“Ke Tla Tshwanelwa ke go Goa ke Kopa Thuso ka Lobaka lo lo Kae?”

Jayne o ne a bua jaana a lela: “Ke batla go ikhutsa ditlhabi!” O ne a na le kankere mme e ne e ntse e anama mo mmeleng otlhe. Ba lelapa la gagwe le ditsala ba ne ba eletsa e kete ba ka kgona go mo fodisa le go fedisa botlhoko jo bo ngomolang pelo jo a neng a bo utlwa. Ba ne ba rapela Modimo gore a mo thuse. A o ne a tla ba reetsa? A o ne a amega ka bone?

MODIMO o bona maemo a batho ba lebaneng le one. Lefoko la gagwe e leng Baebele, la re: “Popo yotlhe e nna e fegelwa mmogo le go nna mo botlhokong mmogo.” (Baroma 8:22) Modimo o a itse gore go na le dimilione tsa batho ba jaaka Jayne, ba utlwang botlhoko letsatsi le letsatsi, e ka tswa e le mo mmeleng, mo maikutlong kgotsa mo tlhaloganyong. Modimo o bona dimilione di le 800 tsa batho ba ba robalang ka tlala letsatsi le letsatsi, dimilione tsa ba bangwe ba ba bogang ka ntlha ya tirisodikgoka mo malapeng gape o bona le batsadi ba bantsi ba ba tshwenyegileng ka isagwe le tshireletsego ya bana ba bone. A o kile wa ipotsa gore a Modimo o tla dira sengwe go rarabolola mathata ano? Boammaaruri ke gore, e re ka rona re batla go thusa batho ba re ba ratang, a Modimo ene a ka se ka a batla go thusa batho ba a ba bopileng?

Fa e le gore o a tle o ipotse dipotso tseo, ga o nosi. Dingwaga di feta 2 600 tse di fetileng, monna yo o ikanyegang e bong Habakuke o ne a ikutlwa jaaka batho ba bantsi gompieno ba ikutlwa, mme o ne a botsa Modimo jaana: “Ao tlhe Jehofa, ke tla tshwanelwa ke go goa ke kopa thuso ka lobaka lo lo kae, mme o sa utlwe? Ke tla ikuela kwa go wena ka lobaka lo lo kae gore o thuse mo thubakanyong, mme o sa boloke? Ke ka ntlha yang fa o dira gore ke bone se se utlwisang botlhoko, mme o nnela go leba a e leng matshwenyego fela? Le gone ke ka ntlha yang fa thopo le thubakanyo di le fa pele ga me, mme ke ka ntlha yang fa go nna le komano, e bile ke ka ntlha yang fa go tsoga kgogakgogano?” (Habakuke 1:2, 3) Habakuke yo e neng e le moporofeti wa Mohebera, o ne a bona thubakanyo e e tsitsibanyang mmele le tirisodikgoka e e neng e dirwa ke batho ba motlha wa gagwe. Le gompieno, batho ba ba pelotlhomogi ba utlwisiwa botlhoko ke ditiragalo tse di ntseng jalo tse di diregang letsatsi le letsatsi.

A Modimo o ne a tsaya gore Habakuke o tshwenyega thata go sa tlhokege? Nnyaa le e seng! O ne a reetsa dipotso tsa monna yono yo o neng a tshwenyegile thata mo maikutlong mme a mo gomotsa le go mo kgothatsa. Jehofa Modimo o ne a nonotsha tumelo ya ga Habakuke ka go mo solofetsa gore o tla fedisa pogo. Le wena molaetsa wa Modimo o o nayang tsholofelo o ka go gomotsa, fela jaaka o ile wa gomotsa Jayne le ba lelapa la gagwe. Ditlhogo tse di latelang di tla araba dipotso tseno: Re ka tlhomamisega jang gore tota Modimo o amega ka rona? Modimo o tla dira eng go fedisa pogo, mme o tla dira seo leng?