ЭҖЕМ маңа: «Сен нәме үчин ата-бабаларыңа сежде этмеҗек болярсың? Олар болмадык болса, сен дүнйә инмездиң, муңа дүшүнмейәрмиң? Сениң олара сылаг-хорматың ёкмы? Ата-бабаларымызың дәп-дессурларындан нәдип йүз өврүп билҗек? Олара хормат гойман, бизиң динимиз ялан дийҗек болярмың?» дийди. Соңра ол сакланып билмән, аглап башлады.

Эҗем хич вагт бейле сөзлери айтмаярды. Онсоңам, ол Мукаддес Язгылар окувыны өзи гечмеҗек болуп, мениң башламагыма ругсат берипди. Мен эҗеме хемише гулак асярдым. Бу гезек онуң диенини этмезлик гаты кын дүшсе-де, Ехованың гөвнүнден турмак үчин шейле этмели болдум. Худайың көмеги болмадык болса, мен муны башармаздым.

Япониядакы адамларың көпүси ялы, бизем буддизм динине уйярдык. Эмма Ехованың Шаятлары билен бары-ёгы ики ай окув геченимден соң, Мукаддес Язгыларың хакыкатдыгына долы гөз етирдим. Мен гөкде Атамың бардыгыны билип, ол барада көпрәк өвренесим гелди. Эҗем икимиз өвренен затларым барада хөвес билен пикир алышярдык. Мен Патышалык залында дынч гүнлери гечирилйән душушыклара гатнап башладым. Хакыката хас чуңңур дүшүнип, эҗеме мундан бейләк буддистлериң дәп-дессурларыны берҗай этмеҗекдигими айтдым. Эмма онуң гарайшы бирден үйтгеди. Ол: «Машгаламызда ата-бабаларыны сыламаян адамың болмагы улы масгарачылык» дийди. Ол мениң Мукаддес Язгылар окувыны гечмегими ве душушыклара гатнашмагымы бес этмеги талап этди. Эҗем шейле затлары айдар дийип, ятсам-турсам келләме-де гелмейәрди. Ол дүйбүнден башга адам ялы болды.

Мен Эфеслилер китабының 6-нҗы бабындан Ехованың эне-атама гулак асмагымы ислейәндигини билдим. Какамам эҗемиң тарапыны тутды. Илки мен эне-атама гулак ассам, оларам мени диңләр ве машгаламызда агзыбирлик болар дийип пикир этдим. Онсоңам, ёкары класлара гечмек үчин сынаг табшырмагың вагты етип гелйәрди, мен оңа тайярланмалыдым. Шонуң үчинем мен эҗем билен какама үч айлап йыгнак душушыкларына гитмеҗекдигими айтдым. Эмма үч айдан соң душушыклара ене-де гатнап башлаҗакдыгымы Ехова сөз бердим.

Йөне мениң гелен карарым нәдогры болуп чыкды. Мунуң ики себәби бар. Биринҗиден, мен үч айың ичинде гарайшыма хич зат тәсир этмез өйтдүм. Эмма бираз вагт геченсоң, мен рухы тайдан говшап, Еховадан гитдигиче  дашлашып башладым. Икинҗиден, эҗем билен какам маңа эглишик этмегиң дерегине, өңкүденем бетер топулып, хакыкы сежде билен баглы әхли затдан эл чекмегими талап этдилер.

Мен Патышалык залында машгаласында гаршылыга душ гелйән доган-уялар билен гүррүңдеш болдум. Олар Ехованың мени голдаҗакдыгына ынандырдылар (Мат. 10:34—37). Олар эне-атамың халас болмагына көмек эдип билҗекдигими айтдылар, бу маңа гүйчли тәсир этди. Шонда мен Ехова бил баглар ялы гызгын дога эдип башладым.

Машгаламда дүрли ёллар билен гаршылык гөркезйәрдилер. Эҗем маңа ялбарып гөрди, дүшүндирип гөрди. Мен көпленч сесими чыкармаярдым. Эмма гепләп башладыгым, херимиз өзүмизиңкини догры этҗек болуп, җаныгып башлаярдык. Хава, эҗем бираз көшешер ялы, мен онуң дуйгуларыны ве ынанян затларыны гөз өңүнде тутмалыдым. Энем-атам мени хич ере чыкармаҗак болуп, өйүң көп ишлерини этдирйәрдилер. Кәвагт олар мениң дашымдан гулплап, иймәге-де хич зат бермейәрдилер.

Эҗем башгалардан хем көмек сораярды. Ол хатда мекдепдәки мугаллымыма хем йүз тутды, эмма ол бизиң меселәмизе гошулмады. Шейле-де эҗем мени өз башлыгының янына элтип, әхли динлериң пейдасыздыгына ынандырҗак болды. Өйде болса доган-гарындашларымыза җаң эдип, аглап көмек сораярды. Мен муңа гаты гынанярдым, эмма йыгнак яшулулары бу ягдайың говы тарапы барада ойланмага хөвеслендирдилер. Себәби эҗемиң өзем билмән, шол адамлара вагыз эдйәрди.

 Соңра университете гирмек меселеси йүзе чыкды. Энем-атам говы дурмушда яшамагымы исләп, аладамы эдйәрдилер ве мен говы иш тапып билерин дийип тама эдйәрдилер. Биз бу меселе барада асуда гүрлешип билмездик, шол себәпли какам билен эҗеме өз максатларымы бирнәче гезек хат аркалы дүшүндирмекчи болдум. Какам муңа гаты гахарланып: «Эгер сен иш тапып билерин дийип пикир эдйән болсаң, эртире ченли тап, болмаса-да өйден гит» дийип хайбат атды. Мен бу барада Ехова дога этдим. Эртеси гүн вагза чыканымда, ики саны уя чагаларына гошмача сапак бермегими хайыш этдилер. Какам иш тапандыгыма бегенмеди, ол мениң билен гүрлешмегини гойды ве соңабака мени әсгермән башлады. Эҗем болса маңа: «Ехованың Шаяды боланыңдан, җенаятчы болан болсаң говы боларды» дийди.

Кәте Ехова мениң энем-атамың ислегине шейле гаршы гитмегими ислейәрмикә дийип пикир эдйәрдим. Йөне көп дога эдип, Мукаддес Язгылары окап, Ехованың сөйгүси барада ойлананымда, ягдая башгача середип башладым ве энем-атамың аладамы эдйәндигине дүшүндим. Ехова маңа догры гарайышда болмага ве кын ягдайдан баш алып чыкмага көмек этди. Шейле-де вагза нәче көп чыкдыгымча, шонча-да көп шатлык тапярдым. Шейдип, мен пионер болмагы максат эдиндим.

Кәбир уялар мениң пионер болмак ислейәндигими билип, энем-атам көшешйәнчә гарашмагы маслахат бердилер. Мен Худайдан акылдарлык сорап, дога этдим, гөзлег гечирдим, өз ниетлерими барладым ве рухы тайдан етишен доган-уялар билен гүррүңдеш болдум. Шейдип, Ехованың гөвнүнден турмак ислейәндигиме гөз етирдим. Онсоңам, пионер гуллугыны соңа гояным билен, энем-атамың гарайшы үйтгәр дийип анык айдып болмаярды.

Мен мекдебиң соңкы йылында окаяркам, пионер гуллугына башладым. Бираз вагтдан соң, вагызчыларың етмейән еринде гуллук этмеги максат эдиндим. Эмма эҗем билен какам мениң өйден гитмегими ислемедилер. Шол себәпли мен 20 яшаянчам гарашдым. Йөне эҗем мен барада биынҗалыкланмаз ялы, филиала хат язып, мени Японияның гүнортасына беллемеклерини хайыш этдим. Себәби ол ерде бизиң гарындашларымыз яшаярды.

Шол ерде гуллук эдйәркәм, мен энчеме берекетлериң эеси болдум, себәби окув гечен адамларымың көпүси сувда чокундырылды. Мен хас көпрәк гуллук этмек максады билен, иңлис дилини хем өвренйәрдим. Бизиң йыгнагымызда ики саны йөрите пионер доган барды. Оларың ыхласыны ве башгалара көмек эдишини гөрүп, менем йөрите пионер болмагы йүрегиме дүвдүм. Шол дөвүрде эҗем ики гезек агыр кеселледи. Мен хер гезегем онуң аладасыны этмек үчин өйүмизе гитдим. Эҗем муңа дийсең хайран галды. Шейдип, онуң гарайшы кем-кемден өзгерип башлады.

Шондан еди йыл геченсоң, ёкарда агзалан йөрите пионерлериң бири, ягны Атсуши атлы доган маңа хат язды. Ол маңа дурмуш гурмагы теклип эдип, бу бабатда мениң пикирими билмек ислейәндигини языпдыр. Мениң Атсуши догана хич хили дуйгым ёкды ве онуң хем маңа болан дуйгусы бардыр дийип пикир этмәндим. Бир айдан соң онуң билен хас якындан танышмага разыдыгымы яздым. Икимизиң көп затда гарайшымызың дең гелйәндигине, долы вагтлы гуллук этмек максадымызың бардыгына ве ислендик ягдайда-да гуллук этмәге тайындыгымыза гөз етирдик. Вагтың гечмеги билен, биз дурмуш гурдук. Мен тоюмыза эҗем билен какамың ве башга-да бирнәче гарындашларымызың гелендигине дийсең бегендим.

Биз умумы пионер болуп гуллук эдйәркәк, Атсушини этрап гөзегчисиниң көмекчиси  эдип белледилер. Тизден биз башга-да берекетлери алдык. Бизи йөрите пионер, соңра болса этрап гөзегчилик гуллугына белледилер. Биз этрабымыза дегишли әхли йыгнаклары айланып чыканымыздан соң, филиалдан җаң эдип, бизиң Непалда этрап гөзегчиси болуп гуллук этмәге разылыгымызы сорадылар.

Эҗем билен какам мениң узак ере гитмегиме нәхили гарарка дийип биынҗалыкландым. Шонуң үчинем олара җаң этдим. Какам маңа: «Гитҗек болян ериң-ә говы ер экен» дийип җогап берди. Шондан бары-ёгы бир хепде өң, какамың достларының бири оңа Непал барада китап берипдир, ол болса: «Өз-ә, барып гөрәймели ер экен» дийипдир.

Непалың мәхирли яшайҗыларының арасында гуллук эдйәркәк, ене-де бир берекет алдык. Бизиң этрабымыза Бангладеш хем гошулды. Ол гаты голайда ерлешсе-де, көп затларда Непалдан дүйбүнден тапавутланярды. Вагыз этмек үчин хем дүрли усуллары уланмалы болярды. Шондан бәш йыл геченсоң, бизи ене-де Япония белледилер. Биз ол ерде хәзирем этрап гөзегчилик гуллугыны довам эдйәрис.

Мен Японияда, Непалда ве Бангладешде гуллук эдип, Ехова барада көп затлары өврендим. Бу юртларың хер бириниң үйтгешик тарыхы ве медениети болуп, адамларың херсиниң өзүне махсус хәсиети бар. Мен Ехованың хер бир адамың аладасыны эдип, оны өзүне кабул эдйәндигини, голдаяндыгыны ве паталаяндыгыны гөрдүм.

Өзүм барада айтсам, Ехова маңа берекет берип, өзүни танамага, оңа гуллук этмәге ве говы месихчи янёлдаш тапмага көмек этди. Худай мениң әхли гелйән карарларыма ёлбашчылык этди. Шол себәпли мениң машгалам ве Худай билен достлуклы гатнашыгым бар. Эҗем билен ене-де җора боланым үчин Ехова өрән миннетдар. Мен Худай билен достлашып, эҗем биленем җора боланыма дийсең бегенйәрин.