Kumbi Akususka Khristu Mbayani?

JULANI

Vo Bayibolu limuka

Ndi nyengu zosi cha po akususka Khristu waja munthu yumoza pamwenga gulu limoza. Tikamba viyo chifukwa Bayibolu likamba kuti ‘akususka Khristu mbanandi.’ (1 Yohane 2:18) Mumalu mwaki, mazu ngakuti “akususka Khristu” ngakutuwa ku mazu nga Chigiriki ngo ngang’anamuwa kuti “wakususkana ndi Khristu” ndipu ngakamba za munthu weyosi yo wachita vo vakambika mumphata

Wasuska kuti Yesu ndi Khristu (Mesiya) pamwenga kuti ndi mwana waku Chiuta.—1 Yohane 2:22.
Wasuska Khristu, yo wakusankhika ndi Chiuta.—Salimo 2:1, 2; Luka 11:23.
Wakamba kuti iyu ndiyu Khristu.—Mateyu 24:24.
Watombozga wo alondo Khristu, veviyo chifukwa Yesu wawona kuti vo ŵanthu achitiya wo atimulondo vija nge kuti achitiya iyu.—Machitidu 9:5.
Wakamba boza kuti ndi Mkhristu, po wachita vinthu vachinyengu pamwenga wavwiya cha marangu.—Mateyu 7:22, 23; 2 Akorinto 11:13.

Chinanga kuti Bayibolu likamba kuti ŵanthu wo achita venivi mbakususka Khristu, kweni ligwiriskiya so ntchitu mazu ngakuti “akususka Khristu” pakukamba va ŵanthu wosi wo achita venivi. (2 Yohane 7) Akususka Khristu angwamba kuwoneka munyengu ya akutumika ndipu ŵeche waka mpaka mazuŵa nganu. Uchimi wa mu Bayibolu ungukambiya limu kuti venivi ndivu vazamuchitika.—1 Yohane 4:3.

Kumbi akususka Khristu tingaŵaziŵa wuli?

Yiwu achiska fundu zaboza zakukwaskana ndi Yesu. (Mateyu 24:9, 11) Mwakuyeruzgiyapu, wo asambiza kuti kwe achiuta atatu pamwenga kuti Yesu ndi Chiuta Wanthazizosi, asuskana ndi vo Yesu wangusambiza. Iyu wanguti: “Ada mbara kuluska ini.”—Yohane 14:28.
Akususka Khristu asuska vo Yesu wangukamba vakukwaskana ndi mo Ufumu waku Chiuta ugwiriya ntchitu. Mwakuyeruzgiyapu, alongozgi anyaki avisopa akamba kuti Khristu walamuliya mwakugwiriskiya ntchitu maboma nga ŵanthu ngo ngalipu. Kweni chisambizu chenichi chipambana ukongwa ndi vo Yesu wangukamba. Iyu wangukamba kuti: “Ufumu wangu ngwacharu ichi cha.”—Yohane 18:36.
Yiwu akamba kuti Yesu ndi Mbuya wawu, kweni avwiya cha marangu ngaki, kusazgapu dangu lakuti tipharazgengi uthenga wamampha wa Ufumu.—Mateyu 28:19, 20; Luka 6:46; Machitidu 10:42.