Mahigit 30 taon nang ginagamit ng mga tao ang Ebanghelyo nina Mateo, Marcos, at Lucas nang isulat ni Juan ang ulat niya. Pero marami pa ring naiambag si Juan sa rekord ng buhay at ministeryo ni Jesus; mga 90 porsiyento ng ulat niya ay hindi mababasa sa tatlong iba pang Ebanghelyo.

Sa Ebanghelyo lang ni Juan binanggit ang naging buhay ni Jesus bago siya maging tao. Sinimulan ni Juan ang ulat niya sa mahalagang katotohanan na umiiral na si Jesus noon pa man, at pagkatapos ay iniulat din niya ang patotoo ni Juan Bautista at ni Jesus mismo. (Ju 1:1-3, 29, 30; 3:12, 13; 8:58) Mayroong anim na himala na sa ulat lang ni Juan mababasa, kasama na ang unang himala ni Jesus nang gawin niyang alak ang tubig at ang huli niyang himala matapos siyang buhaying muli nang makahuli ng maraming isda ang mga apostol.

Lumilitaw na isa si Juan sa mga unang naging alagad ni Juan Bautista na ipinakilala kay Jesus, at isa siya sa unang apat na inimbitahan ni Kristo na maging tagasunod niya. (Mar 1:16-20; Ju 1:35-39) Si Juan, na posibleng pinsan ni Jesus, ay naging malapít na kaibigan ni Jesus, at nakilala siya bilang “alagad na minamahal ni Jesus.” (Ju 13:23; 21:20, 24) Nakita ni Juan ang napakalupit na pagpatay kay Jesus, kung kailan inihabilin ni Jesus kay Juan ang kaniyang ina. Naunahan din ni Juan si Pedro nang magpunta sila sa libingan para alamin kung nabuhay na talagang muli si Jesus.​—Ju 19:26, 27; 20:2-4.

Imbes na itampok ang pagtuturo ni Jesus sa publiko, maraming iniulat si Juan na pakikipag-usap ni Jesus sa mga indibidwal, sa mga alagad man niya o sa mga kumakalaban sa kaniya. Napakapersonal ng pagkakalarawan ni Juan kay Jesus, at iniulat niya ang pinakamahabang panalangin ni Jesus sa kaniyang Ama na mababasa sa Bibliya.​—Ju 17:1-26.

Napakaespesyal ng Ebanghelyo ni Juan dahil ipinapakita nito ang masidhing pag-ibig sa pagitan ng Ama at ng Anak. Ipinapakita rin nito na ang mga taong nagiging kaisa nila ay nagkakaroon ng napakagandang kaugnayan sa kanila. Mas maraming beses ginamit ni Juan ang mga salitang Griego para sa “pag-ibig” at “umibig” kaysa sa pinagsama-samang paglitaw nito sa tatlong iba pang Ebanghelyo.

Naniniwala ang maraming iskolar na ang isang maliit na piraso ng papiro ng Ebanghelyo ni Juan (ilang talata ng kabanata 18), na tinatawag na Rylands Papyrus 457, ang pinakaluma sa mga natitirang manuskritong Griego ng Kristiyanong Griegong Kasulatan. Mula ito noong mga unang bahagi ng ikalawang siglo. Ang pagkakaroon ng kopya ng Ebanghelyo ni Juan noong panahong iyon sa Ehipto, kung saan natagpuan ang pirasong ito, ay matibay na ebidensiya na ang “Mabuting Balita Ayon kay Juan” ay talagang isinulat ni Juan noong unang siglo C.E.

Isinulat ni Juan ang kaniyang Ebanghelyo para ang mga makakabasa nito ay “manampalataya . . . na si Jesus ang Kristo, ang Anak ng Diyos,” at “magkaroon ng buhay sa pamamagitan ng pangalan niya.”​—Ju 20:31.