ITINEKWAGH I TAMEN | MBAKPENEV VEA NDER—KWAGH A FATYÔ U EREN NAHANA?
A Er Nan Ve U Fa Wer Mimi Je Mbakpenev mba Va Nderene?
Aluer or hen ér mbakpenev vea va nder yô, nan tsume? Apostoli Paulu yange hen nahan ga. Jijingi yange mgbegha un nger ér: “Aluer ka sha uma u hegen ne tseegh man se lu a ishimaverenkeghen sha Kristu yô, se hemba kôron mhôônom a ior cii. Kpa mimi je i nder Kristu shin mbakpenev, ka iyiagh ki tsutswaagh ken mba ve kpe kera la.” (1 Mbakorinte 15:19, 20) Paulu yange nenge ér ka u a va nder mbakpenev shin ku keng a bunde ga. Lu mnder u i nder Yesu shin ku la je tese wang ér kwagh a va lu nahan ye. (Aerenakaa 17:31) Lu sha ci u nahan man Paulu yila Yesu ér “iyiagh ki tsutswaagh” ye, sha ci u lu un i hii nderen sha u a za lu uma gbe sha won ye. Er i kaa ér ka Yesu i hii nderen un shin ku yô, kwagh ne tese ér mbagenev kpa a va nder ve shin ku.
Yobu yange kaa a Aôndo ér: “Tom u ave Ou ua sar U.”—Yobu 14:14, 15
Ityôkyaa igen kpa ngi i u fatyô u nan jighjigh wer mbakpenev vea va hide a nder yô. Yehova ka Aôndo u mimi. “Aôndo . . . eren aie ga.” (Titu 1:2) I gbe je Yehova ngu a er aie ga shi una er aie ga. Aluer a er iceghzwa i nderen ior shin mbakpenev, je shi a tese ér una fatyô u eren kwagh nahan, ve una kera kure iceghzwa shon ga yee? Kwagh a fatyô u lun nahan ga!
Hii nan ve Yehova a soo u va nderen ior shin kuu? Ka sha ci u se doo un ishima. Yobu yange pine ér: “Aluer or á kpe yô, shi nana lu uma?” A hide a na mlumun ér: ‘Ú yila, mo me gema me vengese; tom u ave Ou ua sar U.’ (Yobu 14:14, 15) Yobu yange na jighjigh taveraa ér a sar Ter na u sha u a lu a dooshima la u nderen un shin ku. Aôndo gema kposo hegene? “Mo TER M gem kposo ga.” (Malaki 3:6) Hegen kpa sar Aôndo u nderen ior shin ku sha u ve za hemen u lun gbang gbang shi lun saan saan kpaa. Kape Ter u wan u nan a saa ku kpa a sar nan u wan shon ma a hidi ma a lu uma je la. Mkposo u Aôndo man ter la yô, Aôndo ngu a tahav mbu kuren mbaawashima nav.—Pasalmi 135:6.
Ku ka zayol u vesen, kpa Aôndo ngu a gbenda u vough u va karen a ku kera
Yehova una na wan na tahav una hide mba ve lu zungwen ku u ior vev hegen la a iember i been mayange ga. Yesu di nenge kwagh u mnder u shin ku la nena? Cii man Yesu a nder Lasaru shin ku yô, yange nenge er anmgbianev mba Lasaru mba kasev kua ahuraior a na lu vaan yô, nahan un kpa “vaa.” (Yohane 11:35) Sha shighe ugen la, Yesu nenge er wan u kwasecôghol ugen ken gar u Nain, u lu wan na u môm môm la kpe yô. “Mhôônom kôr Un a na, A kaa a na ér: De vaan ga.” Her je maa Yesu nder wan u kwasecôghol shon. (Luka 7:13) Kwagh ne tese ér ku u or ka u sôr Yesu ken ishima shi a zungwe kpishi. A saan Yesu iyol kpishi shighe u una va uumace mba ve lu zungwen hegen la a iember yô!
I lu nahan kwagh er u, u zungwe kpishi vee? Alaghga u nenge wer ma kwagh ngu u karen a ku kera ga. Kpa kwagh ngu u una fatyô u karen a ku kera yô, ka mnder u Yehova una va nder ior shin ku sha ikyev i Wan na la. Fa wer Yehova soo ér we u nenge kwagh u un lu va eren sha u karen a ku kera la. A soo ér we u va lu uma, shi i saan we iyol u hiden zuan ishigh a ior ou mba ve kpe la. Hen er ne lu eren akaa imôngo sha u wan iyol i va lun uma gbem sha won ve a lu ne yô; mayange or a kera kpe ga!
Lionel, u se vande ôron kwagh na ken ngeren ugen la kaa ér: “Ken masejime yô, m hen kwagh u mnder u shin ku. Sha hiihii la taver mo u nan jighjigh, shi or u ôrom kwagh ne la kpa m na un jighjigh ga. Kpa m nengen ken Bibilo yô, m mase kaven er kwagh a lu nahan yô! Torough mo iyol u hiden nengen a ter u ngôm, u a kpe la.”
U soo u seer zuan a iwangere? A saan Mbashiada mba Yehova iyol u tesen we kwagh u mnder u shin ku ken Bibilo you, er i hii ve ve ne jighjigh ér mba va nderen ior shin ku yô. *
^ par. 9 Za ôr takerada u i yer ér Bibilo Tese Ér Nyi Jimi? la, ityough 7. Ka Mbashiada mba Yehova ve gber u ye.
Kwagh Ugen u Alaghga Shi Una Doo U Yô
IYOUKURA (I HENEN)
Er U Wa Ishima Shighe u Ikyar u A Saa Ku Yô
Nom shin kwase ka una kpe or yô, i nyoon nan ken ishima tsung, shi mnyoon u ken ishima ne a lu a nan ica i gba. Ôr nenge er i hii ve mnder u shin ku u i er kwagh na ken Mkaanem ma Aôndo la a lu kwagh u nan or ishimasurun yô.
