Akaboni aku Yehova akutuzga Mabayibolu nganyaki 6 mu sabata yachiŵi. Pa July 4, 2020, Bayibolu la Charu Chifya la Malemba Ngakupaturika lingutuzgika mu chineneru cha Bislama ndi Oromo. Pa July 5, Bayibolu La Charu Chifya lingutuzgika mu chineneru cha Latvia ndi Marathi, ndipu Bayibolu la Charu Chifya la Malemba nga Chigiriki Ngachikhristu lingutuzgika mu chineneru cha Bengali ndi Karen (S’gaw). Panyengu yo nkhani yakuchita kujambula yakambikiyanga pangutuzgika Mabayibolu ndipu nganguŵikika pa webusayiti. Apharazgi anguvwisiya pulogilamu yeniyi kuziya pa vipangizu vasonu ndipu angukondwa ukongwa kulonde mphasu yeniyi.

Mubali Mark Sleger wa mu Komiti ya Nthambi ku Fiji ndiyu wangutuzga Bayibolu la Charu Chifya lo lingunozgeka so mu chineneru cha Bislama. Apharazgi anguvwisiya pulogilamu yeniyi ku Vanuatu, muchineneru cha Bislama ndipuso yingufwatulika mu Chineneru cha Manja.

Ntchitu yakufwatuliya Bayibolu yinguto vyaka vitatu kuti yimali ndipu matimu ngaŵi ndingu ngangufwatuliya. Munthu munyaki yo wangugwiraku ntchitu yakufwatuliya wangukamba kuti: “Abali aliyanjengi ukongwa Bayibolu la Charu Chifya lo likunozgeka so chifukwa ndambula kusuzga kuŵerenga ndipu sonu lendi mazu ngapusu ngo ŵanthu alongoloro mazuŵa nganu. Litiwovyengi tosi kuti tiwuvwisengi umampha uneneska.”

Tigomezga kuti Bayibolu lakunozgeka so lenili liŵawovyengi ukongwa apharazgi akujumpha 700 wo alongoro chineneru cha Bislama. Liŵawovyengi asani asambira pakuŵija ndipuso mu uteŵeti.

Mubali Delroy Williamson, wa mu Komiti ya Nthambi ku Ethiopia, ndiyu wangutuzga Bayibolu la Charu Chifya mu chineneru cha Oromo. Abali ndi azichi akujumpha 12,548 anguvwisiya pamwenga kuwonere pulogilamu yeniyi, kusazgiyapu apharazgi 2,000 wo alongoro chineneru cha Oromo.

Chifukwa cha kusuzga kwa vipangizu, Wupu Wakulongozga ungunozga kuti pulogilamu yakujambulika kali yeniyi yiwoneseki pa TV. Apharazgi ŵenga so ndi mwaŵi wakuvwisiya unganu wenuwu kuziya pa foni.

Abali atatu kweniso azichi ŵaŵi angugwira ntchitu yakufwatuliya Bayibolu lenili kwa vyaka 5. Kutuzgika kwa Bayibolu lenili kuwovyengi abali ndi azichi wo apharazgiya ŵanthu anandi wo alongoro chineneru cha Oromo.

Pati pajumpha vyaka 12, Bayibolu la Charu Chifya lingutuzgika mu chineneru cha ku Latvia. Mipingu yosi ya chineneru cha Latvia ndi chineneru cha ku Russia cho chikambika ku Latvia yingupempheka kuti yiwonere pulogilamu yeniyi.

Mubali Jouni Palmu, wa mu Komiti ya Nthambi ku Finland ndiyu wangukamba nkhani yakutuzgiya Bayibolu. Iyu wangukamba kuti: “Te akukondwa kutuzga Bayibolu ili chifukwa ndambula kusuzga kuŵerenga ku ŵanthu wo alongoro chineneru cha Latvia. Tigomezga kuti ŵanthu akondwengi ukongwa pakusambira ndi kulunguruka Mazu ngaku Chiuta.”

Pakukamba za vinthu vakovya pakufufuza vo visanirika mu Bayibolu lasonu, wakufwatuliya munyaki wangukamba kuti: “Bayibolu lenili lenge foni yo yendi chechosi cho chingakuwovyani pakupanga sambiru la pakumwija ndipuso kulunguruka pa vo mwasambira.”

Bayibolu la Charu Chifya lingutuzgika mu chineneru cha Marathi panyengu yo kwenga vakuchitika vapade mumipingu ya chineneru cha Marathi ku India. Mubali Puneet Aggarwal, wa mu Komiti ya Nthambi ku India, ndiyu wangutuzga Bayibolu.

Abali ndi azichi 6 angugwira ntchitu yakufwatuliya Bayibolu la chineneru cha Marathi kwa vyaka vitatu. Wakufwatuliya munyaki wangukamba kuti: “Bayibolu lenili liwovyengi ukongwa apapi ndipuso wo asambiza ŵanthu Bayibolu kuti asambizengi ŵana ŵawu pamwenga ŵanthu wo akhumba kusambira vinandi vakukwaskana ndi Bayibolu.”

Wakufwatuliya munyaki so wangukamba kuti: “Vakukondwesa ukongwa kuziŵa kuti zina laku Chiuta lakuti Yehova likuwezekiyamu mu Bayibolu ili mumalu mosi mo zina lenili lakhumbikanga. Akuŵerenga asaniyengi zina laku Yehova papeji lelosi mubuku ili ndipu zina laku Yehova litumbikikengi nge mo lakhumbikiyanga.”

Ŵanthu akujumpha 83 miliyoni alongoro chineneru cha Marathi ku central India.

Mubali Ashok Patel wa mu Komiti ya Nthambi ku India ndiyu wangutuzga Bayibolu la Charu Chifya la Malemba nga Chigiriki Ngachikhristu mu chineneru cha Bengali. Apharazgi akujumpha 1,200 anguvwisiya pulogilamu yeniyi ku India ndi Bangladesh.

Ŵanthu akujumpha 265 miliyoni alongoro chineneru cha Bengali. Chineneru chenichi ntchanambala 7 pa vineneru vikuluvikulu vo ŵanthu alongoro pa charu chapasi. Kuti tifwatuliyi mu chineneru cho ŵanthu anandi atuvwa mwambula kusuzga tingudana ŵanthu akupambanapambana kutuliya ku India ndi Bangladesh. Ntchitu yeniyi yinguto vyaka vitatu kuti yimali.

Mu nkhani yaki, Mubali Patel wangukamba kuti: “Bayibolu la chineneru cha Bengali ndilu lenga lakwamba kufwatulika. Bayibolu la Malemba nga Chigiriki Ngachikhristu lingusindikizika mu 1801. Chakukondwesa ndi Bayibolu lenili ntchakuti le ndi zina laku Chiuta lakuti Yehova. Chinanga kuti veviyo, akufwatuliya anyaki asonu atuzgamu zina laku Chiuta ndipu aŵikamu zina lakuti ‘Ambuya.’ Bayibolu la Charu Chifya la Malemba nga Chigiriki Ngachikhristu likufwatulika mwauneneska ndipuso ndambula kusuzga kulivwisa.”

Wakufwatuliya munyaki so wangukamba kuti: “Kufwatulika kwa Bayibolu lenili mbukaboni wakuti Yehova Chiuta watanja ŵanthu amitundu yosi ndipu wakhumba kuti wosi asambiri vakukwaskana ndi iyu ndipuso mwana waki, Yesu Khristu.”

Mubali Hiroshi Aoki, wa mu Komiti ya Nthambi ku Myanmar, ndiyu wangutuzga Bayibolu la Charu Chifya la Malemba nga Chigiriki Ngachikhristu mu chineneru cha Karen (S’gaw). Abali ndi azichi 510 a mu mipingu 6 kweniso magulu 4 angulumikizika ndipu anguvwisiya pulogilamu yeniyi kuziya mu vipangizu vasonu.

Ntchitu ya kufwatuliya Bayibolu la chineneru cha Karen (S’gaw) yinguto chaka kuti yimali. Wakufwatuliya munyaki wangukamba kuti: “Abali ndi azichi ndipuso ŵanthu anyaki mu uteŵeti akondwengi ukongwa kuŵerenga Bayibolu mu chineneru cha Karen (S’gaw) chifukwachakuti zina lakuti Yehova likuwezekiyamu ndipuso akufwatuliya akugwiriskiya ntchitu mazu ngambula kusuzga. Titimuwonga ukongwa Yehova pakutipaska mphasu yapade yeniyi yo yitiwovyengi kundere kufupi ndi iyu kuziya mu chineneru cho tilongoro.”

Wakufwatuliya munyaki wangukamba kuti: “Bayibolu la Charu Chifya likulembeka mu mazu ngapusu ngo tilongoro mazuŵa nganu. Venivi viwovyengi ŵanthu kuti avwengi nge mo ŵanthu wo azumbulika mu Bayibolu avwiyanga, aŵanaŵaniyengi vo vaŵachitikiyanga, ndipuso ayezgengi chivwanu chawu.”

Tikondwa ukongwa kuti abali ndi azichi akulonde Mabayibolu ngenanga. Tigomezga kuti Mabayibolu ngo ngakutuzgika ngawovyengi apharazgi wo alongoro vineneru venivi kuti alutirizgi kuja paubwezi ndi Yehova ndipuso akambiyengeku anyawu uneneska.—Yohane 17:17.