“He naʻe ʻikai ke foaki mai ʻe he ʻOtuá kiate kitautolu ha laumālie loto-foʻi, ka ko e laumālie ʻo e mālohi mo e ʻofa mo e ʻatamai lelei.”​—2 Tīmote 1:7, Liliu Tohi Tapu Māmani Foʻoú.

 “He nae ikai foaki e he Otua kiate kitautolu ae laumalie oe manavajii; ka koe malohi, moe ofa, moe loto fakabotoboto.”​—2 Tīmote 1:7, Paaki Motuʻa.

 ʻOku lava ke tokoniʻi ʻe he ʻOtuá ha tokotaha ke ne ngāue loto-toʻa ke fai ʻa e meʻa ʻoku tonú. ʻOku ʻikai fiemaʻu ʻe he ʻOtuá ha taha ke ne fakatupulekina ʻa e “loto-foʻi”​—ko ha fakakaukau ʻikai lelei ʻa ia ʻe lava ke ne taʻofi ha tokotaha mei hono fai ʻa e ngaahi meʻa ʻoku fakahōifua kiate Iá.

 Fakakaukau ki he ʻulungaanga ʻe tolu ʻoku ʻomai ʻe he ʻOtuá ʻa ia ʻoku lave ki ai ʻi he veesi ko ení ʻe tokoni ia ki hono ikuʻi ʻa e manavasiʻí pe loto-foʻí.

 “Mālohi.” Kuo lava ʻa e kau Kalisitiané ʻo tauhi loto-toʻa ki he ʻOtuá neongo ʻa e fehangahangai mo e ngaahi tuʻunga mo e fili fakatuʻutāmakí. ʻOku ʻikai ke nau tauholomui koeʻuhi ko ʻenau manavahē. (2 Kolinitō 11:23-27) ʻOku anga-fēfē ʻenau ikuʻi iá? ʻOku pehē ʻe he ʻapositolo ko Paulá: “ʻOku ou malava ʻa e meʻa kotoa pē koeʻuhi ʻoku ou maʻu ʻa e ivi fakafou ʻi he tokotaha ko ia ʻokú ne ʻomai kiate au ʻa e mālohí.” (Filipai 4:13) ʻOku foaki ʻe he ʻOtuá ki heʻene kau lotú ʻa e “mālohi ʻoku mahulu atu ia ʻi he tuʻunga anga-mahení” ke nau ikuʻi ha faʻahinga pole pē.​—2 Kolinitō 4:7.

 “ʻOfa.” Ko e ʻofa loloto ki he ʻOtuá ʻokú ne tokoniʻi ha Kalisitiane ke tuʻu loto-toʻa ki he meʻa ʻoku totonú. ʻI he tuʻunga meimei tatau, ko e ʻofa ki he niʻihi kehé ʻokú ne ueʻi ha Kalisitiane ke ne fakamuʻomuʻa ʻa e fiemaʻu ʻa e niʻihi kehé ʻi heʻene fiemaʻú tonu, neongo ʻene fehangahangai mo e fakafepakí pe fakatuʻutāmakí.​—Sione 13:34; 15:13.

 “ʻAtamai lelei.” ʻI he Tohi Tapú, ko e ʻatamai leleí ʻoku ʻuhinga ia ki he malava ʻo ha Kalisitiane ke ne fai ha ngaahi fili fakapotopoto makatuʻunga ʻi he Tohi Tapú. Ko ha tokotaha ʻatamai lelei ʻokú ne fakapotopoto mo fakaʻatuʻi neongo ʻa e fehangahangai mo e ngaahi faingataʻá. ʻE lava ke ne fai ha ngaahi fili ʻoku tapua atu ai ʻa e ngaahi fakakaukau ʻa e ʻOtuá, pea ʻiloʻi ko hono vahaʻangatae mo e ʻOtuá ʻoku mahuʻinga ange ia ʻi he ngaahi fakakaukau ʻa e niʻihi kehé.

 Ko e tohi Tohi Tapu ʻo Ua Tīmoté naʻe tohi ia ʻe he ʻapositolo ko Paulá ki hono kaungāmeʻa mamae mo e kaungāngāue ko Tīmoté. ʻI he tohi ko ení, naʻe fakalototoʻaʻi māfana ai ʻe Paula ʻa e talavou ko Tīmoté ke ne hokohoko atu ʻene ngāue mālohi ʻi he ngāue fakafaifekaú. (2 Tīmote 1:1, 2) Ko Tīmoté ʻoku ngalingali ko ha tokotaha naʻe mā, pea naʻe hoko nai ia ʻo taʻotaʻofi ʻene fakahoko kakato ʻa e ngaahi ngāue ʻi he fakatahaʻanga Kalisitiané. (1 Tīmote 4:12) Ka naʻe fakamanatu ʻe Paula kia Tīmote naʻá ne maʻu ha meʻaʻofa​—ko ha vāhenga ngāue makehe ʻi he fakatahaʻangá. Naʻá ne enginaki kia Tīmote ke ʻoua ʻe toumoua hono ngāueʻaki hono mafai ko ha ʻovasia ʻi he fakatahaʻangá, ʻi hono malangaʻi ʻa e ongoongo leleí, pea ʻi hono kātekina ʻa e ngaahi faingataʻá koeʻuhi ko ʻene tuí.​—2 Tīmote 1:​6-8.

 Neongo ko e ngaahi leá ni naʻe tohi ia kia Tīmote, ka ʻoku fakapapauʻi mai heni ki he faʻahinga kotoa ʻoku nau loto ke tauhi ki he ʻOtuá te Ne tokonaki mai ʻa e tokoni ʻoku nau fiemaʻú ke nau hoko ʻo lavameʻa, ʻo tatau ai pe pē ko e hā ʻa e polé.