INDONESIA ke naga ya ditlhaketlhake di ka nna 17 000. Batho ba koo ba itsewe thata ka go nna batho ba ba botsalano, ba ba pelotelele, ba ba maitseo le ba ba ratang go amogela baeng.

Dijo tse di tlwaelegileng kwa Indonesia di akaretsa raese mmogo le dijo tse dingwe—tse gantsi di tsenngwang ditswaiso—le maungo. Kwa mafelong mangwe, malapa a tlwaetse gore fa go jewa a nne fa fatshe mo mesemeng e e logilweng, mme ba ja ka seatla, ba ina se ba se jang mo raeseng. Batho ba le bantsi ba kwa Indonesia ba bolela gore fa dijo di jewa ka tsela eno di nna monate thata.

Batho ba Indonesia ba rata go taka, go bina le mmino. Anklong ke seletswa se se tlwaelegileng sa mmino sa kwa Indonesia; se dirilwe ka matlhaka a bampuse a a golegetsweng mo foreiming. Matlhaka ano a bofiwa ka tsela e e dirang gore a dire molodi o o rileng fa a tlharakanngwa. Batho ba ba tshamekang anklong ba tshwanetse go dirisana mmogo gore go tswe molodi o o rileng, mme mongwe le mongwe wa bone a tlharakanya seletswa sa gagwe ka nako e e tshwanetseng.

Go fitlha ka lekgolo la bo15 la dingwaga C.E., Indonesia e ne e tlhotlhelediwa thata ke Bohindu mme go tswa foo ya tlhotlhelediwa ke Bobuda. Ka lekgolo la bo16 la dingwaga, Boiselamo bo ne bo setse bo tlhotlheleditse setso sa kwa  Indonesia. Bayuropa ba ba neng ba batla ditswaiso ba ne ba goroga ka lekgolo la bo16 la dingwaga mme ba ne ba lere madumedi a a ipitsang a Bokeresete mo nageng eno.

Basupi ba ga Jehofa ba itsiwe mo lefatsheng lotlhe ka tiro ya bone ya go ruta Baebele mme ga ba bolo go nna gone kwa Indonesia go tloga ka 1931. Gone jaanong, palo ya bone kwa Indonesia e feta 22 000 mme ba leka go fitlhelela batho ba ba sa utlweng mo ditsebeng. Bosheng jaana, batho ba feta 500 ba ile ba tla pokanong e e kgethegileng ya go gopola loso lwa ga Jesu Keresete e e neng e tshwerwe ke Basupi ba ga Jehofa ka puo ya diatla.