende zwa nahan, vor u kwase la ua va uumace cii a averen kpishi.

¹² Ikyuryan i Aberaham la tese ér ka u Tor man mba vea hemen a na ken Tartor u Aôndo la vea hemen kpee a bunde ga. Man ikyuryan la hingir imaagh ki Tartor u sha. (Heb. 6:13-18) Ikyuryan ne ia tsa a kuma shighe nena? Genese 17:7 kaa ér ka “ikyuryan i tsôron.” Ikyuryan ne ia za hemen zan zan Tartor u Mesiya ua kar timin mbaihyomov mba Aôndo shi icombor i sha won cii ia zua a iveren. (1 Kor. 15:23-26) Kpa averen a ikyuryan ne aa lu a tsôron. Ikyur i Aôndo ya a Aberaham la tese ér, Yehova kange ishima u kuren awashima na u a lu a mi ér uumace mba perapera ve ‘iv tar’ la.—Gen. 1:28.

13, 14. Ikyuryan i Davidi la na se vangertiôr sha kwagh u hemen u Mesiya ér nyi?

¹³ Ityendezwa i ken Eden man ikyuryan i Aberaham la tese se ér, hemen u Yehova har sha atindi na a perapera la hanma shighe cii. Nahan Tartor u Mesiya, u a ver la kpa har sha atindi na a perapera la. (Ps. 89:14) Tartor u Mesiya la ua va vihi, nahan shi a gba u a kar a u keraa? Ikyuryan igen i tese ér kwagh a lu nahan ga.

¹⁴ Yehova yange tôndo zwa a Davidi, u lu Tor u Iserael u tsuaa la. Mba yer ityendezwa la ér, ikyuryan i Davidi. (Ôr 2 Samuel 7:12, 16.) Yehova yange tôndo zwa a Davidi shighe u lu hemen ken Yerusalem la, ér Mesiya una due ken tsombor u Davidi. (Luka 1:30-33) Sha nahan yô, Yehova pase tsombor u Mesiya una va ker la jighilii. Yehova  kaa ér a lu wan u Davidi u i lu “kwagh na jim” la nana lu Tor u Tartor u Mesiya la ye. (Esek. 21:25-27) Ikyônough ki torough ki Davidi kia “taver her gbem,” sha ci u Yesu u a dugh ken tsombor u Davidi la una lu uma gbem sha won. Sha kpôô yô, tsombor u Davidi ua “lu gbem, ikyônough nagh ki torough kpaa kia lu . . . er ka iyange yô.” (Ps. 89:34-37) Mayange hemen u Mesiya la ua vihi ga, shi averen a ua va a mi la kpa aa lu a tsôron!

15-17. Sha kwagh u ikyuryan i pristi i sha inja i Melkisedeki la i kaa yô, ka ityom igen i nyi tsombor la ua ere, man ka sha ci u nyi?

¹⁵ Ikyuryan i Aberaham man i Davidi la cii tese ér tsombor u kwase la ua tema tor. Kpa sha u uumace cii ve zua a averen ne yô, a gba u ua er tom u tor tseegh ga, ua er tom u pristi kpaa. Ka pristi tseegh una fatyô u nan nagh ku i gbe u a na sha er a pase uumace cii sha ikyev i isholibo, nahan vea hide a lu ken tsombor u Yehova u sha won cii la ye. Yehova yange ya ikyur igen, sha er una kure awashima ne yô. Mba yer ikyuryan ne ér ikyuryan i pristi i sha inja i Melkisedeki.

¹⁶ Yehova yange pase Tor Davidi ér una ya ikyur vea Yesu sha akaa ahar. Hiihii yô, Yesu una ‘tema ken uwegh ku yanegh ku Aôndo,’ ape una zua a tahav mbu timin mbaihyomov nav la. Kwagh u sha uhar yô, Yesu una hingir “pristi u tsôron gbem sha won sha inja i mlu u tom u Melkisedeki la.” (Ôr Pasalmi 110:1, 2, 4.) Er nan ve a lu pristi “sha inja i mlu u tom u Melkisedeki” laa? Ka sha ci u cii man tsombor u Aberaham u va ya dyako u Tar u Ityendezwa la yô, Melkisedeki, Tor u Salem, “lu pristi u Aôndo Uhembansha.” (Heb. 7:1-3) Lu Yehova iyol na tsua un ér a lu tor man pristi ye. Ka Melkisedeki tseegh yange vande lun tor man pristi, cii man Yesu va shin tar ne ye. Heela tseegh ga, er orgen môm nan vande lun tor man pristi a Melkisedeki shin nan kar nan tile sha ityough nagh ga yô, i ôr kwagh na ér “ngu pristi gbem sha won.”

¹⁷ Er Yehova ya ikyur a Yesu yô, tese ér lu un iyol na ver Yesu pristi ye, man ka u una lu “pristi u tsôron gbem sha won sha inja i mlu u tom u Melkisedeki la.” (Heb. 5:4-6) Ikyuryan ne tese wang ér Yehova bum ér una er tom a Tartor u Mesiya la sha u kuren awashima na u lu a mi sha ci u uumace man tar ne sha hiihii la.

18, 19. (a) Uikyurmbayan mba se tim sha mi ne zua sha kwagh u Tartor nena? (b) Ka nyi se hen ken ngeren u dondon ne?

¹⁸ Er se hen ken uikyurmbayan mbara nahan, se nenge er ve zough sha kwagh u Tartor u Mesiya la, man er Tartor u Aôndo u har sha uikyurmbayan yô. Ityendezwa i ken Eden la tese ér Yehova una er tom a tsombor u kwase la sha u kuren awashima u a lu a mi sha ci u tar man uumace la. Ikyuryan i Aberaham la pase or u nana due ken tsombor u kwase la, man tom u nana er la kpaa.

¹⁹ Ikyuryan i i ya a Davidi la di seer tan iwanger sha kwagh u tsombor u Mesiya una due ker la. Ikyuryan la shi na Yesu ian i hemen tar ne gbem sha won. Ikyuryan sha inja i Melkisedeki la na yô, tsombor la ua er tom u pristi. Nahan kpa, Yesu una er tom u wasen uumace ve hingir vough la tswen ga. Mbagenev kpa mba mba i tsough ve ér ve va er tom u tor man u pristi la a na imôngo yô. Vea due hana? Se hen kwagh ne ken ngeren u dondon ne.