Kumbi Chisambizu Chakuti kwe Purigatoriyo Chikutuliya M’Bayibolu?

JULANI

Vo Bayibolu limuka

Chisambizu ichi chikutuliya m’Bayibolu cha. Mu Bayibolu mulivi mazu ngakuti “purigatoriyo.” Kweniso likambapu cha kuti asani munthu wafwa waluta dankha ku purigatoriyo kuti wakatoweseki. a Ŵanaŵaniyani vo Bayibolu likamba pa nkhani ya ubudi ndi nyifwa. Kusambira venivi kukuwovyeningi kuziŵa kuti Bayibolu lisuskana ndi chisambizu cha purigatoriyo.

Kuvwana mu ndopa zaku Yesu ndiku kuchitiska kuti munthu watowi ku ubudi waki kweni purigatoriyo cha. Bayibolu likamba kuti “ndopa zo zaku Yesu, Mwana [waku Chiuta], zitititozga ku ulakwi wosi” ndipuso kuti “Yesu Khristu . . . wangutifwatuwa ku vakulakwa vidu mu ndopa zaki.” (1 Yohane 1:7; Chivumbuzi 1:5, Mazu Ghaku Chiuta) Yesu wakupereka “umoyu waki [nge] thumba lapa ŵanandi” kuti waŵawombo ku maubudi ngawu.—Mateyu 20:28, Mazu Ghaku Chiuta.
Ŵanthu wo akufwa aziŵa chechosi cha. “Chifukwa ŵamoyo ŵaziŵa kuti ŵakafwanga, kweni ŵakufwa kuti ŵaziŵa kanthu cha.” (Wakutaula 9:5, Mazu Ghaku Chiuta) Pakuti ŵanthu akufwa aziŵa chechosi cha, ndikuti vingachitika cha kuti atoweseki ndi motu wa purigatoriyo.
Asani munthu wafwa walangika cha chifukwa cha maubudi ngaki. Bayibolu likamba kuti “mphotu ya ulakwi ndi nyifwa.” Ilu likamba so kuti “yo wafwa warunjiskika ku ulakwi.” (Aroma 6:7, 23, Mazu Ghaku Chiuta.) Nyifwa ndiyu chilangu cha ubudi.

Kumbi chisambizu chakuti kwe purigatoriyo chikutuliya pani?

Agiriki akali ndiwu agomezganga Limbo ndipuso purigatoriyo. Chifukwa cha vo Agiriki asambizanga, Clement wa ku Alexandria wanguzomereza chisambizu chakuti asani munthu wafwa waluta ku motu kuti wakatoweseki ku maubudi ngaki. Kweni buku la The History of Christian Doctrines likamba kuti Papa Gregory I ndiyu wanguchitisa kuti ŵanthu anandi agomezgengi chisambizu chenichi. Buku lenili likamba so kuti Gregory, yo wenga papa kutuwa mu 590 mpaka mu 604 C.E., “wadanika kuti ndiyu ‘wakwambisa chisambizu cha purigatoriyo.’” Tchalitchi la Katolika linguzomereza chisambizu ichi pa unganu wo unguchitika mu 1274 (councils of Lyons) ndipuso mu 1439 (councils of Florence). Tchalitchi ili linguzomereza so chisambizu chenichi mu 1547 (pa unganu wa Council of Trent).

a Pakukamba za chisambizu ichi, buku la Orpheus: A General History of Religions likamba kuti “mu mabuku nga Uthenga Wamampha, mulivi mazu ngakuti purigatoriyo.” Mwakukoliyana ndi fundu yeniyi, buku la New Catholic Encyclopedia likamba kuti: “Vo tchalitchi la Katolika lisambiza pa nkhani ya purigatoriyo vikutuliya mu Malemba Ngakupaturika cha kweni vikutuliya mu fundu za ŵanthu.”—Second Edition, Volume 11, peji 825.

b Wonani buku lakuti New Catholic Encyclopedia, Second Edition, Volume 11, peji 824.