Ki he Kau Loma 2:1-29
2 Ko ia ai, ʻoku ʻikai ala fakatonuhiaʻi koe, ʻe tangata, ʻo tatau ai pē pe ko hai koe,+ kapau ʻokú ke faifakamaau; he ʻi hoʻo fakamāuʻi ha taha kehé, ʻokú ke fakahalaiaʻi ai koe, koeʻuhi ko koe ko ia ʻokú ke fai ʻa e fakamāú ʻokú ke tōʻongaʻaki ʻa e ngaahi meʻa tatau.+
2 Pea ʻoku tau ʻiloʻi ko e fakamaau ʻa e ʻOtuá ʻoku fai ia ʻo fehoanaki mo e moʻoní ki he faʻahinga ʻoku nau tōʻongaʻaki ʻa e ngaahi meʻa ʻoku tuha mo e tauteá.
3 Ka ʻokú ke fakakaukau koā koe, ʻe tangata, lolotonga hoʻo fakamāuʻi ʻa e faʻahinga ʻoku nau tōʻongaʻaki ʻa e ngaahi meʻa ko iá ka ʻokú ke fai ia ʻe koé, te ke hao ai ʻi he fakamaau ʻa e ʻOtuá?
4 Pe ʻokú ke taʻetokaʻi koā ʻe koe ʻa e hulu fau ʻo ʻene anga-leleí+ mo ʻene anga-fakamaʻumaʻú+ mo ʻene kātakí,+ koeʻuhi ʻoku ʻikai te ke ʻiloʻi ko e ʻOtuá ʻi heʻene anga-leleí ʻokú ne feinga ke taki atu koe ki he fakatomalá?+
5 Kae fakatatau ki hoʻo loto-fefeká mo ho loto taʻefakatomalá, ʻokú ke tuku tauhi ai kiate koe ʻa e houhau ki he ʻaho ʻo e houhaú pea mo hono fakaeʻa ʻa e fakamaau māʻoniʻoni ʻa e ʻOtuá.+
6 Pea te ne totongi ki he tokotaha taki taha ʻo fakatatau ki heʻene ngaahi ngāué:+
7 Ko e moʻui taʻengata ki he faʻahinga ʻoku nau kumi ki he ngeia mo e lāngilangi mo e moʻui taʻefaʻaʻauhá+ ʻaki ʻa e kātaki ʻi he ngāue ʻoku leleí;
8 kae kehe, ko e faʻahinga ko ia ʻoku fekeʻikeʻí pea ʻoku ʻikai te nau ʻaʻeva ʻo fehoanaki mo e moʻoní ka nau tōʻongaʻaki ʻa e meʻa ʻoku taʻemāʻoniʻoní, ʻe hoko ki ai ʻa e houhau mo e tuputāmaki.+
9 ʻE hoko ʻa e mamahi mo e faingataʻaʻia ki he tokotaha kotoa pē ʻokú ne fai ʻa e meʻa ʻoku koví, ʻo muʻomuʻa ki he Siú pea pehē foki ki he Kalisí;
10 ka ko e ngeia mo e lāngilangi mo e melino ki he tokotaha kotoa ʻokú ne fai ʻa e meʻa ʻoku leleí, ʻo muʻomuʻa ki he Siú+ pea pehē foki ki he Kalisí.+
11 He ʻoku ʻikai ha filifilimānako ʻi he ʻOtuá.+
12 He ko e faʻahinga kotoa ʻoku nau faiangahala taʻeʻiai ha laó te nau ʻauha atu foki neongo ʻa e taʻeʻiai ha laó;+ ka ko e faʻahinga kotoa ʻoku nau faiangahala ʻi he malumalu ʻo e laó ʻe fakamāuʻi kinautolu ʻe he laó.+
13 He ko e kau fanongo ki he laó ʻoku ʻikai ko e faʻahinga ia ʻoku māʻoniʻoni ʻi he ʻao ʻo e ʻOtuá, ka ko e faʻahinga ʻoku nau fai ki he laó ʻe lau kinautolu ʻoku nau māʻoniʻoni.+
14 He ʻi he taimi ʻoku hanga ai ʻe he kakai ʻo e ngaahi puleʻangá, ʻa ia ʻoku ʻikai te nau maʻu ʻa e laó,+ ʻo fai fakanatula ʻa e ngaahi meʻa ʻo e laó, ko e kakaí ni, neongo ʻa e ʻikai te nau maʻu ʻa e laó, ʻoku nau hoko ko e lao pē kiate kinautolu.
15 Ko e faʻahinga tonu kinautolu ʻoku nau fakahāhā kuo hiki ʻi honau lotó ʻa e kakano ʻo e laó, lolotonga ia ʻoku kaungā-fakamoʻoni honau konisēnisí mo kinautolu, pea ʻi heʻenau ngaahi fakakaukaú tonu ʻoku nau fai ai honau fakahalaiaʻí pe naʻa mo hono fakatonuhiaʻí.
16 ʻE eʻa ʻa e ngaahi meʻá ni ʻi he ʻaho ʻa ia ʻe hanga ai ʻe he ʻOtuá fakafou ʻia Kalaisi Sīsū ʻo fakamāuʻi ʻa e ngaahi meʻa fakapulipuli ʻa e faʻahinga ʻo e tangatá,+ ʻo fakatatau ki he ongoongo lelei ʻoku ou talakí.
17 Kapau leva ʻokú ke lau ko ha Siu koe+ pea ʻokú ke falala ki he laó peá ke pōlepole ʻi he ʻOtuá,
18 pea ʻokú ke ʻiloʻi ʻa hono finangaló peá ke tali ʻa e ngaahi meʻa ʻoku mātuʻaki leleí koeʻuhi kuo fakahinohinoʻi* koe ʻi he Laó,+
19 pea ʻokú ke tuipau ko ha tataki koe ki he kau kuí, ko ha maama ki he faʻahinga ʻi he fakapoʻulí,
20 ko ha tokotaha fakatonutonu ki he kau taʻefakapotopotó, ko ha faiako ki he fānau īkí, pea ʻi hono maʻu ʻa e mahino tefito ki he ʻilo mo e moʻoni ʻoku ʻi he Laó—
21 kae kehe, ʻokú ke akoʻi ʻa e niʻihi kehé, ko e hā leva ʻoku ʻikai te ke akoʻi ai koé?+ ʻOkú ke malanga ʻo pehē, “ʻOua ʻe kaihaʻa,”+ ko e hā leva ʻokú ke kaihaʻa ai koé?
22 ʻOkú ke malanga ʻo pehē, “ʻOua ʻe tono,”+ ko e hā leva ʻokú ke tono ai koé? ʻOkú ke fehiʻa ʻi he ngaahi ʻaitolí, ko e hā leva ʻokú ke kaihaʻa ai mei he ngaahi temipalé?
23 ʻOkú ke pōlepole koeʻuhi ko e laó, ko e hā leva ʻokú ke fakaongoongokoviʻi ai ʻa e ʻOtuá ʻaki hoʻo maumauʻi ʻa e Laó?
24 He “ko e huafa ʻo e ʻOtuá kuo fai ʻa e laukovi ki ai ʻi he lotolotonga ʻo e ngaahi puleʻangá koeʻuhi ko kimoutolu,” ʻo hangē tofu pē ko ia kuo tohí.+
25 Ko e kamú,+ ko hono moʻoní, ʻoku ʻaongá pē kapau ʻokú ke tauhi ʻa e laó;+ ka ʻo kapau ko ha tokotaha koe ʻokú ke maumauʻi ʻa e laó, kuo hoko hoʻo kamú ko e taʻekamu.
26 Kapau leva ʻoku tauhi ʻe ha tokotaha taʻekamu+ ʻa e ngaahi fiemaʻu māʻoniʻoni ʻa e Laó, ʻe lau leva ʻene taʻekamú ko e kamu, ʻikai ko ia?+
27 Pea ko e tokotaha kuo taʻekamu fakaesinó, ʻi heʻene fakahoko ʻa e Laó, te ne fakamāuʻi koe, ʻa koe ko ia ʻokú ke maumauʻi ʻo e laó neongo hoʻo maʻu ʻa e lao kuo tohí pea mo hoʻo ʻosi kamú.
28 He ko e Siu moʻoní ʻoku ʻikai fekauʻaki ia mo e meʻa ʻoku hā ki tuʻá,+ pea ko ʻene kamú ʻoku ʻikai fai ia ki hono sinó.+
29 Ka ko ha Siu ia ʻa ia ʻoku Siu ʻi lotó,+ pea ko ʻene kamú ko e kamu ʻo e lotó+ ʻi he laumālié ʻo ʻikai ʻi ha lao kuo tohi.+ Ko e fakahīkihikiʻi ʻo e tokotaha ko iá ʻoku haʻu ia mei he ʻOtuá, ʻo ʻikai mei he kakaí.+
Fakamatala ‘i Lalo
^ Pe “fakahinohinoʻi tala ngutu.”
