‘Oku Tokanga Mai Hotau Tokotaha-Fakatupu ‘Ofá
1. ‘AI ‘E HOTAU TOKOTAHA-FAKATUPÚ KE HOPO ‘A E LA‘Ā
‘E lava ke ke sioloto atu ki he mo‘ui ‘i ha māmani ‘oku ‘ikai ke ‘i ai ha la‘ā? ‘Oku tokonaki ‘e he la‘aá ha ivi ki he ‘ulu‘akaú ke fa‘u‘aki ‘a e lau‘i‘akau, matala‘i‘akau, fua‘i‘akau, nati mo e tenga‘i‘akau. ‘Okú ne toe ‘ai ‘a e ‘ulu‘akaú ke nau mimisi hake ‘a e vai mei he kelekelé ‘i honau aká pea ‘ohake ia ki hono laú pea toki tuku ange atu ki he ‘eá ko e mao.
2. ‘OMAI ‘E HOTAU TOKOTAHA-FAKATUPÚ ‘A E ‘UHA
Ko e ‘uhá ko ha me‘a‘ofa mahu‘inga mei he ‘Otuá ‘okú ne ‘ai ke malava ‘e he māmaní ‘o fakatupu mai ha me‘akai ke tau kai. ‘Oku ‘omai ‘e he ‘Otuá ‘a e ‘uha mei he langí mo e ngaahi fa‘ahita‘u mahu, ‘o ne fakamākona kitautolu ‘aki ‘a e me‘akai pea fakafonu hotau lotó ‘aki ‘a e fiefia.
3. TOKONAKI MAI ‘E HOTAU TOKOTAHA-FAKATUPÚ ‘A E ME‘AKAI MO E VALA
‘Oku tokolahi ‘a e ngaahi tamai ‘oku nau loto-mo‘ua ke tokonaki ha me‘akai mo e vala fe‘unga ma‘a honau fāmilí. Fakatokanga‘i ‘a e me‘a ‘oku lea‘aki ‘e he Folofolá: “Siofi fakalelei ‘a e fanga manupuna ‘o e langí; ‘oku ‘ikai te nau tūtuu‘i pe utu pe fa‘oaki feleoko, ka ‘oku fafanga kinautolu ‘e ho‘omou Tamai fakahēvaní. ‘Ikai ‘oku mou mahu‘inga ange kimoutolu ‘iate kinautolu?”—Mātiu 6:25, 26.
“Ako mei he ngaahi lile ‘o e vaó, ‘i he anga ‘o ‘enau tupú . . . ; ka ‘oku ou tala atu kiate kimoutolu na‘a mo Solomone ‘i he kotoa ‘o hono lāngilangí na‘e ‘ikai ke teunga‘ia ia ‘o hangē ko ha taha ‘o e ngaahi lilé ni. Kapau leva ‘oku fakateunga pehē ‘e he ‘Otuá ‘a e ‘akau ‘o e vaó . . . , ‘ikai ‘e lahi ange ‘ene fakateunga kimoutolú?”—Mātiu 6:28-30.
Koe‘uhi ‘oku lava ke tokonaki mai ‘e he ‘Otuá ‘a e me‘akai mo e vala, ko hono mo‘oní ‘e lava foki ke ne tokoni‘i kitautolu ke tau ma‘u ‘a e ngaahi fiema‘u pau kehe ki he mo‘uí. Kapau te tau feinga ke fai ‘a e finangalo ‘o e ‘Otuá, te ne tāpuaki‘i ‘etau feinga ke tō ha me‘akai pe te ne tokoni‘i kitautolu ke ma‘u ha ngāue ke lava ai ‘o tau fakatau ‘a e me‘a ‘oku tau fiema‘ú.—Mātiu 6:32, 33.
Ko e mo‘oni, ‘oku tau ma‘u ‘a e ngaahi ‘uhinga lelei ke ‘ofa ai ki he ‘Otuá ‘i he‘etau fakakaukau atu ki he la‘aá, ‘uhá, fanga manupuná mo e matala‘i‘akaú. ‘E lāulea ‘a e kupu hokó ki he founga kuo fetu‘utaki ai ‘a hotau Tokotaha-Fakatupú mo e tangatá.
