‘OKU ‘ikai ke ako‘i mai ‘e he Tohi Tapú ia ‘oku ‘i ai ha ‘āngelo tauhi ‘o e tokotaha taki taha. Ko e mo‘oni, na‘e tu‘o taha ‘a e pehē ‘e Sīsū: “Vakai ke ‘oua na‘a mou ta‘etoka‘i ha taha ‘o e fa‘ahinga si‘í ni, he ‘oku ou tala atu kiate kimoutolu ko ‘enau kau ‘āngelo ‘i hēvaní ‘oku nau mamata ma‘u pē ki he fofonga ‘o ‘eku Tamai ‘oku ‘i hēvaní.” (Mātiu 18:10) Kae kehe, ‘i he ‘ikai ke fakahu‘unga ‘o pehē ‘oku ‘i ai ha ‘āngelo tauhi ‘o e tokotaha taki taha, na‘e pehē pē ‘e Sīsū ia ‘oku mahu‘inga‘ia mo‘oni ‘a e kau ‘āngeló ‘i he tokotaha taki taha ‘o ‘ene kau ākongá. Ko ia ai, ‘oku ‘ikai ke fai ta‘efakapotopoto mo ta‘etokanga ‘e he kau lotu mo‘oní ha me‘a fakatu‘utāmaki, ‘i he fakakaukau ‘e malu‘i kinautolu ‘e he kau ‘āngelo ‘a e ‘Otuá.

‘Oku ‘uhinga iá ‘oku ‘ikai tokoni ‘a e kau ‘āngeló ia ki he fa‘ahinga ‘o e tangatá? ‘Ikai. (Saame 91:11) ‘Oku fakapapau‘i mālohi ‘e he ni‘ihi kuo tokonaki mai ‘e he ‘Otuá ha malu‘i mo ha tataki fakae‘āngelo kiate kinautolu. Ko Kenneth, na‘e lave ki ai ‘i he kupu kamatá, ‘okú ne ma‘u ‘a e ongo‘i tatau. Neongo he‘ikai lava ke tau fakamatematē ai, ‘okú ne tonu nai. Kuo fa‘a sio ‘a e Kau Fakamo‘oni ‘a Sihová ki he fakamo‘oni ‘o e tokoni fakae‘āngeló ‘i he‘enau fai ‘a e ngāue fakamalangá. Kae kehe, koe‘uhi ‘oku ta‘ehāmai ‘a e kau ‘āngeló, he‘ikai lava ke tau tala ‘a e lahi ‘o e ngāue‘aki kinautolu ‘e he ‘Otuá ‘i hono tokoni‘i ‘a e fa‘ahinga tāutaha ‘i he tafa‘aki kehekehe. Ka neongo ia, he‘ikai hala ke tau fakamālō ki he Māfimafi-Aoniú ki ha tokoni pē kuó ne tokonaki mai nai.​—Kolose 3:15; Sēmisi 1:17, 18.