Para sa ilan, wala nang mas malala pa sa mga panahong hindi ka makalabas ng bahay dahil umuulan—wala kang magawa at wala kang mapuntahan. “Kapag gano’n,” ang sabi ng kabataang si Robert, “nakaupo lang ako, at hindi ko alam kung ano’ng gagawin ko.”

Naramdaman mo na rin ba iyan? Kung oo, makakatulong sa iyo ang artikulong ito!

•  Ang dapat mong malaman

•  Ang puwede mong gawin

•  Ang sinasabi ng ibang kabataan

• Baka hindi makatulong ang mga gadyet.

  Puwedeng pampalipas-oras ang pag-i-Internet, pero hindi nito mapalalabas ang pagiging malikhain mo at lalo ka lang mababagot. “Mari-realize mo na nakatingin ka lang sa screen pero hindi gumagana ang isip mo,” ang sabi ni Jeremy, edad 21.

  Sang-ayon diyan ang kabataang si Elena. “Hindi masyadong nakakatulong ang mga gadyet,” ang sabi niya. “Pansamantala ka lang nitong inilalayo sa realidad. Kapag ibinaba mo na ang gadyet mo, pakiramdam mo, lalo ka lang na-bore!”

• Mahalagang magkaroon ng tamang pananaw.

  Kapag marami ka bang ginagawa, hindi ka na mababagot? Depende iyan sa kung gaano ka kainteresado sa ginagawa mo. Halimbawa, sinabi ng kabataang si Karen: “Para sa akin, napaka-boring mag-aral, kahit ang daming ipinapagawa sa amin buong araw. Dapat gusto mo ang ginagawa mo para hindi ka mabagot.”

Alam mo ba? Hindi problema ang mga panahong wala kang magawa. Para itong magandang lupa kung saan mapalalago mo ang iyong pagkamalikhain.

Maging interesado sa iba’t ibang bagay. Makipagkaibigan. Magsimula ng bagong hobby. Mag-research tungkol sa mga bagong bagay. Ang mga taong interesado sa iba’t ibang bagay ay kadalasang hindi nababagot mag-isa—at hindi rin boring na kasama!

Simulain sa Bibliya: “Ang lahat ng masumpungang gawin ng iyong kamay, gawin mo ng iyong buong kapangyarihan.”—Eclesiastes 9:10.

“Kakasimula ko lang mag-aral ng Mandarin Chinese, at dahil araw-araw akong nagpapraktis, na-realize ko na na-miss ko pala y’ong ganitong pag-aaral. Gustong-gusto ko y’ong ganito. Lagi akong nag-iisip at nagagamit ko ang panahon ko sa makabuluhang bagay.”—Melinda.

Magpokus sa iyong tunguhin. Kapag naiintindihan mo kung bakit mo ginagawa ang isang bagay, lalo kang magiging interesado rito. Hindi rin magiging boring para sa iyo kahit ang pag-aaral kapag nakikita mo kung para saan ito.

Simulain sa Bibliya: “Sa tao ay wala nang mas mabuti kundi ang . . . magdulot ng kabutihan sa kaniyang kaluluwa dahil sa kaniyang pagpapagal.”—Eclesiastes 2:24.

“Bago matapos ang school year, walong oras akong nag-aaral araw-araw dahil kailangan kong maghabol. Boring? Hindi, dahil nakatutok ako sa ginagawa ko. Nakapokus ako sa graduation kaya mas determinado ako sa ginagawa ko.”—Hannah.

Tanggapin ang hindi mo na mababago. Kahit sa pinaka-exciting na mga gawain, may pagkakataon din na paulit-ulit lang ang ginagawa mo. At kahit ang pinakamatalik mong mga kaibigan ay puwedeng mag-cancel ng lakad ninyo, kaya bigla kang mawawalan ng gagawin. Sa halip na malungkot o magmukmok, sikapin mong maging positibo.

Simulain sa Bibliya: “Ang may mabuting puso ay laging may piging.”—Kawikaan 15:15.

“Sabi ng kaibigan ko, i-enjoy ko ang panahong mag-isa lang ako. Mahalaga raw na matuto tayong maging balanse—may panahon tayong kasama ang iba at may panahon din tayo para sa sarili natin.”—Ivy.