Ndikuwiya mu banja la Katolika ku Rochester ku New York. Apapi ŵangu angupatukana nde ndi vyaka 8. Mwaviyo, mazuŵa nganyaki mukati mwa sabata ndachijanga ndi ama mu kanyumba kamana ko ajanga ndipu kukumaliya kwa sabata ndachijanga ndi ada wo ajanga ku malu ko kwajanga ŵanthu akukhupuka. Asani ndiwona mo ama asuzgikiyanga kulera ŵana 6, ndakhumbanga kovya banja lidu mwakuja munthu wakukhupuka.

Ada akhumbanga kuti vinthu vindiyendiyengi umampha pa umoyu wangu. Mwaviyo, angunozga kuti ndiluti ku sukulu yinyaki yakutchuka yo yasambizanga ŵanthu va kuwonere mahotelu. Ndinguyiyanja ndipu ndingwamba kusambira ndi chiŵanaŵana kuti Chiuta wamuka pempheru langu lakuti ndije wakukhupuka kweniso wakukondwa. Ndingusambira vakukwaskana ndi kuwonere mahotelu, marangu nga bizinesi, kweniso kwa vyaka vinkhondi ndawoneriyanga chuma cha makampani ndichigwira ntchitu pa hotelu ya Casino ku Las Vegas, Nevada.

Pa nyengu yo ndenga ndi vyaka 22, ndenga wachiŵi ku munthu yo wenga bwana pa hotelu ya Casino. Ŵanthu andiwonanga kuti nde ndi chuma kweniso kuti vinthu vitindiyende umampha ndipu kanandi ndaryanga chakurya chamampha kweniso ndamwana moŵa wakudula ukongwa. Anyangu wo ndagwiranga nawu ntchitu akambanga kuti, “Kumbuka kuti ndalama ndichu chinthu chakukhumbika ukongwa pacharu.” Yiwu awonanga kuti ndalama ndizu zingawovya munthu kuja ndi likondwa chayilu.

Ntchitu yangu yasazgangapu kupereka chakurya ku ŵanthu akukhupuka wo azanga ku Las Vegas kuzitchova juga. Chinanga kuti yiwu ŵenga akukhupuka kweni akondwanga cha. Ndingwamba kuleka kukondwa. Kweniso chinanga kuti ndapanganga ndalama zinandi, ndafipanga mtima ukongwa ndipuso ndafuŵizanga tulu. Ndingwamba kuŵanaŵana kuti umoyu wangu ulivi phindu. Ndati ndafika pa kuguŵa nawu umoyu wangu, ndingupemphera kwaku Chiuta ndipu ndingumufumba kuti: “Kumbi ndi nunkhu ko ndingasaniya likondwa chayilu?”

Pa nyengu yeniyi, azichi ŵangu ŵaŵi wo anguja Akaboni aku Yehova, angusamiya ku Las Vegas. Chinanga kuti ndakananga mabuku ngawu, ndiguzomera kuŵerenga nawu Bayibolu langu. Mu Bayibolu lo ndenga nalu, chechosi cho Yesu wangukamba chingulembeka ndi mazu ngayera. Chifukwa chakuti ndazomerezanga chechosi cho Yesu wangukamba, kanandi azichi ŵangu akambiskananga nani vakukwaskana ndi Yesu. Ndaŵerenganga so Bayibolu pakundija.

Vinthu vinandi vo ndinguŵerenga vingundiziziswa. Mwakuyeruzgiyapu, Yesu wangukamba kuti: “Pakupemphera ungawerezangawerezanga ŵaka cha nge mo ŵanthu amitundu yinyaki achitiya, pakuti aŵanaŵana kuti Chiuta waŵavwengi chifukwa cha mazu ngawu nganandi.” (Mateyu 6:7) Kweni wasembi wangundipaska chithuzi chaku Yesu ndipu wangukamba kuti asani ndipemphera ku chithuzi chenichi mwakuwerezawereza maulendu 10 pempheru la Ambuya, kweniso kupemphera maulendu 10 mapempheru nga kuthamika Mariya, Chiuta wandipaskengi ndalama zosi zo ndikhumba. Ndinguziŵa kuti asani ndipempherengi mapempheru ngenanga ndikuti ndiwerezengiwerezengi ŵaka mazu ngambula ntchitu. Ndinguŵerenga so mazu ngaku Yesu ngakuti: “Mungadananga weyosi cha pacharu chapasi kuti ada, chifukwa Awusemwi mbamoza wo ŵe kuchanya.” (Mateyu 23:9) Mwaviyo, ndingujifumba kuti, ‘Ntchifukwa wuli ini ndi Akatolika anyangu tidana asembi kuti “Ada”?’

Ndati ndaŵerenga buku la mu Bayibolu la Yakobe ndingwamba kuŵanaŵaniya ukongwa vo ndachitanga ndi umoyu wangu. Mu chaputala 4, Yakobe wakulemba kuti: “Kumbi muziŵa cha kuti kuŵa pa ubwezi ndi charu nkhujiŵika pa urwani ndi Chiuta? Mwaviyo, weyosi yo wakhumba kuŵa pa ubwezi ndi charu watijipanga kuŵa murwani waku Chiuta.” (Yakobe 4:4) Ndingukwaskika ukongwa ndi vo vesi 17 likamba kuti: “Asani munthu munyaki waziŵa mo wangachitiya chinthu chamampha, kweni watichichita cha, ndikuti wachita ubudi.” Pavuli paki ndingudana azichi ŵangu ndipu ndinguŵakambiya kuti ndikhumba kuleka kugwira ntchitu ku hotelu ya Casino chifukwa yachitiskanga kuti ndichitengeku vinthu vo ndingwamba kuwona kuti vambula kwenere, kusazgapu kutchova juga kweniso mbunu.

Ndakhumbanga kuja pa ubwezi wakukho ndi Chiuta ndipuso ndakhumbanga kuti ndiyanjanengi ndi apapi ŵangu kweniso abali ŵangu. Mwaviyo, ndingwamba kusintha vinthu pa umoyu wangu. Kweni kuchita venivi kwenga kupusu cha. Mwakuyeruzgiyapu, ku hotelu ya Casino ndingupaskika mwaŵi wakuti ndigwirengi ntchitu yo yatingi yichitiskengi kuti ndilondiyengi ndalama zinandi ukongwa. Kweni ndati ndayipemphere nkhani yeniyi, ndingusankha kuleka umoyu wenuwu. Mwaviyo, ndinguleka ntchitu yo ndagwiranga. Ndingunozga chipinda chinyaki cha nyumba ya ama ndipu ndingwamba bizinesi yimana yakupanga mapepala nga mu resitilanti ngakulongo vakurya kweniso mitengu yaki.

Chinanga kuti Bayibolu lingundiwovya kuziŵa vinthu vo ndakhumbikanga kuŵika pamalu ngakwamba, kweni ndalutangaku cha ku maunganu nga Akaboni aku Yehova. Mzichi wangu wangundifumba chifukwa cho nditiŵatinkhiya Akaboni aku Yehova. Ndingumumuka kuti: “Chifukwa chakuti Yehova Chiuta winu wamalisa mabanja. Nyengu yija yo ndingachitiya vinthu limoza ndi a mu banja lidu mpha Khrisimasi kweniso pa nyengu yakukumbukiya zuŵa lakuwiya, kweni yimwi muchitaku cha maholidi ngenanga.” Mzichi wangu munyaki wangwamba kuliya ndipu wangundifumba kuti: “Utuŵa pani mazuŵa nganyaki? Tikhumba kuti tijengi nawi nyengu zosi. Kweni yiwi ukhumba kuti uzengi nyengu ya maholidi pe chifukwa uwona kuti nyengu yeniyi pe ndiyu njakukhumbika.” Mazu ngenanga ngangundikwaska limu ndipu nani ndingwamba kuliya.

Ndinguziŵa mo Akaboni aku Yehova atanjiya mabanja ngawu kweniso kuti ndanangisanga. Mwaviyo, ndingwamba kuwungana pa Nyumba ya Ufumu. Kwenuku ndingukumana ndi Kevin, musambizi walusu ndipu wangwamba kusambira nani Bayibolu.

Kevin ndi muwolu waki ajanga umoyu wambula kukhumba vinandi kuti asaniyengi nyengu yinandi yakusambiziya ŵanthu Bayibolu. Yiwu ŵenga ndi ndalama zakukwana kuti alutiyi ku Africa ndi ku Central America, ko anguchiwovya kuzenga maofesi nga nthambi nga Akaboni aku Yehova. Yiwu akondwanga ukongwa ndipuso ayanjananga. Mumtima pe ndingukamba kuti: ‘Nani ndikhumba kuzija umoyu wenuwu.’

Kevin wangundilongo vidiyo yo yilongo mo ŵanthu akondwe ndi uteŵeti wa umishonale ndipu nani ndingusankha kuti ndazamuchita uteŵeti wenuwu. Mu 1995, ndati ndasambira Bayibolu kwa myezi 6, ndingubatizika kuja Kaboni waku Yehova. Mumalu mwakupempha Chiuta kuti wandipaski chuma, ndingwamba kupemphera kuti: “Mungandipaskanga ukavu cha pamwenga chuma chinandi.”—Nthanthi 30:8.

Sonu nde wakukhupuka ukongwa. Nde wakukhupuka chifukwa chakuti nde ndi ndalama cha, kweni chifukwa chakuti nde pa ubwezi wakukho ndi Chiuta. Ndingukumana ndi Nuria ku Honduras ndipu tingutorana. Tosi limoza taja tichichita uteŵeti wa umishonale ku Panama ndi ku Mexico. Vo Bayibolu likamba vauneneska nadi. Ilu likamba kuti: “Vitumbiku vaku Yehova ndivu vichitiska kuti munthu wakhupuki, ndipu Iyu wasazgiyapu urwirwi cha”!—Nthanthi 10:22.