KA Laboraro, January 24, 2018, go ile ga dirwa kitsiso e e kgethegileng kwa lelapeng la bethele ya kwa United States le Canada. Malapa ao a Bethele a ile a itsisiwe gore Mokaulengwe Kenneth Cook Jr. o tlhomilwe go nna leloko la Setlhopha se se Laolang sa Basupi ba ga Jehofa.

Mokaulengwe Cook o goletse kwa Pennsylvania kwa U.S.A. O simolotse go ithuta Baebele le moithutikaene pele a fetsa sekolo mme a kolobediwa ka June 7, 1980. O nnile mmulatsela wa ka metlha ka September 1, 1982 mme ka October 12, 1984, a lalediwa go ya go direla kwa Bethele ya Wallkill kwa New York.

Mokaulengwe Cook o feditse dingwaga tse 25 a direla mo lefapheng la go gatisa le mo ofising ya Bethele. O ile a nyala Jamie ka 1996 mme le ene a lalediwa go tla go direla kwa Bethele. Ka December 2009, Mokaulengwe le Kgaitsadi Cook ba ile ba isiwa kwa Lefelo la Thuto la Watchtower le le kwa Patterson, New York mme Mokaulengwe Cook o ile a newa kabelo ya go direla mo lefapheng le le arabang dipotso tsa babadi. Moragonyana Mokaulengwe le Kgaitsadi Cook ba ile ba kopiwa go boela kwa dikagong tse di kwa Wallkill mme ka April 2016, ba ile ba isiwa kwa Brooklyn, New York. Morago ga dikgwedi tse tlhano, ba ile ba fudugela kwa ntlokgolong ya lefatshe lotlhe e e kwa Warwick, New York. Ka January 2017, Mokaulengwe Cook o ile a tlhomiwa go nna mothusi mo Komiting ya Bakwadi ya Setlhopha se se Laolang.