Ndikwamba kwanja vinthu va muchilengedu kutuliya pa unamana wangu. Banja lidu layanjanga kuluta kunyanja kweniso kuchiwona malu ngakutowa kufupi ndi ko tajanga, kutawuni ya Jyväskylä ku Central Finland. Nditanja so vinyama. Ndeche mwana ndakhumbanga kuvumbatiya galu kweniso mbwiyawu weyosi yo ndawona! Ndichikuwa, vandiŵaŵanga ukongwa asani ndiwona nkhaza zo ŵanthu achitiyanga vinyama. Pati pajumpha nyengu, ndingusere gulu lo lavikiliyanga vinyama, ndipu mugulu lenili ndingukumana ndi ŵanthu wo ŵenga ndi maŵanaŵanu nge ngo ndenga nangu.

Mugulu lenili tafwiyangapu kuvikiliya wananga wa vinyama. Tapharazganga mauthenga kweniso tachitiskanga viwoneseru vakuyukiya mashopu ngo ngagulanga weya wanyama kweniso malu ngakupimiyaku nyama. Tingwambisa so gulu linyaki lakuvikiliya vinyama. Chifukwa chakuti tachitanga chechosi kuti tifiski vilatu vidu, kanandi takwechananga ndi ŵaraŵara aboma. Ndingumangikapu ndi kutoreke kukhoti kananandi waka.

Kusazgiyapu pa kuvikiliya nyama, vandiŵaŵanga so ukongwa asani ndiwona masuzgu ngakupambanapambana pacharu chosi. Venivi vinguchitiska kuti ndiyambi kuchita vinthu ndi mawupu ngakupambanapambana nge wupu wa Amnesty International ndipuso wa Greenpeace. Ndajiperekanga ndi nthazi zangu zosi pakuchita vo mawupu ngenanga ngakhumbanga. Ndavikiliyanga ŵanthu wo asuzgikanga ndi ukavu, nja kweniso masuzgu nganyaki.

Kweni pati pajumpha nyengu ndinguwamu kuti ndingachisintha cha charu. Chinanga kuti mawupu ngenanga ngafiskanga kumalisa masuzgu ngamanangamana, kweni masuzgu ngakulungakulu ngawonekanga kuti ngakuliyakuliya. Ndawonanga nge kuti nthazi zinyaki ziheni zawumbiliya charu chosi ndipu palivi yo wapilipita kuti walimbani nazu. Yapa ndingujiwona nge kanyere kambula nthazi.

Ndinguguŵa ndati ndawona kuti palivi cho ndingachitapu, ndipu ndingukumbuka Chiuta ndipuso Bayibolu. Mu vyaka vakuvuli ndingusambirapu Bayibolu ndi Akaboni aku Yehova. Chinanga kuti pa nyengu yo ndawonanga kuti Akaboni achitanga nani vinthu mwalisungu kweniso andiŵanaŵaniyanga, kweni ndenga wakunozgeka cha kusintha umoyu wangu. Kweni yapa sonu ndingusintha maŵanaŵanu ngangu.

Ndingusotopo Bayibolu ko lenga ndipu ndingwamba kuliŵerenga. Vo ndaŵerenganga mu Bayibolu pa nyengu iyi venga nge mafuta ngo ngapakika pavilonda vangu. Ndinguwona mavesi nganandi ngo ngatitikambiya kuti tichitengi vinthu mwalisungu ndi vinyama. Mwakuyeruzgiyapu, lemba la Nthanthi 12:10 likamba kuti “munthu murunji waphwere viŵetu vaki.” Bayibolu lingundiwovya kuziŵa kuti Chiuta ndiyu cha yo wachitiska masuzgu. Lingundiwovya so kuziŵa kuti sonu vinthu vafika paheni ukongwa chifukwa ŵanthu alondo ulongozgi waku Chiuta cha. Ndingukwaskika so ukongwa ndati ndasambira vakukwaskana ndi chanju chaku Yehova ndipuso kukunthiyapu kwaki.—Salimo 103:8-14.

Pa nyengu yeniyi ndingusaniya kapepala kakupemphe buku lakuti Kumbi Bayibolo Lisambizanji Weniukongwa? ndipu ndingukatumiza. Pechendajumphi nyengu banja linyaki la Akaboni linguza kunyumba kwangu. Banja ili lingundipempha kuti liyambi kusambira nani Bayibolu, ndipu ndinguzomera. Ndingwamba so kuluta kumaunganu ku Nyumba ya Ufumu. Chifukwa cha venivi, uneneska wa mu Bayibolu ungwamba kume misisi mumtima mwangu.

Bayibolu lingundiwovya kusintha vinthu vinandi. Ndinguleka kukweŵa kweniso kuloŵe. Ndingusintha kavwaliru, mo ndametiyanga kweniso vo ndalongoronga. Ndingusintha so mo ndawoniyanga ŵaraŵara amazaza. (Aroma 13:1) Ndinguleka so mijalidu yinyaki yiheni ndipu ndingwamba kujiko.

Kweni ndingusuzgika ukongwa kusintha pa nkhani ya mo ndakhumbikiyanga kuwone mawupu ngakuvikiliya wanangwa wa ŵanthu ndipuso nyama. Yapa penga bobukateka chifukwa vingunditore nyengu. Pakwamba ndawonanga nge kuti kutuwa mumawupu ndipuso magulu ngenanga, kuŵengi kuleka kugomezgeka. Kweni pati pajumpha nyengu, ndinguwamu kuti Ufumu waku Chiuta pe ndiwu wazamusintha vinthu pacharu. Ndinguwona kuti ndikhumbika kumaliya nthazi zangu zosi pakovya Ufumu wenuwu kweniso kusambiza anyaki kuti awuziŵi.—Mateyu 6:33.

Pa nyengu yo ndakhumbanga kuti vinthu visinthi, ŵanthu ndaŵagaŵanga mumagulu ngaŵi, gulu la ŵanthu wo achita vamampha ndipuso linyaki laku wo achita viheni. Ndenga wakunozgeka kumalana ndi ŵanthu wo ndawonanga kuti achita viheni. Kweni sonu Bayibolu landiwovya kuti ndileki kutinkha ŵanthu. Landiwovya kuti ndiyanjengi weyosi. (Mateyu 5:44) Ndilongo chanju chenichi munthowa zinandi, nge kuŵapharazgiya uthenga wamampha wa Ufumu waku Chiuta. Ndikondwa ukongwa kuwona kuti ntchitu yeniyi yichiska chimangu pacharu kweniso yitovya ŵanthu kuti aje ndi chilindizga chayichu.

Sonu nde ndi chimangu chamumtima chifukwa ndikusiliya vosi mumanja mwaku Yehova. Ndigomezga kuti iyu nge Mlengi, wazomerezengi cha kuti nyama ndipuso ŵanthu akandirizgikengi mpaka muyaya kweniso kuti charu chakutowa ichi chinangiki. Kweni mwakugwiriskiya ntchitu Ufumu waki, pambula kuswera yapa wanozgengi vosi vo vanangika pacharu. (Yesaya 11:1-9) Ndikondwa ukongwa kuziŵa uneneska wenuwu kweniso kuwovya ŵanthu anyaki kuti agomezgengi kuti venivi vichitikengi nadi. Sonu ndikuleka kuja ndi maŵanaŵanu ngakuti ndisinthi vinthu pacharu.