Wabona na muzifanikisyo zili mukabbuku aaka kuti Bakamboni baJehova bazwaata kabotu biyeni do kabaya kumiswaangano yabo? Nkaambo nzi nitwiibikkila maanu oobu nzila njituzwaata aayo nituya kumiswaangano?

Tutondeezya kulemeka Leza wesu. Nisimpe kuti Leza talangi ciimo camuntu. (1 Samuele 16:7) Aboobo ciindi nituswaangana aamwi kuzoomukomba, ciyandisyo cesu ncakumulemeka abaabo mbitukombaabo. Kaansinga nkwiimikila kunembo lyankuta, nisimpe kuti twali kunolilanga-langa kuti tuzweete kabotu na. Munzila iikozyenie anjiyeeyi, nsamino yesu nituli mumiswaangano itondeezya kulemeka ‘oyo Uubeteka nyika yoonse’ Jehova Leza, aabusena mputumukombela.—Matalikilo18:25.

Tutondeezya nzila nzituponaazyo. IBbaibbele lisungwaazya maKristu ‘kusama kabotu cabulemu alimwi acakulibatamika.’ (1 Timoteo 2 :9, 10) “Kusama kabotu” zyaamba kuzwaata zintu zitapi maboneno mabi kubantu mbuli kuti ndibonwe, kana zipa nsoni naa bweeme. Alubo kubaa ‘meendelo alikabotu’ kulatugwasya mukusala zisamo zilikabotu. Zyeelelo eezi zitupa lwaangunuko lwakulisalila nzituyanda. Kuzwaata kabotu kwesu akulangika kabotu ‘kupa bamwi kutembawula kuyiisya kwaMufutuli wesu,’ alimwi ‘akutembawula Leza.’ (Tito 2:10; 1 Petro 2:12) Kusama kwesu kabotu katuya kumiswaangano, kusungwaazya bamwi kuti babubone kabotu bukombi bwaJehova.

Kusama kwako kutakulesyi kunjila miswaangano kuN’anda yaBwaami. Zisamo zyesu tazyeelede kuba zidula pe naa zyaajulu loko, pesi zyeelede kulangika kabotu.

• Nkaambo nzi ncitweelede kusama kabotu nituya kukukomba Leza?

• Nzyeelelo nzi zitugwasya mukusala kabotu zyakusama?